Kodi Baibulo Limanena Zotani pa Nkhani Yowotcha Mtembo wa Munthu?

YAMBANI

Yankho la m’Baibulo

Baibulo silipereka malangizo aliwonse pa nkhani yowotcha mtembo. Komanso mulibe lamulo loti mtembo wa munthu uziwotchedwa kapena kuikidwa m’manda.

M’Baibulo muli nkhani za atumiki okhulupirika a Mulungu omwe anaika m’manda mitembo ya achibale awo. Mwachitsanzo, Baibulo limanena kuti Abulahamu anagula manda omwe anaikamo mkazi wake Sara.—Genesis 23:2-20; 49:29-32.

Baibulo limanenanso za anthu okhulupirika omwe anawotcha mitembo ya anthu. Mwachitsanzo, Mfumu Sauli ya ku Isiraeli ndi ana ake aamuna atatu ataphedwa ku nkhondo, mitembo yawo inakhalabe m’dera la adani ndipo siinasungidwe mwaulemu. Asilikali okhulupirika a ku Isiraeli atamva za nkhaniyi, anakatenga mitemboyo. Ataitenga anaiwotcha ndi kukaika phulusa lake. (1 Samueli 31:8-13) Ndipo Baibulo limasonyeza kuti zomwe zinachitikazi zinali zovomerezeka.—2 Samueli 2:4-6.

Maganizo olakwika omwe anthu ambiri amakhala nawo pa nkhani yowotcha mtembo

Maganizo olakwika: Kuwotcha mtembo sikulemekeza womwalirayo.

Zoona zake: Baibulo limanena kuti munthu akamwalira amabwerera kufumbi. Zimenezi ndi zoona chifukwa thupi la munthuyo likawola limadzakhala fumbi. (Genesis 3:19) Kuwotcha mtembo kumachititsa kuti zimenezi zichitike mofulumira chifukwa thupilo limasanduka phulusa kapena fumbi.

Maganizo olakwika: Kalelo, mitembo ya anthu okhawo omwe sankatumikira Mulungu ndi imene inkawotchedwa.

Zoona zake: Ndi zoona kuti mitembo ya anthu osakhulupirika ngati Akani ndi anthu a m’banja lake inawotchedwa. (Yoswa 7:25) Komabe zimenezi zinangochitika ndipo silinali lamulo. (Deuteronomo 21:22, 23) Monga mmene taonera kumayambiriro kwa nkhaniyi, ngakhalenso mitembo ya anthu okhulupirika ngati Yonatani yemwe anali mwana wa Mfumu Sauli, inawotchedwa.

Maganizo olakwika: Mulungu sadzaukitsa anthu omwe mitembo yawo inawotchedwa.

Zoona zake: Mulungu adzaukitsa anthu kaya mitembo yawo inaikidwa m’manda, kuwotchedwa, kumira m’madzi kapenanso kudyedwa ndi zinyama. (Chivumbulutso 20:13) Mulungu Wamphamvu yonse sangakanike kulenganso matupi atsopano a anthu omwe anamwalirawo.—1 Akorinto 15:35, 38.

Kodi Mungasankhe Bwanji Ngati N’koyenera Kuwotcha Kapena Kuika M’manda Mtembo wa Womwalirayo?

Mukamaganizira zoti muchite ndi mtembo wa munthu, ganizirani izi:

Zomwe malemuyo anasankha. M’Baibulo muli nkhani za anthu omwe anatsatira zomwe wachibale wawo ananeneratu zokhudza zimene adzachite ndi mtembo wake, iye akadzamwalira.—Genesis 50:4, 5; Ekisodo 13:19.
Chikhalidwe cha m’deralo. Nthawi zambiri chikhalidwe chimakhudza kwambiri zomwe anthu amasankha kuchita akafuna kuika mtembo. (Yohane 19:40) Mwachitsanzo, kalelo anthu ankakonda kuika mtembo wa munthu m’manda. (Genesis 49:31; 1 Samueli 28:3) Masiku anonso anthu angasankhe zomwe angachite ndi mtembo wa munthu mogwirizana ndi chikhalidwe cha m’deralo bola ngati sizikuphwanya mfundo za m’Baibulo.
Malamulo a boma. Baibulo limatilimbikitsa kumvera olamulira. (Aroma 13:1) M’mayiko ena, boma limaika malamulo oyenera kutsatira pa zomwe anthu angachite ndi mtembo wa munthu. Mwachitsanzo, akuluakulu a boma amatha kukhazikitsa malo okatayako phulusa la mtembo womwe wawotchedwa.
Mmene zingakhudzire anthu ena. Malemba amatilimbikitsa kuti tiziganizira zofuna za ena. (Afilipi 2:4) Tikamaganizira zoika mtembo wa munthu, tingadzifunse mafunso ngati awa: Kodi achibale athu ena angakonde kuti mtembo uikidwe m’manda kapena uwotchedwe? Kodi anthu a m’dera lathu amaiona bwanji nkhani yoika mtembo m’manda kapena kuuwotcha?