Ombimbiliya kaipopi onthiki Sesusi atyitwa, tupu, kaipopi okuti tuna okuhinangela ine okulinga otyipito tyonthiki atyitwa. Omikanda McClintock no Strong’s Cyclopedia viati: “Okulinga ovipito vyo Natale katyahindilwe na Huku, nii katyahonekelwe mo NT [Otestamendu Omphe] yotete.”

 Okutala nawa omahipululo alekesa okuti o Natale yatuka koviso viovanthu vahafende Huku. Ombimbiliya ilekesa okuti ankho tufenda Huku monkhalelo ahahande tukahi nokulinga etyi tyimunumanesa. — Êxodo 32:5-7.

1.   Okuhinangela Onthiki Sesusi Atyitwa: “Ovakilisitau votete ankho kavalingi ovipito vionthiki [Sesusi’] atyitwa mokonda ankho vetyii okuti viahindwa novanthu vahafende Huku.” — Enciclopédia Delta Universal.

2.   Onthiki 25 ya Dezembro: Natyike tyilekesa okuti Sesusi watyituwa monthiki oyo. Mokutala omalombe omakapela aholovona onthiki oyo opo ilikuate novipito ankho vilingwa novanthu vahafende Huku ankho vilingwa pomuwo opo.

3.   Okuliavela ovipuka, nokulinga ovipito: Omukanda Encyclopedia Americana wati: “Ovipito ankho vilingwa no Loma, vitiwa Saturnalia, ankho vilingwa mu Dezembro, vilekesa nawa opi kuatuka oviso vilingwa movipito vyo Natale. Mongeleka, movipito ankho mutelekwa ovikulia, nokuliavela ovipuka, nokutemesa onovela.” Omukanda Encyclopædia Britannica nkhele wati: Tyina ovipito vyo Saturnalia ankho vihikapo “ovanthu ankho vayekapo okulinga ovilinga viavo nokulinga ovitanda”.

4.   Omalusi opo Natale: Ngetyi tyipopia omukanda The Encyclopedia of Religion, (Omukanda Wonongeleya) ovanthu voko Europa ankho vapaka mo nondyuo mbavo “omalusi ena ovivala vielikalaila” opo valinge ovipito vitiwa solstício viokulitaata ovilulu.

5.   Ovifo Vitiwa Visco no Azevinho: “Kovilongo ovinyingi ovifo ovio ovanthu ankho vafiwiswa navio momaumbo avo pomuwo wo Natale. Ova Druids vati o visco ikuatesako okulinga omatambu. O avezinho mokonda otyifo apeho otyingole ankho vetyifenda mokonda tyilekesa okuti ekumbi malikondoka vali.” — The Encyclopedia Americana.

6.   Omuti wo Natale: “Omiti viokufenda ankho viakaka unene ko Europa vilingwa novanthu vahafende Huku, avatualako okuvilinga etyi vakala Ovakilisitau.” Mongeleka ankho ovanthu vetyiliya okupaka omuti wo Natale pombundi yondyuo ine o mokati tyina valinga ovipito ankho vilingwa pokuenye.” — Encyclopædia Britannica.