Ovanthu ovanyingi velilinga epulo olio, ovo vana vasiwapo novavo, vahanda omakumbululo nokuungumaneswa. Mokonda yovanthu ovanyingi-nyingi vaipawa, ovanthu vamwe kavayumbu vali onthumbi mu Huku.

 Omatutu: Tyapenga okupula omokonda yatyi Huku ayekelele ovanthu ovanyingi vaipawe.

 Otyili: Ovanthu ovanyingi vayumba onthumbi mu Huku, navo velipulile-ale omokonda yatyi Huku ayekelako ononkhumbi. Omuuli Habakuke wapulile Huku okuti: “Omokonda yatyi uyekela ndyitale ovivi? Omokonda yatyi uyekelela-ko onya?” (Habacuque 1:3) Huku ahakandukila Habakuke mahi atumu omapulo oo ahonekwe mo Mbimbiliya opo ovanthu aveho veetange.

 Omatutu: Huku kesukile-ale nononkhumbi ovanthu vamona.

 Otyili: Huku uyele ovivi, nononkhumbi. (Provérbios 6:16-19) Pononthiki mba Noe, etyi Huku amona okuti ovivi vilinga ovanthu ovinene, “atyimwihama komutima.” (Gênesis 6:5, 6) Tupu tyina Huku amona ovanthu ovanyingi-nyingi vaipawa tyimuihama unene. — Malaquias 3:6.

 Omatutu: Huku wayekele ovanthu ovanyingi vaipawe, opo atyepeseko ova Sundeu.

 Otyili: Tyili Huku wayekele o Selusalei ihanyuepo nova Loma kotyita tyo tete. (Mateusi 23:37–24:2) Tunde pomuvo opo, Huku kakoyo ovanthu vamwe opo evemonese emone, ovakuavo evepande. Ku Huku, ‘omu Sundeu nomu Geleku otyipuka tyike vala.’ — Ova Loma 10:12.

 Omatutu: Ine mouye muali Huku una okankhenda, nononkhono ñgeno kayekele ovanthu ovanyingi-nyingi vaipawe.

 Otyili: Huku haeko weeta-ko ononkhumbi, mahi pamwe umbuyekelako omuvo umwe. — Tiaku 1:13; 5:11.

 Huku wayekele ovanthu ovanyingi-nyingi vaipawe ngetyi tupu eli nokuyekelako ononkhumbi mbovanthu aveho. Wetyilinga na atetulule ondaka imwe yapopiwa kohale. Ombimbiliya ipopia okuti ou ukahi nokutumina ouye o Satanasi ha Huku-ko. (Luka 4:1, 2, 6; Suau 12:31) Tala ovipuka vivali vipopia omokonda yatyi Huku ayekelele ovanthu ovanyingi-nyingi vaipawe.

1.   Huku watunga ovanthu opo mwene velikoyele etyi vahanda okulinga. Huku wapopilile ovo Andau na Eva ovipuka ankho vena okulinga, mahi ehevekuluminya vemutavele. Pahe ngwe avakoyo okulinga etyi vahanda, avalingi otyipuka tyapenga. Mokonda yotyo vakoya avelietela ovitateka ovinene, tupu na hono ovanthu velietela ovitateka mokonda yovipuka vakoya okulinga. (Gênesis 2:17; 3:6; Ova Loma 5:12) Omukanda umwe utiwa Declaração dos Princípios do Judaísmo Conservador wati: “Ononkhumbi ononyingi ovanthu vehole okumona, mbutuka kovipuka mwene vakoya okulinga.” Huku wayeka ovanthu velikoyele etyi vahanda okulinga, opo vatetulule ovitateka viavo tyihevekuatesako.

2.   Huku uvila okumanako ononkhumbi mba vana vaipaelwa vavo, iya mekembumana-ko umwe. Huku wapopia okuti makatutilisa ovanthu ovanyingi vokuanyima, atee umwe na vana vaipaelwe. Tupu Huku makamana-ko oluihamo ovanthu vakala nalo tyina vasoka kovavo vaipawa. (Isaías 65:17; Ovilinga 24:15) Otyipuka Huku ehole ovanthu, otyo tyitukalesa nonthumbi yokuti etyi apopia meya okutyilinga. — Suau 3:16.

 Ovanthu ovanyingi vokwahupile, vayumba onthumbi mu Huku, tupu vanoñgonoka oityi Huku ayekelela-ko ononkhumbi netyi meya okulinga embumaneko.