Ombimbiliya ipopia ovipuka, novituwa, nonkhalelo yovanthu ankho maikala enyingilikilo “liombitukilo youye uno,” ine “lionthyulilo youye.” (Mateusi 24:3; Ombimbiliya Missionários Capuchinhos) Ombimbiliya ipopia omuwo oo okuti “ononthiki mbahulilila,” “omuwo wonthyulilo,” ine “onthyulilo yomivo.” — 2 Timotiu 3:1; Daniel 8:19; Tradução da Sociedade Bíblica Portuguesa.

 Ombimbiliya ipopia ovipuka ovinyingi, okuvipaka kumwe vilinga “enyingilikilo” lilekesa onthyulilo yononthiki. (Luka 21:7) Tala onongeleka mbumwe:

 Ovilwa viliyawisa. Sesusi waula okuti: “Otyilongo matyikaluisa otyilongo otyikuavo iya ouhamba maukaluisa ouhamba omukuavo.” (Mateusi 24:7) Tupu, Eholololo 6:4 ipopia omunthu wavelama konkhambe ulekesa ovilwa “ankho mavikapola ombembwa mouye.”

 Ondyala. Sesusi waula okuti: “Makukakala ondyala.” (Mateusi 24:7) Omukanda Eholololo tupu upopia omunthu omukuavo wavelama konkhambe ankho maikaeta ondyala onene. — Eholololo 6:5, 6.

 Ovinimawe ovinene. Sesusi wati: “Makukamoneka ovinimawe ovinene.” (Mateusi 24:7; Luka 21:11) Ovinimawe ovio ovinene ankho mavikamoneka mouye mavikaetela ovanthu ononkhumbi nokuipaa ovanthu ovanyingi.

 Omauvela. Ngetyi tyapopia Sesusi, ankho makukakala omauvela ine omikihi “viomauvela omavi.” — Luka 21:11, Contemporary English Version (Ombimbiliya Inglesa Contemporânea).

 Omakongombanda. Namphila tunde kohale kuna-le omakongombanda, Sesusi waula okuti kononthiki mbahulililako “okuliatela kovitumino matyikeliyawisa.” — Mateusi 24:12.

 Okunyona onohika. Eholololo 11:18 yapopia okuti ovanthu “mavakahanya ohi.” Otyo ovanthu ankho mavetyilingi mononkhalelo mbelikalaila, hakulinga vala ovipuka ovivi, mahi tupu nokuhanya onohika.

 Ovanthu mavakakala novituwa ovivi unene. Mu 2 Timotiu 3:1-4, Ombimbiliya yaula okuti makukakala ovanthu “vokuhapandula, vehevakuatyili, . . ., vehena oluembia novanthu, vehetavela okulipakela-mo, vokutendeleya, ovakalavi, vehena ohole notyiwa, ovapakuli, vokuna onkhango, vokulipakako.” Ovanthu ankho mavakakala unene novituwa ovio “akukakala omivo vialema unene, viepuiya okukala.”

 Monombunga kamukakala oluembia. Mu 2 Timotiu 3:2, 3, Ombimbiliya yaula okuti ovanthu ovanyingi kamavakakala “noluembia novanthu” iya ovana mavakakala ovanthu “vokuhetavela kovohe.”

 Vehehole Huku. Sesusi waula okuti: “Oluembia luovanyingi malukatenda.” (Mateusi 24:12) Sesusi walekesa okuti ohole na Huku movanthu ovanyingi maikatenda. Tyelifwa notyo, 2 Timotiu 3:4 yati kononthiki ombo mbonthyulilo, ovanthu mavakakala “vokuhole evi vivehambukiswa tyipona Huku.”

 Ounkhembi monongeleya. Mu 2 Timotiu 3:5, Ombimbiliya yaula okuti ovanthu mavekeliti vafenda Huku mahi otyo vahaendela movitumino viae.

 Okunoñgonoka vali nawa omaulo Ombimbiliya. Omukanda wa Daniele waula okuti “kononthiki mbonthyulilo,” ovanthu ovanyingi mavakanoñgonoka vali nawa otyili tyikahi Mombimbiliya, okukutikinya-mo omaulo oo. — Daniel 12:4, okatoi.

 Okuivisa ondaka ya Huku mouye auho. Sesusi waula okuti: “Onondaka ombu onongwa Mbouhamba wa Huku, mambukaiviswa kombanda yohi aiho.” — Mateusi 24:14.

 Okuhetavela nokulinga omukwele matyikavila-po. Sesusi waula okuti ovanthu kamaveketavela okuti onthyulilo youye ikahi popepi. (Mateusi 24:37-39) Tyehe-otyo vala, 2 Petulu 3:3, 4 yaula okuti ovanthu ovanyingi mavakalinga omukwele, okuhetavela umwe tyawina okuti onthyulilo ili popepi.

 Omaulo aeho maafuiswapo. Sesusi katile kononthiki mbahulilila omaulo oo amwe vala maafuiswapo ine okuti omanyingi pwo maafuiswapo, mahi ngwe wati maafuiswapo aeho momuwo wike vala. — Mateusi 24:33.

 Enga. Ovipuka vikahi nokumoneka mouye velekesa nawa okuti onthyulilo youye yehimbika mo 1914, enima tyehimbika Ovilwa Viouye Auho. Opo mwene ulitaleleko etyi tyilekesa okuti tukahi konthyulilo yononthiki, tala ovidiu ei:

 Mo 1914, Ouhamba wa Huku wahimbika okutumina keulu. Iya otyipuka tyotete Sesusi ahimbika okulinga etyi avialekwa, okutaata Satanasi Eliapu keulu novilulu vialio, avikala vala pono pohi. (Eholololo 12:7-12) Tyimoneka okuti Satanasi ukahi nokuhongiliya ovanthu tyitalelwa kovipuka ovivi ovanthu vekahi nokulinga. Mokonda yotyo ankho “makukakala omivo vialema unene, viepuiya okukala.” — 2 Timotiu 3:1.

 Ovanthu ovanyingi vena unene otyiho mokonda yononthiki mbepuiya. Vasoka okuti ovanthu kamavetyivili okukala mouye ine hamwe vapondola okulihanyauna-ko.

 Tupu, ovakwavo namphila navo, valinga otyiho netyi tyikahi mouye, mahi vena ekevelelo liouye omuwa komutwe. Vena onthumbi yokuti Ouhamba wa Huku apa katutu maukamanako ovitateka aviho mouye. (Daniel 2:44; Eholololo 21:3, 4) Vakevela noumphwa-lundo okuti Ouhamba wa Huku mauya okufuisapo omilao vya Huku, iya tupu vapamekwa nonondaka mba Sesusi etyi ati: “Una ukoleleya aloo konthyulilo, makayovolwa.” — Mateusi 24:13; Miquéias 7:7.