M’mipingo yathu tili na abale na alongo amene atumikila Yehova kwa zaka zambili. Tingaphunzile zambili pa citsanzo cawo cosagwedezeka codalila Yehova. Tingawafunse zokhudza mbili ya gulu la Yehova na mavuto amene akumana nawo, komanso mmene awagonjetsela mwa thandizo la Yehova. Tingaitanilekonso mmodzi wa abale okondedwa amenewa pa Kulambila kwa Pabanja kuti atifotokozeleko zinthu zokondweletsa zimene apeza pa utumiki wawo.

Ngati ndimwe ciyambakale, khalani womasuka kufotokozela Akhristu acicepele za cikhulupililo canu. Yakobo na Yosefe anauzako ana awo zinthu zimene Yehova anawacitila. (Gen. 48:21, 22; 50:24, 25) Pambuyo pake, Yehova analamula mitu ya mabanja kuphunzitsa ana awo zinthu zazikulu zimene iye anawacitila. (Deut. 4:9, 10; Sal. 78:4-7) Masiku ano, makolo komanso anthu ena mu mpingo angamafotokozeleko acicepele za nchito zodabwitsa zimene aona Yehova akukwanilitsa kupitila m’gulu lake.

TAMBITSANI VIDIYO YAKUTI KUSUNGA MGWILIZANO PA NTHAWI YA CILETSO, NDIYENO YANKHANI MAFUNSO OTSATILAWA:

• Kodi Ofesi Yanthambi ya ku Austria inathandiza bwanji abale athu a kumaiko ena kumene nchito yathu inali yoletsedwa?

• Kodi abale a m’maiko amenewa anasunga bwanji cikhulupililo cawo cili colimba?

• N’cifukwa ciani ofalitsa ambili ku Romania anasiya kugwilizana na gulu la Yehova? Nanga anayambanso bwanji kugwilizana nayo?

• Kodi zocitika zimenezi zilimbitsa bwanji cikhulupililo canu?