ZIMENE ACHINYAMATA AMAFUNSA
N’chifukwa Chiyani Makolo Anga Samandilola Kusangalalako?
Anzanu akonza pate kumapeto kwa mlungu ndipo akuitanirani. Mwapempha makolo anu ngati mungapite nawo kupateko koma akuyankhani kuti “Ayi.” Simukudabwa ndi yankho lawolo chifukwa ulendo wapita anayankhanso chimodzimodzi.
Zimene zili munkhaniyi
N’chifukwa chiyani nthawi zonse makolo anga sandilola kusangalalako?
Ndingatani kuti makolo anga azindilolako kuchita zinthu zina?
N’chifukwa chiyani nthawi zonse makolo anga sandilola kusangalalako?
Zikamaoneka kuti nthawi zonse makolo anu amakukanizani mukapempha zinazake, mutha kuganiza kuti safuna kuti muzisangalalako.
Mtsikana wina dzina lake Marie ankaganiza choncho atangopeza foni. Iye anati: “Bambo anga anandiikira malamulo ambiri okhudza mapulogalamu amene ndingachite dawunilodi pafoni yanga, anthu amene ndiyenera kucheza nawo komanso nthawi imene ndiyenera kusiya kucheza nawo. Koma anzanga ankatha kuchita chilichonse chimene akufuna.”
Zoti muganizire: Kodi ndi zoona kuti bambo a Marie sankafuna kuti mwana wawo azisangalala? Kodi mwina ankadera nkhawa zinthu ziti?
Zikwangwani zapamsewu zoletsa kupitirira liwiro linalake, zimachepetsa ufulu womwe dalaivala ali nawo koma zimateteza kuti asachite ngozi. N’chimodzimodzinso malamulo amene makolo amakhazikitsa
Tayesani izi: Yerekezerani kuti inuyo ndinu kholo limene mwana wake wapeza foni kumene. Kodi ndi zinthu ziti zimene inuyo mungade nazo nkhawa? Kodi inuyo mungakhazikitse malamulo otani kuti mumuteteze? Ngati mwana wanu anganene kuti simukufuna kuti azisangalalako, kodi inuyo mungamuyankhe bwanji?
“Bambo anga ankakonda kundiuza kuti, ‘Uziganizira iweyo uli kholo ngati ineyo.’ Kuganizira zimenezi kunandithandiza kuti ndisamangoona kufunika kwa malamulo amene ankandipatsa koma kuti ndizionanso zifukwa zimene ankaperekera malamulowo. Ndikanakhala kuti ndine kholo, ndikuona kuti ndikanakonda kuti ana anga azitsatira malamulo amene bambo anga amandipatsa.”—Tanya.
Ndingatani kuti makolo anga azindilolako kuchita zinthu zina?
“Kulalata sikungathandize chilichonse ndipo khalidwe limeneli lingatopetse inuyo komanso makolo anu. Ngati mungamakangane nawo, makolo anu atha kuona kuti ndinu achibwana ndipo sangakupatseni ufulu wowonjezera.”—Richard.
“Lamulo lililonse limene makolo amapereka amalipereka ndi cholinga chabwino. Sikuti iwo amafuna kuti ndisamasangalale, koma amafuna kuti ndizisangalala m’njira yoti ndisakumane ndi mavuto.”—Ivy.
Mfundo ya m’Baibulo: “Munthu wopusa amatulutsa mkwiyo wake wonse, koma wanzeru amakhala wodekha ndipo amalamulira mkwiyo wake.”—Miyambo 29:11.
Ndinayesera kuphwanya malamulo amene bambo anga anandiikira pa nkhani yogwiritsa ntchito foni. Ndinkayesetsa kupeza njira zotumizirana mameseji ndi anzanga usiku komanso kuchita dawunilodi mapologalamu amene anandiletsa. Koma nthawi zonse ankanditulukira ndipo ankandikhwimitsira malamulo chifukwa choti anasiya kundikhulupirira. Sibwino kupeza njira zophwanyira malamulo amene makoko akhazikitsa.”—Marie.
“Muzileza mtima. Zingatenge nthawi kuti makolo anu asinthe lamulo linalake, koma akaona kuti mukumvera malamulo amene anawakhazikitsa, sangavutike kukulolani kuti muzichita zinthu zinanso zambiri.”—Melinda.
Mfundo ya m’Baibulo: “Muzimvera makolo anu pa zinthu zonse.”—Akolose 3:20.
“Kukakamira zomwe mukufuna sikungathandize kuti zinthu zikuyendereni bwino kapenanso kuti mupeze zomwe mukufunazo.”—Natalie.
“Makolo amafuna kuti aziona kuti ndiwe woganiza bwino. Ndiye ndikamalankhulana ndi makolo anga, ndimawafotokozera zifukwa zomveka bwino osangoti mmene ndikumvera. Ndikamachita zimenezi, nthawi zambiri amandilola kuchita zimene ndapemphazo.”—Joseph.
Mfundo ya m’Baibulo: “Muzilemekeza bambo anu ndi mayi anu.”—Aefeso 6:2.
Mwina Mungakondenso Kudziwa Izi
ZIMENE ACHINYAMATA AMAFUNSA
Kodi Ndingakambirane Bwanji ndi Makolo Anga za Malamulo Amene Anakhazikitsa?
Mukamalankhula mwaulemu ndi makolo anu zinthu zingakuyendereni bwino.
ZOTI ACHINYAMATA ACHITE
Kuganizira za Malamulo
Ganizirani bwino za malamulo omwe mumaona kuti ndi ovuta.
MAVIDIYO AMAKATUNI
Kodi Ndingatani Kuti Makolo Anga Azindilolako Kuchita Zinthu Zina?
Mukhoza kuganiza kuti makolo anu akuyenera kumakuonani kuti ndinu munthu wamkulu, koma iwo sangagwirizane ndi maganizo amenewa. Kodi mungachite zinthu ziti kuti makolo anu ayambe kukukhulupirirani?
ZIMENE ACHINYAMATA AMAFUNSA
Kodi N’zofunikadi Kuti Makolo Azikhazikitsa Malamulo Oti Muzitsatira?
Kodi mumaona kuti malamulo amene makolo anu anakhazikitsa ndi ovuta? M’nkhaniyi muli mfundo zimene zingakuthandizeni kuti muzitha kuona malamulowo moyenera.
ZIMENE ACHINYAMATA ANZANU AMANENA
Kodi Ndingatani Kuti Ndizilankhulana Bwino ndi Makolo Anga?
Pali zabwino zambiri zimene mungapeze chifukwa cholankhulana bwino ndi makolo anu.
ZIMENE ACHINYAMATA AMAFUNSA
Kodi Ndingatani Kuti Makolo Anga Azindikhulupirira?
Kuphunzira kukhala wodalirika ndi kofunika kwa aliyense osati kwa achinyamata okha.
