Au, onongeleya ambuho hatyipuka tyike vala. Mo Mbimbiliya muapopiwa onongeleya mbumwe ankho mbunumanesa Huku. Ankho mbumunumanesa mokonda yovipuka vivali:

Tyo tete: Mufendwa ono huku mbomatutu

 Ombimbiliya ipopia okuti vokufenda ono huku mbomatutu, vafenda ovipuka “viehesilivila,” “viehena-le etyi vivepa.” (Jeremias 10:3-5; 16:19, 20) Siovaa a Huku wapopilile ovanthu vae ova Isilayeli eveti: “Muahakalei nono huku ononkhuavo, Huku yenyi ame vala.” (Êxodo 20:3, 23; 23:24) Tyina ova Isilayeli ankho vayemba kokufenda ono huku ononkhuavo, Siovaa ankho “unumana unene.” — Números 25:3; Levítico 20:2; Juízes 2:13, 14.

 Na hono Huku otyo ahanda otyo. Kahande ovanthu vokuti memufenda, mahi otyo vafenda vali “evi vaihana okuti ono huku.” (1 Ova Kolindu 8:5, 6; Ova Galata 4:8) Atee umwe wapopia okuti ovanthu vae kavapondola okukala kumwe novanthu vokufenda ono huku mbomatutu. Wati: “Tundei pokati kavo, hondovokei-po.” (2 Ova Kolindu 6:14-17) Pahe soka: Ine onongeleya ambuho otyipuka tyike vala, okuti Huku ñgeno wapopia onondaka ombo?

Tya vali: Ovipuka valinga Huku kevihande

 Pamwe ova Isilayeli tyina vati pokufenda Huku, ankho vahetekela oviso vimwe vilingwa novanthu vovilongo ovikwavo. Siovaa ankho ukala ñgeni? Ankho ketavela efendelo liavo, mokonda ankho vahonyeka efendelo lyo tyotyili no liomatutu. (Êxodo 32:8; Deuteronômio 12:2-4) Sesusi wapopile okuti etyi omalombe o pononthiki mbae valinga, ankho katyikahi nawa. Ankho vati vafenda Huku, mahi ‘vatomba ovipuka viakolela vali Viovitumino, ngouviuki, nokankhenda, nekolelo.’ — Mateusi 23:23.

 Na hono ongotyo. Ongeleya itavelwa na Huku, oyo ina ilinga etyi tyili Mondaka yae Ombimbiliya. (Suau 4:24; 17:17; 2 Timotiu 3:16, 17) Onongeleya mbuna mbulongesa etyi tyilipona no Mbimbiliya kambutuala ovanthu ku Huku, mbuveyapula Kwe. Onongeleya mbumwe mbulongesa okuti Huku na Sesusi nosipilitu sandu, omunthu wike vala. Nkhele valongesa okuti omunthu nga anyima, ohande yae ikakala pomphangu onkhuavo. Vati ovanthu vokulinga ovivi mavamoneswa ononkhumbi mo ifelunu. Ovipuka ovio aviho valongesa vevipola kovanthu vafenda ono huku mbomatutu. Onongeleya mbulongesa ovipuka ngo ovio kambusilivila mokonda kambesukile netyi Huku apopia, muene mbesuka vala nokulinga oviso. — Maluku 7:7, 8.

 Huku kahande ovanthu vokupopia tyimwe, mahi etyi vapopia katyilii netyi valinga. (Titu 1:16) Ongeleya ikahi nawa, ikuatesako ovanthu okulinga omapanga a Huku, oyo ina ilongesa nawa ovanthu valinge etyi Huku ahanda, hayo ina-ko ilinga vala oviso. Ombimbiliya yati: ‘Inkha omunthu umwe usoka okuti ufenda Huku, mahi kayungu elaka liae, ukahi nokukemba omutima wae muene, iya ongeleya yae kaisilivila. Ongeleya yasukuka ihena esilo komaiho a Huku yetu Tate oyei: itekula onosona novahepe movitateka viavo, ikuatesako ovanthu vakale tyehena onkhako youye.’ — Tiaku 1:26, 27.