Zinsinsi Zotithandiza Kukhala Okhutila
Tonse, kaya ndife okwatila kapena ayi, acicepele kapena acikulile, timafuna kukhala acimwemwe komanso okhutila. N’zimenenso Mlengi wathu amafuna. N’cifukwa cake iye watipatsa malangizo othandiza kwambili.
Muzigwila Nchito Molimbikila
“Agwile nchito molimbikila. Agwile ndi manja ake nchito yabwino, kuti akhale ndi kanthu kena kopatsa munthu wosowa.”—AEFESO 4:28.
Mlengi wathu amafuna tiziona kuti kugwila nchito ni cinthu cabwino. Cifukwa ciani? Munthu amene amagwila nchito molimbika amakhala wokondwela, cifukwa amakwanitsa kudzisamalila komanso kusamalila banja lake. Angakwanitsenso ngakhale kuthandiza wina amene ni wosoŵa. Nawonso abwana ake amam’konda. Conco ngati munthu amaseŵenza mwakhama si kwenikweni kucotsedwa nchito. Mpake kuti Malemba amafotokoza zotulukapo zabwino za kugwila nchito mwakhama kuti ni “mphatso yocokela kwa Mulungu.”—Mlaliki 3:13.
Khalani Woona Mtima
“Tikukhulupilila kuti tili ndi cikumbumtima coona, popeza tikufuna kucita zinthu zonse moona mtima.”—AHEBERI 13:18.
Tikakhala oona mtima, timadzisungila ulemu. Timakhala na mtendele wa maganizo, ndiponso timagona tulo twabwino. Kuwonjezela apo, anthu ena amatikhulupilila na kutilemekeza. Koma anthu osaona mtima amadzimana zinthu zabwino zimenezi. Cina, cikumbumtima cawo cingamawavutitse, ndipo angamakhale mwamantha poopa kuti tsiku lina adzagwidwa cifukwa ca kusakhulupilika kwawo.
Muziona Ndalama Moyenela
“Moyo wanu ukhale wosakonda ndalama, koma mukhale okhutila ndi zimene muli nazo pa nthawiyo.”—AHEBERI 13:5.
Timafunika ndalama zogulila cakudya na zinthu zina zofunikila. Komabe, “kukonda ndalama” n’koopsa. Kungapangitse munthu kuthela nthawi yoculuka na mphamvu zake posakila ndalama. Zimenezi zingabweletse mavuto m’cikwati cake, zingamulande nthawi yoceza na ana ake, ndipo zingawononge ngakhale thanzi lake. (1 Timoteyo 6:9, 10) Kuwonjezela apo, munthu amene amakonda ndalama angakhale pa mayeselo ocita zinthu mosakhulupilika. Munthu wina wanzelu analemba kuti: “Munthu wocita zinthu mokhulupilika adzapeza madalitso ambili, koma woyesetsa kuti apeze cuma mofulumila, sadzapitiliza kukhala wosalakwa.”—Miyambo 28:20.
Sankhani Maphunzilo Abwino Kwambili
“Usunge nzelu zopindulitsa ndiponso kuganiza bwino.”—MIYAMBO 3:21.
Maphunzilo abwino angatithandize kukhala anthu odalilika komanso kukhala makolo abwino. Koma maphunzilo abwino akuthupi paokha sangatipatse citetezo cokhalitsa kapena cimwemwe. Kuti zinthu zizitiyendela bwino pa zilizonse zimene timacita, tiyenela kulandila maphunzilo ocokela kwa Mulungu. Pokamba za munthu amene amamvela Mulungu, Malemba amati: “Zocita zake zonse zidzamuyendela bwino.”—Salimo 1:1-3.
Mungakondenso Izi
NSANJA YA MLONDA
Mungacite Ciani Kuti Muzisangalala Ngati Mumagwila Nchito Yolimba?
Onani malangizo ena a m’Baibulo amene angakuthandizeni kukhala wosangalala ndi wokhutila ndi nchito yanu.
GALAMUKA!
Njila Yopezela Cimwemwe—Kukhutila Komanso Kupatsa
Ambili amaganiza kuti munthu amakhala wacimwemwe akapeza cuma cambili. Kodi kukhala na ndalama komanso katundu wambili kumabweletsa cimwemwe cokhalitsa? Kodi zocitika zimaonetsa ciani?
ZIPHUNZITSO ZOFUNIKA ZA M’BAIBO
Kodi Colinga ca Moyo N’ciyani?
Dziŵani mmene mungakhalile na cimwemwe ceniceni komanso moyo waphindu.
ZOKHUDZA IFE MBONI
Pemphani kuti wa Mboni adzakucezeleni
Kambilanani nkhani ya m’Baibo na Mboni za Yehova, kapena laŵani maphunzilo a Baibo amene timapeleka.
