Omomukanda wa Levitiku vala Ombimbiliya yapopia etyi tyayemba kokulinthinda molutu. Levítico 19:28, yati: “Wehelinthinde molutu.” Huku wailikile ova Isilayeli opo vehelinthinde molutu, otyipuka otyo inkha tyiveimbukisa kovanthu vana ankho vakala navo vokulinthinda molutu ovipuka vilekesa omanyina ovihuku viavo. (Deuteronômio 14:2) Namphila Ovakilisitau hono vahapelwe Otyitumino otyo, mahi otyiwa okusoka omokonda yatyi otyitumino otyo tyahindilwa.

Okuti Ovakilisitau vapondola okulinthinda molutu?

 Ono tesitu ombu pombwelo mbutukwatesa-ko okusoka nawa ine otyiwa okulinthinda molutu:

•   “Ovakai velihiwiswe mokuvala nawa . . . monkhalelo yaviuka.” (1 Timotiu 2:9) Ovelesikulu ei ipopia umwe aveho ovalume novakai. Onthwe twesukisa okukala nonthilo na vakwetu atuhasoko vala mwene kwoonthwe.

•   Vamwe velinthinda molutu opo velilekese, ovakwavo velinthinda opo valekese okuti mweene atyiho tyitei vala kuvo vapondola okulinga olutu lwavo ngeetyi mwene vahanda. Mahi, Ombimbiliya ipopila ovakilisitau okuti: “avei omalutu enyi ngotyilikutila tyina omuenyo, tyasukuka, tyitavelwa na Huku, ngotyo mamuumbila Huku nonondunge mbenyi ambuho.” (Ova Loma 12:1) Undapesa “onondunge ambuho” opo unoñgonoke mokonda yatyi tyapenga okulinthinda molutu. Ine ulinthinda molutu mokonda tyili vala momota ine hamwe omokonda uhetekela otyikwindyi tyimwe, mahi noñgonoka okuti okulinthinda molutu tyipwiya okulihanyuna-tyo. Okusoka umwe nawa omokonda yatyi mohandela okulinthinda tyipondola okukukwatesako okulinga etyi tyikahi nawa. — Provérbios 4:7.

•   “Omunthu wombili upanga ovipuka mavimuetela ouwa, mahi vana vatumphuluka vala, tyotyili velitwala koluhepo.” (Provérbios 21:5) Ovanthu vamwe vetyilinga umwe vala tyahasokele, mahi otyo tyipondola okumweetela ovitateka pokwovola ovilinga nokukala nomapanga. Tupu okutyinyima-po tyiihama unene tupu pafetelwa onombongo ononyingi. Ovanongo vapopia okuti — ovanthu ovanyingi vokwanthindailwe velivela umwe unene mokonda yetyi valinga.