Mombimbiliya apa pena ondaka nephesh yelaka lyo Hembeleu nondaka psykhe yelaka lyo Ngeleku, ngotyo “ohande.” Ondaka yo Hembeleu ipopia “otyipuka tyifima,” iya ondaka yo Ngeleku ipopia “otyipuka tyienda-enda.” a Naina ohande hatyipuka-ko tyitunda momunthu, mahi omunthu watyo. Tutalei oñgeni Ombimbiliya ipopia umwe nawa okuti ohande omunthu:

•   Onombimbiliya ononyingi tyina mbupopia ondaka nephesh nondaka psykhe mbupopia “ohande,” “nomwenyo,” “nomunthu,” “netyi tyina omwenyo,” “nolutu.” Ombimbiliya ipopia okuti etyi Siovaa Huku atunga omulume wotete Andau, “omulume akala ohande ina omwenyo.” (Gênesis 2:7) Andau kapelwe ohande, mahi mwene Andau yatyo ankho oe ohande.

•   Ombimbiliya ipopia okuti ohande ilia, yuundapa, iiva ondyala, itavela ovitumino. (Levítico 5:2; 7:20; 23:30; Deuteronômio 12:20; Ova Loma 13:1) Tyilinga vala ovipuka ovio omunthu, mokonda omunthu una olutu, utyivila okusoka.

Okuti ohande kainkhi?

 Au, ohande inkhia. Onovelesikulu ononyingi mbo Mbimbiliya mbupopia okuti ohande inkhia. Tutalei mbumwe:

•   “Ohande ilinga onkhali, oyo mainkhi.” — Ezequiel 18:4, 20.

•   Kohale mo Isilayeli, omunthu ulinga etyi tyapenga unene, ankho vati “ohande yae ina okutetwa.” (Êxodo 12:15, 19; Levítico 7:20, 21, 27; 19:8; Versão Rei Jaime) Omunthu watyo ankho “una okuiipawa.” — Êxodo 31:14,Versão Rei Jaime.

•   Onovelesikulu mbumwe Mbombimbiliya tyina mbupopia otyivimbi mbuti “ohande yankhia.” (Levítico 21:11, okatoi; Números 6:6, okatoi) Namphila Onombimbiliya ononyingi ponovelesikulu ombu mbuti “otyivimbi” oo “omunthu wankhia,” mahi mwene-mwene ankho melaka lyo Hembeleu pena ondaka nephesh, iti “ohande.”

“Ohande” oyo vala “omwenyo”

 Ombimbiliya pamwe tyina iti “ohande” ngotyo ili nokupopia “omwenyo.” Momukanda wa Jó 33:22 tuvasa-mo ondaka “ohande” (nephesh), mahi mwene ili nokupopia “omwenyo.” Tupu Ombimbiliya pamwe iti tupondola okuvombesa ohande, ngotyo ili nokupopia okuti tupondola okuvombesa omwenyo. — Êxodo 4:19; Juízes 9:17; Ova Filipu 2:30.

 Onotesitu ombu twamona mbupopia “ohande,” mbutukuatesako okunoñgonoka etyi tyihanda okupopia onotesitu ononkhuavo mbupopia okuti ohande “yatunda” momunthu. (Gênesis 35:18; Versão Rei Jaime) Otesitu ei ihanda vala okupopia okuti omunthu uli nokuyeka omwenyo. Mono Mbimbiliya mbumwe onondaka mbuli momukanda wa Gênesis 35:18 vembupitya okuti, “wamana omwenyo.” — Bíblia na Linguagem de Hoje; Missionários Capuchinhos.

Naina tyokuti ohande kainkhi tyatuka-pi?

 Onongeleya mbokulongesa okuti ohande kainkhi, otyipuka otyo vetyipola momalongeso ovanthu vokuatanga unene ankho vakala ko Ngelesia. Omukanda umwe wati: “Ohande otyetyi tyifima, hatyipuka-ko tyitunda molutu. Onongeleya mbokupopia okuti ohande otyipuka tyitunda molutu, otyipuka otyo vetyipola momalongeso ovanthu ankho vakala ko Ngelesia.”

 Huku uyele ondongeso oyo yokuti ohande kainkhi. Otyo Ombimbiliya itulondolela okuti: “Lungukei opo pahamoneke nawike umukalesa ovapika nondongeso nomalusoke omatutu apopia oviso viovanthu.” — Ova Kolosu 2:8.