Yoo ipondola. Ombimbiliya yati: “Siovaa memupameka tyina ekahi poula nokuvela.” Naina Huku wesuka unene novanthu vae vavela. (Salmo 41:3) Ine una ouvela wahaveluka, apa pena ovipuka vitatu upondola okulinga mavikukuatesako:

1.   Likuambela ku Siovaa omuiti ekukuateseko okukoleleya. Ine ulikuambela Siovaa mekuavela “ombembwa” yae utule omutima, wahalinge unene otyiho. Opo motyivili umwe okukoleleya. — Ova Filipu 4:6, 7.

2.   Wahalinge omalunyeñge-nyeñge. Ombimbiliya yati: “Omutima wahambukua otyihemba, mahi omutima wanumana ukukutisa omankhipa.” (Provérbios 17:22) Apeho otyiwa okuyola. Okuyola matyikukuatesako unene, haunene umwe pahetyino ñgaa tyina una ovitateka, tupu nolutu lwove malukala nawa.

3.   Soka kovipuka oviwa Huku apopia okuti maviya komutwe wandyila. Ine usoka koviwa matukamona, mokala nawa, mohambukwa naapa umwe wavela. (Ova Loma 12:12) Ombimbiliya ipopia okuti nthiki imwe, petupu omunthu makati “ame navela.” (Isaías 33:24) Huku makamanako omauvela omanyingi ovanthu vehevili okuhakula. Atee umwe novakulu vokuakulupa-le mavakakala vali ovakuendye. Ombimbiliya yati: “Olutu lwae malukatalala vali nawa tyipona pouna. Akondoka vali kononthiki mboukuendye wae.” — Jó 33:25.

 Apa pena onondaka mbesukisa unene: Onthwe Nonombangi mba Siovaa tutyii okuti Huku utukuatesako tyina tuavela. Mahi tupu katupumphama vala, tuenda umwe kosipitali tukahakulwe. (Maluku 2:17) Onthwe katupopila vakuetu oku vena okuhakula oo hamwe ovihemba vena okuhakulwa navio vakale nawa. Tyokuhakulwa muene tyitei komunthu na munthu.