Okuevela tyihangununa okuhesuku vali notyivi omunthu ekulinga. Mombimbiliya, ondaka yo Ngeleku yapitiyua “okuevela” ihangununa “tyikahi ine tyikale-po,” ongatyina una ongele yomunthu umwe upopila okuti wahafete vali ongele ikale. Sesusi wapopia monkhalelo yelifwa no oyo etyi alongesa ovalongwa vae okulikuambela, okuti: “Tuevele-vo ononkhali mbetu, ngetyi no onthue tuevela vana vetulinga omapita.” (Luka 11:4) Tupu, mongeleka alinga yomupika ankho uhahande okuevela, Sesusi waeleka okuevela omunthu wati ongele yae ikale-po. — Mateusi 18:23-35.

 Tuevela vakuetu tyina tuhakala nonkhongo navo. Tupu, tuevela tyina tuhevekondolela netyi vetulinga tyapenga ine otyivi. Ombimbiliya ilongesa okuti matyitukuatesako okuevela umwe nawa otyina tuna ohole “yahaovola vala omahando ayo muene.” — 1 Ova Kolindu 13:4, 5.

Okuevela katyilekesa okuti . . .

•   Kumamono ovivi vakuenyi valinga. Ombimbiliya kaitavela ovanthu vasoka okuti ovivi ine ovipengi kavisukisa ine vayekelela ovivi. — Isaías 5:20.

•   Ulilingisa nga tyina pehena etyi tyaenda-po. Huku waevelele ononkhali ononene mbalingile Ohamba David, mahi kemuyovolele kovivi viaetwa novivi viae. Alo watuma umwe ononkhali mba David mbuhonekwe mo Mbimbiliya. Ngotyo alo hono mbuiwe. — 2 Samuel 12:9-13.

•   Uyeka vakuenyi vekulinge etyi vahanda. Mongeleka, soka ñgeno walevalesa epanga liove onombongo, mahi anyane nambo pahe ehetyivili vali okukufeta ngeetyi apopile. Elivele ekuiti otyiponyo. Ove upondola okutokola ankho momuevela. Iya ankho wemuevela una okulimbuako ohakala nonkhongo ine okupopia vali konthele yotyo. Mahi no ngotyo, tyipondola kumetavela vali okulevalesa omunthu onombongo. — Salmo 37:21; Provérbios 14:15; 22:3; Ova Galata 6:7.

•   Kusuku novivi aviho. Huku kaevela ovanthu valinga ononkhali tyawina, avehetavela okuti valinga omapita ine okulivela ine hamwe vahaiti oviponyo vana valinga omapita. (Provérbios 28:13; Ovilinga 26:20; Ova Hebeleu 10:26) Vana valinga ononkhali avehelivele, vakala onondyali mba Huku iya Huku ketuiti tuevela vana vahahande okutuevela. — Salmo 139:21, 22.

   Oityi molingi ine pena omunthu wekulinga otyivi iya omunthu ehetavela okukuita otyiponyo iya hamwe alo ketavela okuti etyi alinga tyapenga? Ombimbiliya ituavela onondongwa ombu mbati: “Yekapo onyengo, lityilika okunumana.” (Salmo 37:8) Aloo umwe ankho kuaevele otyivi omunthu alinga, mahi wahayeke onyengo ikukale komutima. Kala nonthumbi yokuti Huku makakoyesa omunthu oo. (Ova Hebeleu 10:30, 31) Tyituungumanesa okunoñgonoka okuti apa katutu Huku meketupola komutima aviho vitwihama mokonda yovipuka vakuetu vetulinga. — Isaías 65:17; Eholololo 21:4.

•   “Wevela” umwe aloo vana valinga ovipuka ovitutu. Pamwe otyitateka hakuti matuevela ine kamatuevela vena etyi vetulinga. Pamwe, nonthue tuna okuimbuka okuti tunumanena ovipuka vihesilivila. Ombimbiliya yati: “Wahanumane liwa, okunumana liwa otyo malai.” — Eclesiastes 7:9, okatoi.

Oñgeni Moevela

1.   Hinangela okuti okuevela tyesukisa. Okuevela katyilekesa okuti uyekelela ovivi ine okukala ngatyina pehena etyi tyaendapo. Okuevela tyilekesa okuhakala nonkhongo.

2.   Noñgonoka okuti okuevela kutunda oviwa. Okuhakala nonyengo ine onkhongo tyikuatesako okutula omutima, okukala nekongoko iya okala vali nehambu. (Provérbios 14:30; Mateusi 5:9) Tyakolela vali unene omokonda opo Huku ekuevele, noove una okuevela vakuenyi. — Mateusi 6:14, 15.

3.   Lipaka pomphangu ya vakuenyi. Atuho tuvakuankhali. (Tiaku 3:2) Tyituhambukiswa tyina vakuetu vetuevela. Moluotyo, nonthue tuna okuevela vakuetu. — Mateusi 7:12.

4.   Pola pokati. Tyina tuamalingwa otyipuka tyimwe tyitunumanesa, mahi tyihe tyinene, otyiwa tulandule onondongwa mbo Mbimbiliya mbati: “Tualeiko okukoleleya ovipuka vakuenyi vemulinga.” — Ova Kolosu 3:13.

5.   Wahasete. Linga ononkhono opo weevele vakuenyi tyihasete, ohayeke onyengo ikukale komutima. — Ova Efesu 4:26, 27.