Ova Isilayeli ankho vakwatesako efendelo liotyotyili tyina omanima aeho vapolela Siovaa kovikuna viavo vateya, otyo ankho tyiihanwa okuti okupolela Huku tyike kekwii. a Huku wevepopilile okuti: “Onwe apeho muna okumpha tyike kekwii, [Nova Versão Internacional] kovipuka aviho muteya nima na nima.” — Deuteronômio 14:22.

 Otyitumino tyokwava tyike kekwii ankho otyimwe Povitumino Siovaa Apele Ova Isilayeli. Mahi hono ovakilisitau kavalandula vali Ovitumino Viapelwe Moisesi, otyo vahavela vali tyike kekwii. (Ova Kolosu 2:13, 14) Mahi etyi omukilisitau ena okulinga tyina eya pokwava, okulinga “ngetyi atokola momutima wae, ahalingi tyihahandele ine tyakuluminyua, mokonda Huku uhole una waava nehambu.” — 2 Ova Kolindu 9:7.

•  Okwaava tyike kekwii “mo Testamendu Onkhulu”

•  Okwaava tyike kekwii “mo Testamendu Omphe”

 Okwaava tyike kekwii tyipopiwa unene m’Ombimbiliya, haunene umwe momikanda vyo Testamendu Onkhulu. Otyipuka otyo ova Isilayeli vetyipopilwa umwe etyi pahe Huku evepa Ovitumino Vya Moisesi. Mahi tupu okwaava tyike kekwii, pena apa tyalingelwe etyi Ovitumino Vya Moisesi vieheneye.

Etyi Ovitumino Vya Moisesi Vieheneye

 Apa Ombimbiliya yahimbika umwe okupopia okwaava tyike kekwii, opo mukulu umwe utiwa Ambalau pahe konyima weya okutiwa o Ambalayau. (Gênesis 14:18-20; Ova Hebeleu 7:4) Otyipuka tyike kekwii Ambalau a avele, otyetyi apele ohamba, tupu ankho omunakwa woko Salei. Petupu vali apa Ombimbiliya ipopia okuti Ambalayau ine hamwe ovana vae vaavele tyike kekwii.

 Omunthu wavali Ombimbiliya ipopia okuti waavele tyike kekwii o Sakoo omutekula wa Ambalayau. Sakoo wapopilile Huku okuti ine umuyamba memupe “tyike kekwii” kovipuka viae aviho. (Gênesis 28:20-22) Ngeetyi ovanthu vamwe vokwatanga unene vapopia, otyipuka aavele tyike kekwii, okulinga ovilikutila vyo vinyama. Sakoo alingi umwe etyi apopila Huku, mahi kakuluminyine nawike mombunga yae vetyilinge.

Pomuvo Wovitumino Vya Moisesi

 Ova Isilayeli vapopiliwe okuti vena okwaava tyike kekwii opo vakwateseko ovilinga vya Huku.

•   Ovipuka ovio ankho vipewa ova Levita novanene-nakwa, vaundapa mondywo ya Huku, vehena onohika nomapia valima. (Números 18:20, 21) Ova Levita vana vehevanakwa ankho tyina vamapewa “tyike kekwii” navo vapolela-ko ovanakwa. — Números 18:26-29

•   Tupu ankho tyafwa pena vali otyipuka tyavali tyitiwa okwaava kekwii, tyipewa ova Levita novanthu vana veheva Levita. (Deuteronômio 14:22, 23) Oviawa ovio ankho vevilinga pomuvo wovipito vimwe viesukisa unene kuvo. Omanima amwe koviawa ovio, pamwe ankho vapolela-ko ovanthu vana vokwahepa. — Deuteronômio 14:28, 29; 26:12.

 Oñgeni ovanthu ankho vetyimona okuti etyi otyo otyekwii? Ova Isilayeli ankho vena okwaava tyike kekwii povipuka ankho vateya menima. (Levítico 27:30) Pahe ine ankho vahanda okwaava onombongo, opo komapati 10 opalata vayawisa-ko vali omapati evali. (Levítico 27:31) Tupu ova Isilayeli ankho vena “okwaava tyike kekwii ovinyama nonongombe.” — Levítico 27:32.

 Ova Isilayeli ankho vavalula umwe nawa ovipako viavo opo vetyimone okuti etyi otyekwii. Ovitumino ankho vipopia okuti kavesukisile okutala oñgeni otyipako tyikahi, tupu ankho kavapondola okupingiyapo otyikwavo, nii okupakapo onombongo. (Levítico 27:32, 33) Mahi pahe tyina ankho vaava vali tyavali kekwii, evi ankho vaava pala ovipito, vapondola okuvikumana nonombongo. Otyo tyikwatesako ova Isilayeli vaenda ehimbwe okuya kovipito ovio. — Deuteronômio 14:25, 26.

 Onalupi Ova Isilayeli ankho vaeta tyike kekwii? Ova Isilayeli ankho vaeta tyike kekwii omanima aeho. (Deuteronômio 14:22) Mahi pena enima limwe vahaave tyike kekwii. Vapopililwe okuti tyina pamalambe omanima epandu, enima ekwavo likwama-ko liapandu-vali, kavapondola okulima vena okupululukwapo. (Levítico 25:4, 5) Mokonda menima omo ankho kavalimi, kavesukisile okweeta tyike kekwii. Tupu Apeho ankho tyina pamalambe omanima etatu, ova Isilayeli vena kwaava vali tyavali kekwii opo vakwateseko vokwahepa nova Levita. — Deuteronômio 14:28, 29.

 Oityi ankho tyilingwa omunthu una wahaeta tyike kekwii? Ovitumino Vya Moisesi kavipopi etyi omunthu ankho ena okulingwa. Otyo tyilekesa okuti omunthu ankho kakuluminya opo aete, mahi omunthu mwene ankho una okulikuluminya-tyo. Ova Isilayeli ankho vetyilinga mokonda ankho vetyii okuti otyo tyaviuka vena okulinga, hakuti ankho vena owoma wokuti ine kavetyilingi mavaipawa. Tyina ova Isilayeli vaava tyike kekwii opo ankho vetupu vali otyinkhe tyokupopila Siovaa opo eveyambe. (Deuteronômio 26:12-15) Tyina omunthu ahafete tyike kekwii, ku Huku ngootyo una nokumuvaka. — Malaquias 3:8, 9

 Okuti okwaava tyike kekwii ankho tyalema? Au. Huku ankho wapopilile ova Isilayeli okuti meveyambe vala avahakambe natyike, tyina vaava tyike kekwii. (Malaquias 3:10) Tupu okwahave tyike kekwii ankho tyipondola okuveetela mokonda Siovaa meveyeke-po okuveyamba. Mokonda pahe opo ngootyo ankho ovanakwa vena okuundapa opo velitekule, avehetyivili vali okukwatesako ovanthu okufenda Huku. — Neemias 13:10; Malaquias 3:7.

 Etyi Sesusi ali pano pohi nkhele ankho ovanthu va Huku vena okwaava tyike kekwii. Mahi pahe etyi Sesusi ankhia okwaava tyike kekwii atyahalingwa vali.

Pononthiki mba Sesusi

 Mo Testamendu Omphe, Ombimbiliya ilekesa okuti etyi Sesusi ali pano pohi ova Isilayeli ankho vaava umwe tyike kekwii. Sesusi ankho utyii okuti omunthu una umwe okwaava tyike kekwii. Mahi wapopile ononkhalamutwe mbonongeleya, mokonda ankho ‘vatomba ovipuka viesukisa vali Viovitumino, ngeetyi ouviuki, nokankhenda, nekolelo.’ — Mateusi 23:23.

Konyima yononkhia mba Sesusi

 Etyi pahe Sesusi ankhia ovanthu pahe ankho kavakuliminywa vali okwaava tyike kekwii. Ononkhia mba Sesusi mbanyima-po Ovitumino Vya Moisesi, okuti umwe neetyi “tyokwaava tyike kekwii.” — Ova Hebeleu 7:5, 18; Ova Efesu 2:13-15; Ova Kolosu 2:13, 14.