Mo Mbimbiliya ondaka yapitiyua okuti “etutilo” mo Ngeleku anástasis, ihangununa “okupindulwa-po” ine “okukatuka vali.” Putyina omunthu umwe atutiliswa upindulwa-po povokuankhia akala umwe ngetyi ankho ali-ale. — 1 Ova Kolindu 15:12, 13.

 Ondaka “etutilo” movihonekwa vyo Hebraiku tupu viihanwa okuti Velho Testamento kaivasiwa-mo, muvasiwa vala ondongeso yatyo.Tutyimona umwe nawa tyina tutala onondaka Huku apopilile omuuli Oseias mbati: “Mandyikeveyovola kononkhono Mbondyembo. Mandyikeveyovola kononkhia.” — Oséias 13:14; Jó 14:13-15; Isaías 26:19; Daniel 12:2, 13.

 Ovanthu mavakatutiliswa mavakakala-pi? Vamwe mavakatutiliswa avakakala keulu opo vakatumine na Kilisitu. (2 Ova Kolindu 5:1; Eholololo 5:9, 10) Ombimbiliya ipopia okuti olio “etutilo liotete,” olio “malitetekela.” Onondaka ombo mbulekesa okuti kuna vali etutilo ekuavo. (Eholololo 20:6; Ova Filipu 3:11) Etutilo lya vali, malietela ouwa ovanthu aveho mavakakala pano pohi. — Salmo 37:29.

 Oñgeni ovanthu mavakatutiliswa? Sesusi kononkhono mba Huku makapindula-po vokuanyima. (Suau 11:25) Sesusi makatutilisa umwe “aveho vana vekahi momalangalo mehinangelo lya Huku.” Munthu-na-munthu makakala umwe ngetyi ankho ekahi, makahinangela evi ankho alinga etyi ehenenyime. (Suau 5:28, 29) Vana mavakakala keulu mavakatutiliswa nolutu lwopasipilitu, mahi vana mavakakala pano pohi mavakatutiliswa nolutu olupe lwakongoka nawa. — Isaías 33:24; 35:5, 6; 1 Ova Kolindu 15:42-44, 50.

 Ovalie mavakatutiliswa? Ombimbiliya ipopia okuti “makukakala etutilo liovaviuki na vana vehevaviuki.” (Ovilinga 24:15) Ovaviuki ovanthu vana ovakuatyili ngetyi o Noe, na Sara, na Ambalayau. (Gênesis 6:9; Ova Hebeleu 11:11; Tiaku 2:21) Vehevaviuki ovo vana vahaendelele movitumino vya Siovaa mokonda ankho kavemwii ine ankho nawike wevelongesile.

 Mahi vana valingila tyawina ovivi otyo vehelivele kamavakatutiliswa. Ovanthu ovo nga vankhia, ngotyo tyapua umwe, vanyima-ko vetupu vali ekevelelo liokukatutiliswa. — Mateusi 23:33; Ova Hebeleu 10:26, 27.

 Onalupi vokuanyima mavakatutiliswa? Ombimbiliya ipopia okuti etutilo lya vana mavaende keulu ankho malikahimbika putyina Sesusi ameya, ngwe weya mo 1914. (1 Ova Kolindu 15:21-23.) Iya etutilo lya vana mavakakala pano pohi malikahimbika mokueenda kuoutumini wa Sesusi Kilisitu mouye omupe. — Luka 23:43; Eholololo 20:6, 12, 13.

 Omokonda yatyi tyaviukila okutavela okuti makukakala etutilo? Ombimbiliya ipopia ovanthu etyive vatutilisilwe. Ovanthu ovanyingi vetyimuene umwe tyina vatutiliswa. (1 Reis 17:17-24; 2 Reis 4:32-37; 13:20, 21; Luka 7:11-17; 8:40-56; Suau 11:38-44; Ovilinga 9:36-42; Ovilinga 20:7-12; 1 Ova Kolindu 15:3-6.) Etulilo lya Lasalu olio liiwe vali unene, mokonda etyi anyima wakalele ononthiki ononkhuana iya Sesusi emututilisila umwe pokati kovanthu ovanyingi. (Suau 11:39, 42) Nonondyale mba Sesusi mbetyimuene umwe okuti Lasalu watutiliswa, otyo ankho vahandelele okuipaa Sesusi na Lasalu yatyo. — Suau 11:47, 53; 12:9-11.

 Ombimbiliya ipopia okuti Huku una epondolo liokututilisa vokuanyima iya uhanda umwe okutyilinga. Huku uhinangela ovanthu aveho vokuanyima, wii umwe nawa etyi omunthu ankho ekahi iya kononkhono mbae ononene, mekevetutilisa. (Jó 37:23; Mateusi 10:30; Luka 20:37, 38) Huku utyivila okupindula-po vokuanyima iya uhanda umwe okutyilinga! Tyina Ombimbiliya ipopia etutilo malikalingwa komutwe wandyila, ipopia okuti Huku: “Mekeivaluka ovilinga vyo pomavoko ae.” — Jó 14:15.

Omatutu konthele yetutilo

 Omatutu: Etutilo ohande ikondoka vali momunthu.

 Otyili: Ombimbiliya ilongesa okuti ohande omunthu watyo muene hatyipuka-ko tyitunda momunthu nga anyima. (Gênesis 2:7, okatoi; Ezequiel 18:4) Naina etutilo ha kukondola-ko ohande momunthu, mahi okupindula-po omunthu watyo umwe ankho wanyima.

 Omatutu: Ovanthu vamwe mavakatutiliswa, mahi liwa-liwa avahanyua-ko vali.

 Otyili: Ombimbiliya ipopia okuti “vana valinga ovipuka ovivi” mavakapindulwa-po “pala ekoyeso.” (Suau 5:29) Otyo tyilekesa okuti ovanthu mavakakoyeswa okutalela kovipuka mavakalinga tyina vamatutiliswa, ha mokonda ya vina valingaile puetyi vehenenyime. Sesusi wati: “Vokuankhia mavekeiva ondaka Yomona wa Huku, vana vamatehelela nawa mavakakala nomuenyo.” (Suau 5:25) Vana ‘mavakatehelela nawa’ ine maveketavela etyi mavakalongeswa putyina vamatutiliswa, omanyina avo maakahonekwa ‘mombuingwa yomuenyo.’ — Eholololo 20:12, 13.

 Omatutu: Tyina omunthu amatutiliswa upewa umwe olutu lwae lwo kohale.

 Otyili: Omunthu nga anyima olutu lwae lukondoka meheke, aluhanyauka umwe. — Eclesiastes 3:19, 20.