Yoo, kouye kuna umwe Eliapu. Ngwe “omutumini wouye,” ankho oandyu imwe ikahi nawa, mahi ailityitula oandyu ondingavivi, aityitukilapo Huku. (Suau 14:30; Ova Efesu 6:11, 12) Ombimbiliya ipopia etyi Eliapu likahi, limutumbula omanyina aa:

•   Satanasi, lipunguhuna okuti “Ondyale.” — Jó 1:6.

•   Eliapu, lipunguhuna okuti “Omutendeleyi.” — Eholololo 12:9.

•   Onyoka, Ombimbiliya imupopia ngotyo mokonda “Uyondya.” — 2 Ova Kolindu 11:3.

•   Omuyondyi. — Mateusi 4:3.

•   Onkhembi. — Suau 8:44.

Hatyipuka tyili momutima wetu tyituhindila ovivi

 Ovanthu vamwe vati Eliapu otyipuka tyimwe tyili momitima viovanthu tyivehindila okulinga ovivi. Mahi Ombimbiliya ipopia etyi Huku apopile na Satanasi. Huku utupu onkhali, naina ankho kekahi nokupopia notyipuka tyimwe otyivi tyili mokati kae, mokonda mokati kae mutupu otyivi. (Deuteronômio 32:4; Jó 2:1-6) Tupu Satanasi wahandele okuyondya Sesusi, nae wehena onkhali. (Mateusi 4:8-10; 1 Suau 3:5) Naina Ombimbiliya ilekesa umwe nawa okuti kouye kuna umwe Eliapu, hatyipuka-ko tyili mokati kovanthu tyivehindila okulinga ovivi.

 Katyituhuvisa okutala okuti ovanthu ovanyingi kavetavela okuti kouye kuna Eliapu, mokonda Ombimbiliya ipopia okuti Satanasi ulinga ovipuka ovinyingi opo ayondye ovanthu. (2 Ova Tesalonika 2:9, 10) Otyipuka tyimwe alinga okupaka momitima viovanthu olusoke lwokuti kouye kutupu Satanasi. — 2 Ova Kolindu 4:4.

  Omatutu: Lucifer enyina ekuavo lya Satanasi.

 Otyili: Ondaka yo Hembeleu mono Mbimbiliya ononyingi yapopiwa okuti “Lucifer,” ihangununa “una uliaima.” (Isaías 14:12) Ine utanga okapitulu katyo akeho momono okuti ondaka oyo ipopia onohamba ankho mbutumina mo Mbambilonia, Huku embuhanyako mokonda ankho mbulipakako. (Isaías 14:4, 13-20) Ondaka “una uliaima” yapopiwa pala okukuela aveho vokuatuka mohamba yo Mbambilonia etyi yateyua-po.

  Omatutu: Satanasi uundapela Huku opo amonese ononkhumbi vana Huku emutuma.

 Otyili: Eliapu ondyale ya Huku, hamuundapi wae-ko. Satanasi Eliapu uyele vana vafenda Huku, tupu uvetendeleya. — 1 Petulu 5:8; Eholololo 12:10.