Okuti Huku Waoya Vala Ouye Auho?
Ekumbululo lyo Mbimbiliya
Huku weete atyiho, upondola okulinga etyi ahanda apa muene etyihandela. (Provérbios 15:3; Ova Hebeleu 4:13) Mahi Ombimbiliya kaipopi okuti waoya vala ouye auho, oo hamwe uli movipuka aviho. Ipopia vala okuti Huku ukahi ngomunthu iya una umwe apa akala.
Huku ukahi ñgeni? Huku kamonwa komaiho. (Suau 4:24; 1:18) Ovipuka vimwe viapopiwa mo Mbimbiliya vilekesa okuti una muene apa akala. Ombimbiliya kaipopi okuti waoya vala ouye auho. — Isaías 6:1, 2; Eholololo 4:2, 3, 8.
Huku ukala-pi? Ombimbiliya ipopia okuti Huku “ukala keulu.” (1 Reis 8:30) Naina, Huku kakala-ko pano pohi, tupu kakala vala apa peulu apa tweete. Ombimbiliya ipopia onthiki imwe “onoandyu mbaile ku Siovaa.” a Otyo tyilekesa okuti Siovaa una muene apa akala. — Jó 1:6.
Ine Huku kaoyele ouye auho, opo ngotyo undyete umwe?
Yoo, ukuete, wesuka no ove! Namphila eli keulu, no ngotyo utala ovanthu aveho, haunene umwe vana velikuatehila valinge oviwa, vemuhambukiswe. Ovanthu ngo ovo, ovo umwe akuatesako. (1 Reis 8:39; 2 Crônicas 16:9) Tala ovipuka vimwe Huku alingila ava velikuatehila valinge etyi ahanda:
Tyina ulikuambela: Siovaa Huku ukutehelela umwe poola yatyo uli nokupopia. — 2 Crônicas 18:31.
Tyina wasoya: “Siovaa ukahi popepi na vana vaihamenwa komutima. Uyovola vana vokuna nokumona ononkhumbi.” — Salmo 34:18.
Tyina wahanda okupakelwa-mo onondunge: Siovaa wati: “Ame mandyikulongesa onondunge, mandyikulekesa ondyila una yokuendela.” Onondunge ombo mbuli Mondaka yae Ombimbiliya. — Salmo 32:8.
Vimwe ovanthu vahanoñgonokele nawa
Omatutu: Huku uli movipuka aviho atunga.
Otyili: Huku keli-ko pano pohi, keli-ko movipuka ovikwavo atunga. (1 Reis 8:27) Ombimbiliya ipopia okuti ononthungululu “mbupopia ounene wa Huku.” (Salmo 19:1) Opo utyinoñgonoke, nkhele soka: Soka ñgeno omunthu wanthinda ondyuo popapeli oo pohi. Okuti tyitavela okuti omunthu oo ukala mondyuo oyo anthinda? Au. Naina katyitavela okupopia okuti Huku uli vala movipuka aviho atunga. Mahi ine ondyuo yatyo omunthu weinthinda umwe nawa, opo hamwe moti omunthu oo omunongo, ine hatyo? Novipuka Huku atunga, vitupopila etyi ekahi. Omo umwe tumonena okuti omunongo, utupu natyike tyimupona, utuhole. — Ova Loma 1:20.
Omatutu: Opo Huku anoñgonoke ovipuka aviho, una okuoya ouye auho.
Otyili: Huku una ononkhono mbumwe alinga nambo ovipuka aviho mbutiwa osipilitu sandu. Tyina pena etyi ahanda okulinga, na tyina ena etyi ahanda okunoñgonoka, ononkhono ombo, ombo atuma vala. Ngwe kesukisile-ale okutunda apa eli. — Salmo 139:7.
Omatutu: Omukanda wa Salmo 139:8, upopia okuti Huku waoya ouye auho mokonda wati: “Ine ndyenda keulu, oko mandyikuvasi. Ine ndyenda Kondyembo, nako ñgoo oko uli.”
Otyili: Otesitu oyo kaili-ko nokupopia apa Huku akala. Ina vala nokupopia okuti nga tukala-kala ñgoo kokule, Siovaa apeho metukuatesako. Petupu-ale apa ehevili okutuvasa tyina ahanda okutukuatesako.
a Ombimbiliya ipopia okuti enyina lya Huku o Siovaa.
Hamwe Noove Uhanda
OKULILONGESA OMBIMBILIYA TYESUKISA
Okuti Huku Oko Ekahi Umwe?
Tala omokonda yatyi tutila Huku oko ekahi umwe.
OMAPULO OMBIMBILIYA AKUMBULULWA
Ononkhono Mba Huku Oityi?
Oityi Ombimbiliya yatila osipilitu sandu “okuvoko” kwa Huku?
ONTHUE VALIE
Ita na Ulongeswe
Lilongesa epulo limwe lyo Mbimbiliya, ine konthele yo Nombangi mba Siovaa.