Au, ohi kamaihanyua-po, nii kamaiyokwa-po. Ombimbiliya ilongesa okuti Huku watunga ohi opo ovanthu vakale-mo apeho.

•   “Vokulinga evi viaviuka mavakapiñgana ohi, Avakakala-ko apeho.” — Salmo 37:29.

•   “[Huku] ohi weipumphika komalisesu ayo. Apa ili opo vala, kamaihondovolwa-po.” — Salmo 104:5.

•   “Ohi ikala-ko apeho.” — Eclesiastes 1:4.

•   “Una watunga ohi, Omutungi wayo, weiika-po, . . . keitungile opo ikale vala ngotyo, mahi weitunga opo ikalwe.” — Isaías 45:18.

 Namphila ovanthu hono veli nokusilisa ohi, valwa unene, valinga ovipuka ovikwavo vali, Huku kameveyeke vahanye-ko ohi. Ombimbiliya ilongesa okuti, Huku “mahanye-ko vana vahanya ohi.” (Eholololo 11:18) Mahi metyilingi ñgeni?

 Huku makapola-ko ovanthu aveho veli nokutumina, apake-ko Ouhamba wae. (Daniel 2:44; Mateusi 6:9, 10) Matumina Mouhamba watyo oo, Omona wae Sesusi Kilisitu. (Isaías 9:6, 7) Etyi Sesusi ali pano pohi walingile ovipuka ovinyingi vihuvisa, vilekesa okuti utyivila okutyika onomphepo ononene, novinimawe, novipuka ovikwavo vali vipondola okunyona eheke. (Maluku 4:35-41) Tyina amahimbika okutumina pano pohi, mayungu nawa ohi novipuka aviho vili-mo. Maviukisa ohi aikehiwa unene ngetyi yali etyi Huku eitunga. — Mateusi 19:28; Luka 23:43.

 Au, hatyoko. Ovanthu vanoñgonoka vala omapita etyi tyipopia 2 Petulu 3:7, yokwati: “Omaulu nohi vikahi-ko pehepano viapakelwa otupia.” Tutalei ovipuka vivali mavitukuatesako okunoñgonoka nawa onondaka ombo:

1.   Tyina Ombimbiliya iti “eulu,” “ohi,” “otupia” pamwe ili nokupopia ovipuka ovikwavo. Omukanda wa Gênesis 11:1 upopia okuti: “Ohi aiho ankho ipopia vala elaka like.” Movelesikulu oyo ondaka “ohi,” ikahi nokupopia ovanthu.

2.   Onovelesiku ononkhuavo mba 2 Petulu 3:7 mbutukuatesako okunoñgonoka oityi onondaka ombo, eulu, nohi, notupia mbupopia. Ovelesikulu 5 no 6 mbupopia Ombila Onene yalokele pononthiki mba Noe. Ouye wahanyenwe-ko, mahi ohi aihahanyua-ko. Ouye wapopiwa movelesikulu omu wahanyenwe-ko Nombila Onene, ovanthu ankho valinga ovivi. (Gênesis 6:11) Ombimbiliya tupu yapopia okuti Ombila Onene yahanyene-ko “eulu.” Eulu liatyo olio, ovanthu ankho vatumina pomuvo pana. Ovanthu ovo vokulinga ovivi ovo vahanyenwe-ko, ohi kayahanyenwe-ko. Noe nombunga yae vahupile. — Gênesis 8:15-18.

 Naina 2 Petulu 3:7 tyina ipopia otupia, kaikahi nokupopia Ohi, mahi ipopia ovanthu onondingavivi mavakahanyua-ko, ngetyi Ombila Onene yahanyene-ko ovanthu vokulinga ovipuka ovivi. Huku wapopia okuti maeta “omaulu omape nohi omphe” omu mamukakala vala etyi tyaviuka. (2 Petulu 3:13) “Ohi omphe” yapopiwa movelesikulu omu, ovanthu mavakakala pano pohi, mavakatuminwa “neulu epe.” ‘Eulu olio epe’ Ouhamba wa Huku maukaviukisa ohi, aikala ongwa, amukakala vala ombembwa. — Eholololo 21:1-4.