Ovalie Mavaende Keulu?
Ekumbululo lyo Mbimbiliya
Pena ovanthu vamwe Huku akoya mavakakala keulu. Ovanthu ovo nga vanyima, Huku uvetutilisa avaende keulu. (1 Petulu 1:3, 4) Ine ovanthu ovo vahimbika okulinga ovipuka vinumanesa Huku opo kavaende vali keulu. — Ova Efesu 5:5; Ova Filipu 3:12-14.
Vana mavaende keulu mavakalingako-tyi?
Mavakatumina na Sesusi avatumina omanima 1000. (Eholololo 5:9, 10; 20:6) Ombimbiliya momukanda wa 2 Petulu 3:13 upopia “omaulu omape nohi omphe.” Omaulu omape o Sesusi na ava vokuakoyua na Huku vakatumine nae. Mavakaviukisa eheke alikala umwe ngetyi Huku elihandelele potete. Ohi omphe ovanthu vana vekahi nawa mavakakala pano pohi. — Isaías 65:17.
Ovanthu veñgapi mavatutiliswa avaende keulu?
Ombimbiliya ipopia okuti ovanthu mavatutiliswa avaende keulu vena 144.000. (Eholololo 7:4) Momukanda Eholololo 14:1-3, apositolu Suau wamona “Ondyona itai Komphunda Siau, kumwe novanthu 144.000.” “Ondyona” o Sesusi etyi atutiliswa. (Suau 1:29; 1 Petulu 1:19) “Omphunda Siau” otyilinga Sesusi novo 144.000 vena tyokutumina. — Salmo 2:6; Ova Hebeleu 12:22.
Ava “vaholovonwa” vakatumine na Sesusi keulu, Ombimbiliya iveti o “votyunda otyitutu.” (Eholololo 17:14; Luka 12:32) Otyo tyilekesa okuti ponongi mba Sesusi o vamwe vala mavaende keulu. — Suau 10:16.
Omalusoke apenga ovanthu vena konthele yokuenda keulu
Omatutu: Ovanthu aveho vokulinga oviwa mavaende keulu.
Otyili: Huku wati ovanthu vokulinga oviwa mavakakala apeho pano pohi. — Salmo 37:11, 29, 34.
Sesusi wati: “Nawike unelonde keulu.” (Suau 3:13) Onondaka ombo mbuhanda okutiwi? Ovanthu vokualingile evi vihambukiswa Huku vakaleleko etyi Sesusi eheneye pano pohi kavaile keulu, vakevelela onthiki mavakatutiliswa avakala pano pohi. Vamwe povanthu ovo o Ambalayau na Moisesi na Sobe na Daviti. (Ovilinga 2:29, 34) Mahi no ngootyo, ngwe ankho vayumbako onthumbi okuti mavakatutila mouye omupe pano pohi. — Jó 14:13-15.
Ombimbiliya ipopia okuti vana mavaende keulu ovo “mavatetekela okututila.” (Eholololo 20:6) Otyo tyilekesa makukala vali etutilo ekwavo, lya ava mavakakala pano pohi.
Ombimbiliya ipopia okuti tyina Sesusi novo 144.000 vamatumina “ononkhia kamambukakala-ko vali.” (Eholololo 21:3, 4) Okuti keulu kunkhiwa? Onondaka ombo mbupopia umwe vala etyi matyikalingwa pano pohi.
Omatutu: Omunthu oe muene ukoya ine maende keulu ine makala pano pohi.
Otyili: Huku oe ukoya ovalie mavakapewa ‘ondyambi yokuenda keulu.’ (Ova Filipu 3:14) Tyipondola hamwe omunthu uhanda umwe okuenda keulu, mahi otyo katyitei kwe, tyitei ku Huku. — Mateusi 20:20-23.
Omatutu: Okuti ovanthu mavakakala umwe vala pano pohi hatyiwako-ale. Nkhuali mapesala umwe vala vana vahatele-mo okuenda keulu.
Otyili: Ava mavakakala pano pohi Huku weveti “ovanthu vae aholovona.” (Isaías 65:21-23) Ponthyimbi Huku wahandele ohi ihiwe nawa, ovanthu avakala-mo apeho. Ava mavakakala pano pohi otyo mavakala ngotyo. — Gênesis 1:28; Salmo 115:16; Isaías 45:18.
Omatutu: Tyokuti ovanthu mavakakala keulu vena vala 144.000 otyipopio vala.
Otyili: Pamwe Ombimbiliya ipopia ombalulo imwe, mahi muene naina ikahi nokupopia otyipuka otyikuavo. Ipopia “omanyina 12 ono apositolu 12 Mbondyona.” (Eholololo 21:14) Pahe matupopi ovipuka vimwe vilekesa umwe okuti ombalulo 144.000 ipopia umwe apa pelifwe ovanthu mavakakala keulu.
Omukanda Eholololo 7:4 upopia “ombalulo ya vana vapakwa enyingilikilo [vana mavakakala keulu] vena 144.000.” Pahe Eholololo 7:9, 10, ipopia “ovanthu ovanyingi-nyingi vehena nawike uvevila okuvevalula.” Ovanthu ovo navo mavakahupa. a
Pahe soka: Ine ombalulo 144.000 otyipopio vala hapoko-ale pelifwe ovanthu mavaende keulu, opo oityi kwapopilwa vali onthumbo yovanthu vehevilwa okuvalulwa?Tupu omukanda Eholololo wapopia okuti vo 144.000 “valandwa povanthu iya vekahi ngatyina ovinyango vyo tete.” (Eholololo 14:4) Ondaka oyo “ovinyango vyo tete” ilekesa okuti pena vali evi viesala-po. Onondaka ombo mbupopia vana mavakatumina na Sesusi keulu. Ava mavakakala pano pohi ovanyingi vali kuvo. — Eholololo 5:10.
a Omunongo umwe utiwa Robert L. Thomas wapopia ombalulo yovo 144.000 yapopiwa momukanda Eholololo 7:4. Wati: “Ombalulo oyo hatyipopio-ko vala, opo umwe pelifwe ovanthu mavaende keulu mokonda ovelesikulu 9 ipopia okuti pena vali onthumbo yovanthu vehevilwa okuvalula. Ine ombalulo oyo yo 144.000 ipopia otyipuka otyikwavo, opo naina ambuho onombalulo mbuli momukanda Eholololo mbuna etyi mbupopia.” — Eholololo 1 – 7 An Exegetical Commentary, pefo 474.
Hamwe Noove Uhanda
ESSENTIAL BIBLE TEACHINGS
Ouhamba wa Huku Oityi?
Etyi Sesusi ali pano pohi walongesile vali unene konthele Youhamba wa Huku tyipona ovipuka ovikuavo. Momanima omanyingi ovanthu velikuambela opo Ouhamba wae uye.
OKAMBANYA OKANENE
Hetekela Okulongeswa Ombimbiliya
Ovola ou mamulilongesa nae Ombimbiliya mekulongesa vala otyali.