Pa 12 December, 2018, a Mboni za Yehova anagulitsa malo omaliza ku likulu lawo lakale lapadziko lonse ku Brooklyn, otchedwa One York Street kapena kuti 30 Front Street. Kampani ya Fortis Dumbo Acquisition, LLC ndi yomwe inagula malowa. Kuyambira mu 2004, a Mboni akhala akugulitsa nyumba komanso malo awo 37 ku Brooklyn.

A Mboni anagula malo a ku York Street mu 1977, ndipo ankawagwiritsa ntchito ngati malo oimikapo magalimoto a anthu ogwira ntchito ku likulu lawo lakale. Pamalowa (omwe azunguliridwa ndi mzere m’chithunzicho) sipanamangidwe chilichonse ndipo ali m’dera lotchedwa DUMBO m’malire a Brooklyn Bridge ndi Brooklyn-Queens Expressway.

Kwa zaka zoposa 100, a Mboni akhala akuyendetsa ntchito yawo yophunzitsa anthu Baibulo padziko lonse kuchokera ku likulu lawo ku Brooklyn. Koma kuyambira mu 2016, iwo akhala akuyang’anira ntchito yawo padziko lonse kuchokera ku likulu lawo lapadziko lonse ku Warwick, New York.

Funsani Ofesi Yoona Zofalitsa Nkhani Ngati Mukufuna Kudziwa Zambiri, +1-845-524-3000