Kulemekezana m’Banja

LIZANI

CIFUKWA CAKE KULEMEKEZANA M’BANJA N’KOFUNIKA

Kulemekezana m’banja kumapangitsa kuti mukhale mtendele, ndipo amuna, akazi, komanso ana amaona kuti ni osungika.

Buku lakuti The Seven Principles for Making Marriage Work linati okwatilana amene amapatsana ulemu amaonetsana cikondi “osati cabe mwa kucitilana zinthu zikulu-zikulu, koma ngakhale zing’ono-zing’ono tsiku lililonse.”
Kafukufuku aonetsa kuti ana amene amaphunzila kulemekeza ena amadziona moyenela, amakhala pa ubwenzi wabwino na makolo awo, ndiponso savutika kaŵili-kaŵili na matenda a maganizo.

ZIMENE MUNGACITE

Pangani pulani na banja lanu. Coyamba, onetsetsani kuti aliyense akudziŵa zimene “ulemu” umatanthauza. Caciŵili, lembani makhalidwe amene aliyense m’banja ayenela kuonetsa komanso amene ayenela kupewa. Cacitatu, kambilanani za pulaniyo monga banja n’colinga cakuti ana anu komanso inuyo mudziŵe zocita kuti muzionetsa ulemu.

“Mapulani a munthu wakhama amamuthandiza kuti zinthu zimuyendele bwino.”—Miyambo 21:5.

Khalani citsanzo cabwino. Kodi mumakonda kudzudzula a m’banja lanu pa zimene amalakwitsa, kusuliza maganizo awo, kusukulutsa zokamba zawo kapena kuwadula mawu pamene akukamba namwe?

Yesani izi: Muziona kuti ni udindo wanu kupatsa ulemu mnzanu wa mu ukwati komanso ana anu. Muziwalemekeza kaya muona kuti ni oyenela kupatsidwa ulemu kapena ayi.

“Pa nkhani yosonyezana ulemu, muziyamba ndi inuyo.”—Aroma 12:10.

Khalanibe aulemu ngakhale pamene muli ndi maganizo osiyana ndi a munthu winayo. Pamene mufotokoza maganizo anu, pewani kukamba mawu monga akuti, “iwe nthawi zonse umakonda” kapena “iwe sumacita zakuti-zakuti.” Mawu olasa ngati amenewa angakhumudwitse a m’banja mwanu ndipo angapangitse nkhani yaing’ono kukula n’kukhala mkangano.

“Kuyankha modekha kumabweza mkwiyo, koma mawu opweteka amayambitsa mkwiyo.”—Miyambo 15:1.

ZIMENE IFE MBONI TIMACITA

Mboni za Yehova zimalimbikitsa mabanja kumacitilana zinthu mwaulemu. Ndipo pali nkhani zambili zolimbikitsa ulemu m’mabanja m’mabuku, m’mabulosha, m’mavidiyo komanso m’nkhani zina zimene timafalitsa kwaulele.

KWA OKWATILANA: Nkhani zakuti Mfundo Zothandiza Mabanja zingathandize amuna na akazi . . .

kukhala amvetseli abwino
kusasiya kulankhulana akasemphana maganizo
kupewa kukangana

(Fufuzani mawu akuti “Mfundo Zothandiza Mabanja” pa jw.org ku Chichewa)

KWA MAKOLO: Nkhani zakuti Mfundo Zothandiza Mabanja zingathandize makolo kuphunzitsa ana awo . . .

kukhala omvela
kugwila nchito za pa khomo
kukhala aulemu komanso oyamikila

(Fufuzani mawu akuti “Kulera Ana” komanso “Kulera Ana Achinyamata” pa jw.org ku Chichewa)

Onaninso zakumapeto, “Mafunso Amene Makolo Amadzifunsa,” m’buku lakuti Mayankho a Zimene Achinyamata Amafunsa, Buku Loyamba. (Fufuzani mawu akuti “Mafunso Amene Makolo Amadzifunsa” pa jw.org ku Chichewa)

KWA ACINYAMATA: Mbali yakuti Achinyamata pa jw.org ku Chichewa ili na nkhani, mavidiyo komanso zocita zimene zingathandize acinyamata kuti . . .

azigwilizana na makolo komanso ana anzawo m’banja
azikambilana mwaulemu na makolo awo pa nkhani ya malamulo a pabanja
kucita zinthu zopangitsa makolo awo kuwadalila

(Fufuzani mawu akuti “Achinyamata” pa jw.org ku Chichewa)

Webusaiti ya jw.org ni yaulele. Simufunika kulipila ndalama iliyonse, kulembetsa, kapena kukhala membala kuti muiseŵenzetse. Simudzapemphedwa kutumiza zilizonse zokhudza inu.

GALAMUKA!