Yoo, Ombimbiliya yapopia okuti Huku oko ekahi. Kayetyipopile vala tyapwa, mahi tupu ipopia ovipuka vilekesa okuti Huku oko eli. Ombimbiliya ipopia okuti tuesukisa okutavela okuti Huku oko ekahi, mahi hakutavela vala mokonda otyo tualongeswa. Tuna okusoka umwe nawa ‘nonondunge mbetu ambuho’ atutale ine matutavela ine kamatutavela. (Loma 12:1; 1 Suau 5:20) Pahe tutale ovipuka vimwe Ombimbiliya ipopia vilekesa umwe nawa okuti kouye kuna Huku:

•   Otyipuka ouye ukahi, otyo ngwe muna evi vina omwenyo, tyilekesa umwe nawa okuti viatungwa. Ombimbiliya yati: “Tyotyili, kese ondyuo pena omunthu weitunga, mahi watunga ovipuka aviho o Huku.” (Ova Hebeleu 3:4) Ava vokuatanga vehole okupopia okuti etyi onondaka ombo mbapopia, otyili. a

•   Ovanthu aveho mouye, vahanda okunoñgonoka kouye veya okuetako-tyi. Omunthu upondola una umwe atyiho, mahi ine kanoñgonoka kouye weya okuetako-tyi, kakala nawa. Otyipuka otyo Ombimbiliya ityipopia okuti ‘esuko liokuhongolelwa na Huku.’ Onthwe vanthu, tuati umwe, onthwe tuahanda okunoñgonoka Huku, onthwe tuahanda okumufenda. (Mateusi 5:3; Eholololo 4:11) Otyipuka otyo Huku etupaka momitima vietu, tyilekesa umwe okuti oko ekahi, iya wahanda ovanthu aveho vemunoñgonoke, avemufende. — Mateusi 4:4.

•   Ombimbiliya yapopia-ale ovipuka ovinyingi okuti mavimoneka, ngwe avimoneka umwe ngo omu viapopilwa. Otyipuka ovipuka ovio viaenda tyilekesa umwe okuti kaviapopilwe vala nomunthu ngo onthwe. — 2 Petulu 1:21.

•   Ovanthu vokuahoneka Ombimbiliya, ankho vanoñgonoka ovipuka vimwe vakuavo vehei. Kohale ovanthu ankho vasoka okuti ohi yapumphama komanyama. Mahi Ombimbiliya yapopia-le kohale okuti Huku “ohi keipumphikile kotyipuka natyike.” (Jó 26:7) Otyikwavo Ombimbiliya yapopia-ale kohale, otyetyi yati okuti ohi “ombolongwa”, ikahi ngombola. (Isaías 40:22, okatoi; Douay Version) Ovanthu ovanyingi vehole okupopia okuti vokuahoneka onondaka ombo, vapopia tupu onondaka mbotyotyili, ha tyimwe-ko vali, otyetyi vetyipopilwa na Huku.

•   Ombimbiliya ikumbulula omapulo epuiya unene ovanthu vehole okulipula. Amwe oyaa: Ine tyatiwa Huku ukahi nawa, uhole ovanthu, utupu natyike tyimupona, opo oityi mouye mueyulila ononkhumbi ñgaa? Oityi ovanthu vonongeleya, vokuti umwe vafenda Huku, valingila ovipuka ovivi? Ine omunthu ulilinga omapulo ngoo, omakumbululo atyo eheevasi, omutima wae upondola okutena umwe, ehetavela vali okuti kuna Huku. — Titu 1:16.