Onkhali okulinga otyipuka oo hamwe okusoka okulinga otyipuka tyimwe tyiliponya netyi Huku ahanda. Omunthu wokulinga onkhali uliatela kovitumino vya Huku, ulinga etyi tyapenga, tyahaviukile komaiho a Huku. (1 Suau 3:4; 5:17) Ombimbiliya tupu ipopia okuti okwahalingi etyi twii okuti otyo tyaviuka, natyo onkhali. — Tiaku 4:17.

 Momalaka Ombimbiliya yahonekwa tete, ondaka onkhali ipopia “okuponya.” Motyilongo tyo Isilayeli kohale, ovakwavita ankho vetyivila okutonga omamanya avahaponyo. Melaka liokonthuko ngotyo okuti “vetyivila okutonga omamanya avahalingi onkhali.” (Juízes 20:16) Naina okulinga onkhali, okuponya movitumino vya Huku.

 Mokonda Huku oe watunga ovanthu, oe umwe una okutupopila etyi tuna okulinga netyi twahapondola okulinga. (Eholololo 4:11) Meketwongela omphela mokonda yetyi tulinga. — Ova Loma 14:12.

Tyitavela umwe omunthu okwahalingi onkhali?

 Au, katyitavela. Ombimbiliya yati “aveho ovakuankhali, kavalekesa nawa omunkhima wa Huku.” (Ova Loma 3:23; 1 Reis 8:46; Eclesiastes 7:20; 1 Suau 1:8) Omokonda yatyi?

 Ovanthu votete, ovo Andau na Eva, ankho kavalingi onkhali, mokonda etyi Huku evetunga ankho vetupu onkhali, ankho vatungwa otyifwika tya Huku. (Gênesis 1:27) Mahi mokonda kavetavelele ku Huku, avakala ovakwankhali. (Gênesis 3:5, 6, 17-19) Pahe onkhali oyo aveiyambulisa movana vavo, ngatyina ouvela uliyambuliswa. (Romanos 5:12) Ongetyi tyapopile ohamba Daviti yo ko Isilayeli, watile: “Ame natyitwa-le nombei yonkhali.” — Salmo 51:5.

Okuti kuna ononkhali ononene vali kononkhuavo?

 Eenga kuna. Ombimbiliya ipopia okuti ovanthu voko tyilongo ankho tyitiwa o Sondoma “vali unene ovakalavi, ankho valinga ononkhali ononene.” (Gênesis 13:13; 18:20) Tutalei ovipuka vitatu vipopia umwe nawa otyipuka otyo tyokuti ononkhali mbumwe ononene vali kononkhuavo.

1.   Ononkhali mbatyo. Ombimbiliya ipopia okuti katupondola okulinga ononkhali ononene, ngetyi okulinga ovinepo viasila, nokufenda ovilolo, nokuvaka, nokunwa unene, nokupunda viaamwene, nokuiipaa, nokulipaka momatambu. (1 Ova Kolindu 6:9-11; Eholololo 21:8) Ombimbiliya ilekesa okuti ononkhali ombo ononene, mbelikalela nokulinga otyipuka oo okupopia otyipuka tyahasokele tyinumanesa vakwetu. (Provérbios 12:18; Ova Efesu 4:31, 32) Mahi Ombimbiliya ilongesa okuti ine twalinga otyipuka tyimwe tyapenga, katupondola vala okwehesuku natyo, mokonda tyipondola okututuala kokulinga ononkhali ononene. — Mateusi 5:27, 28.

2.   Etyi tyitutuala kokulinga onkhali. Ovanthu vamwe valinga tupu onkhali, omokonda kavei ovitumino vya Huku. (Ovilinga 17:30; 1 Timotiu 1:13) Hakuti ngotyo vetupu etyi valinga, mahi tyelikalela nomunthu wii umwe ovitumino vya Huku, ehevitavela. (Números 15:30, 31) Omunthu wokulinga onkhali tyawina, omutima wae o “wovivi.” — Jeremias 16:12.

3.   Tuñgapi yalingwa. Ombimbiliya ilekesa okuti okulinga onkhali like, nokukalela vala okuilinga, tyelikalela. (1 Suau 3:4-8) Huku uyele omunthu wii umwe okuti tyaviuka otyeti, mahi no ngotyo alingi ovivi. — Ova Hebeleu 10:26, 27.

 Vana vokualinga ononkhali ononene vapondola okulivela unene onombei mokonda yovipuka ovivi valinga. Tala vala etyi tyapopile Ohamba Daviti etyi alinga onkhali, wati: “Ononkhali mbange mbutangelela keulu liomutwe wange, ngomutyindo walema unene nehevili okutyinda.” (Salmo 38:4) Ombimbiliya ipopia okuti: “Ondingavivi ayeke-po ondyila yae, wokulinga ovivi ayeke-po omalusoke ae. Akondoke ku Siovaa, ku una memulingila onkhenda, akondoke ku Huku yetu, mokonda maevela nomutima auho.” — Isaías 55:7.