Ovanthu ovanyingi vatavela okuti ekulusu enyingilikilo lyo Vakilisitau. Mahi, Ombimbiliya kaipopi nawa okutyi Seusi aipaelwa, ngotyo na wike utyii momuti Sesusi aipaelwa ankho ukahi ñgeni. Mahi, Mombimbiliya muna ovipuka vilekesa okuti Sesusi waipaelelwe momuti, kaipaelelwe mekulusu.

 Ombimbiliya pamwe yundapesa ondaka yo Ngeleku stau·rosʹ tyina ipopia omuti muaipaelwa Sesusi. (Mateusi 27:40; Suau 19:17) Namphila ondaka oyo ovanthu veipitiya okuti “ekulusu,” ovanongo ovanyingi vetavela okuti ondaka oyo ihangununa “omuti utai.” a Ngetyi tyipopia omukanda Dicionário Vine — O Significado Exegético e Expositivo das Palavras do Antigo e do Novo Testamento, ondaka stau·rosʹ “kaipopi ovimuti vielipingahana mahi ipopia omuti wike utai.” Komiti ovio oko ovanthu ankho vapapelwa tyina vaipawa.

 Tupu Mombimbiliya muna ondaka yo Ngeleku xyʹlon otyilike no stau·rosʹ. (Ovilinga 5:30; 1 Petulu 2:24) Ondaka oyo ihangununa okuti “evai,” “elinya,” “omphandyi,” ine “omuti.” b Ngotyo omukanda The Companion Bible (Ombimbiliya Ilandulako) wati: “Mutupu natyike mo Ngeleku mo [Testamendu omphe] tyilekesa okuti ankho omiti vielipingahana.”

Okuti okuundapesa ekulusu tyina ufenda Huku utyitavela?

 Namphila tyeheiwe nawa oñgeni ankho tyikahi omuti omu Sesusi aipaelwa, onondaka ombu pombuelo no notesitu mbatyo mbulekesa nawa okuti Huku ketavela tuundapese ekulusu mefendelo.

1.   Huku ketavela tuundapese ovilolo ine omanyingilikilo omakuavo, okukutikinya-mo ekulusu. Huku wailikile ova Isilayeli vahakuate “omanyingilikilo” mefendelo liavo. Tupu Ovakilisitau vapopilwa okuti endei “nkholo efendelo liovihuku.” — Deuteronômio 4:15-19; 1 Ova Kolindu 10:14.

2.   Ovakilisitau potyita tyotete ankho kavakuate ekulusu tyina vafenda. c Ovaumbili va Huku aveho vena okulandula ongeleka nondongeso yono apositolu. — 2 Ova Tesalonika 2:15.

3.   Ekulusu liahindwa novanthu ankho vahafende Huku. d Etyi palamba omanima amwe konyima yononkhia mba Sesusi, onongeleya mbayapuka muetyi ankho mbulongesa, avetavela ovanthu ovape, ovanthu ovo ankho vahafende Huku, avaetelela “ovilolo, noviso viavo mongeleya,” okukutikinya-mo ekulusu. (Dicionário Vine — O Significado Exegético e Expositivo das Palavras do Antigo e do Novo Testamento) Mahi, Ombimbiliya kaitavela ovilolo viovanthu vahafende Huku ngatyina onkhalelo yokukala vali novanthu ovanyingi. — 2 Ova Kolindu 6:17.