Onondaka “Omu Samaliya Ukahi Nawa,” haunene mbupopia omunthu ukuatesako ou una etyi akamba. Onondaka ombo mbatuka momuhe umwe Sesusi apopile pokwahanda okulongesa ovanthu okuti omunthu wokankhenda ukuatesako vakuavo, katale o kotyilongo patyi omunthu atuka, nii eleka apopia nii omuhoko atuka. a

Etyi onthele ei ipopia

•  Omuhe “womu Samaliya ukahi nawa” upopia-tyi?

•  Oityi Sesusi apopilile omuhe oo?

•  Oityi tulilongesila komuhe oo?

•  Ova Samaliya vali ovanthu patyi?

•  Okuti etyi tyapopiwa momuhe “womu Samaliya ukahi nawa” otyipuka umwe tyalingilwe?

Omuhe oo Sesusi apopile, tyaendele ñgaa: Omulume umwe omu Sundeu, watunda ko Selusalei wenda no ko Selikoo. Tyina ati pokati, avahiwa nonongangala, ambumupolo atyiho atyinda, ambumuvete, ambumusi enthuvia.

Opo yatyo pasiwa omulume oo enthuvia, apalambela omunakwa omu Sundeu, etyi pakala, apalambela vali umwe elombe liatyo liongeleya yova Sundeu. Namphila omunakwa oo, nelombe olio o votyilongo tyike nomulume oo wokuavetua, mahi nawike-vo watalamene emukuateseko.

Mahi pahe konyima, apalambela omulume umwe wotyilongo otyikuavo. Omulume umwe omu Samaliya. (Luka 10:33; 17:16-18) Etyi omu Samaliya oo atala omulume oo wokuavetwa, emweetehila-mo okankhenda, apake ovihemba povipute viae. Pahe emutyindi-po, emutuala mondyuo imwe yokuhikila ovaenda mufetelwa. Ngamo emulalela omo. Etyi kuatya, afete hekulu yondyuo oyo, nkhele ati vali ine pena etyi tyiyawisa-ko haa utyifeta. — Luka 10:30-35.

Sesusi omuhe oo weupopilile omulume ankho usoka okuti omunthu ati ‘omukwetu’ o wotyilongo tyae vala, wotyivala ngo tyae, no welongeso liae. Sesusi wahandele okulongesa omulume oo otyipuka tyimwe otyinene — wahandele okumulongesa okuti omunthu ena okuti ‘omukwetu,’ hamu Sundeu mukuavo vala, mahi ovanthu vatyo aveho. (Luka 10:36, 37) Etompho olio liapakwa Mombimbiliya opo lilongese ovanthu aveho vahanda okuhambukiswa Huku. — 2 Timotiu 3:16, 17.

Omuhe oo utulongesa okuti omunthu wokankhenda utalelwa ku evi alinga. Omunthu wokankhenda ukuatesako ava vehena-tyo, na ava veli nokumona emone — katale oku vatuka, nii kotyivala tyavo, nii kotyilongo tyavo. Omunthu wokankhenda, etyi ahanda ñgeno otyo alingwa, otyo nae alinga vakuavo. — Mateusi 7:12.

Ova Samaliya vakalaile motyilongo tyimwe tyali kombanda yotyilongo tyo Sundeya. Vali ovanthu vamwe vahonya-honya, velinepaile na ava veheva Sundeu.

Pononthiki Sesusi ali pano pohi, ova Samaliya muene vali nelongeso liavo. Ankho vetavela vala omikanda vitano vyo tete Viovihonekwa viova Hembeleu, mahi omikanda omikuavo, aviho kavevitavela.

Pononthiki mbatyo opo, ova Sundeu ovanyingi ankho veyele ova Samaliya, nokukala vala navo ankho kavahande. (Suau 4:9) Ova Sundeu vamwe ankho tyina vahanda okupenya omunthu vati “omu Samaliya.” — Suau 8:48.

Ombimbiliya kaipopi ine etyi tyapopiwa momuhe womu Samaliya tyili tyalingilwe umwe. Mahi pokulongesa, Sesusi wetyilingaile unene tyokupopia ovipuka ovanthu vetyiliya, nonohika ovanthu vei umwe, opo ava vemutehelela vanoñgonoke umwe nawa etyi eli nokulongesa.

Ovipuka ovinyingi Sesusi apopile momuhe omo, otyo umwe vikahi tupu vialingailwe umwe:

• Okutunda mo Selusalei okuenda no ko Selikoo, pena onokilometu mbulamba po 20, mahi tupu pena otyilauka tyimwe otyinene. Opo etyi Sesusi apopia otyili umwe etyi ati omulume oo “utundilila ko Selusalei ulauka no ko Selikoo.” — Luka 10:30.

• Ovanakwa, no vokuatuka mu Levii vakalaile mo Selikoo, mondyila yatyo omo, omo ankho vakuata pokuenda no ko Selusalei.

• Mondyila yatyo omo tupu ankho muholama omakongombanda ayolamena ava vakuata-mo, haunene umwe vokuaenda aveke.