Mokutala Mingeli enyina ekwavo lya Sesusi etyi eheneye pano pohi. a Onongeleya mbumwe mbumuti Omusukuki Mingeli. Ombimbiliya ipopia okuti etyi Moisesi anyima, Mingeli na Satanasi velipatanene. Tupu ipopia okuti Mingeli wahukululile oandyu ankho yatumwa ondaka komuuli Daniele. (Daniel 10:13, 21; Sunda 9) Enyina Mingeli lihangununa okuti: “Olie welifwa na Huku?” Sesusi watamo umwe okuihanwa enyina olio, mokonda waamena outumini wa Huku, nokulwisa onondyale mbae. — Daniel 12:1; Eholololo 12:7.

 Pahe matutale oityi Sesusi atilwa o Mingeli Alukandyu.

•   Mingeli “alukandyu.” (Sunda 9) Enyina “Alukandyu” lihangununa okuti “onkhalamutwe yonoandyu.” Mo Mbimbiliya livasiwa-mo vala tuvali, iya lipopia vala omunthu wike, ngokuti oandyu ike vala itiwa o “Alukandyu.” Imwe ponovelesikulu ombo, ipopia okuti Tatekulu Sesusi “malauka keulu akaihanena peulu nondaka yo Alukandyu.” (1 Ova Tesalonika 4:16) Sesusi una “ondaka yo Alukandyu” mokonda oe umwe “Alukandyu” Mingeli.

•   Mingeli utumina onoandyu ononyingi. Ombimbiliya yati: “Mingeli nonoandyu mbae avalwisa enyoka enene” Satanasi. (Eholololo 12:7) Ombimbiliya ipopia okuti Mingeli o ‘umwe povatumini ovanene vali,’ ‘omutumini omunene’ utumina onoandyu ononyingi. (Daniel 10:13, 21; 12:1) Omukulu umwe wokuatanga unene utiwa o David E. Aune, wapopia okuti enyina olio Mingeli atumbulwa lilekesa okuti “omutumini wonoandyu.”

   Ombimbiliya ipopia vala omunthu wike wapakwa kokutumina onoandyu. Yapopia okuti “Tatekulu Sesusi pokuhololoka kwae, matundu keulu, meya no noandyu mbae mbononkhono, momutemo wotupia, pokweeta onyengo ku ava vehei Huku.” (2 Ova Tesalonika 1:7, 8; Mateusi 16:27) Tupu ipopia okuti etyi Sesusi “aya no keulu, onoandyu mbapakwa kolutei lwae.” (1 Petulu 3:21, 22) Huku ñgeno kapakele ovanthu vevali avelinane kokutumina onoandyu. Naina tyaviuka umwe okuti Sesusi oe o Mingeli.

•   “Mingeli makakatuka” pononthiki “mbokuhuka-huka.” (Daniel 12:1) Momukanda wa Daniel, ondaka “okukatuka” haunene ipopia ohamba ikatuka opo ilinge otyipuka tyimwe otyinene. (Daniel 11:2-4, 21) Sesusi Kilisitu, tupu utiwa “Ondaka ya Huku,” “Ohamba yonohamba” mokonda manyimiko onondyale mba Huku ambuho, aamena ovanthu va Huku. (Eholololo 19:11-16) Otyo metyilingi “mononkhumbi ononene, mbehenemoneke-ko tunde konthyimbi youye.” — Mateusi 24:21, 42.