Opasikwa, otyipito ova Isilayeli ankho valinga opo vapandule Huku etyi eveyovola koupika ko Isitu, menima 1513 P.K.E. Huku watumine ova Isilayeli valinge otyipito otyo, omanima aeho monthiki 14 yohanyi ya Abibe ine Nisan. — Êxodo 12:42; Levítico 23:5.

Omokonda yatyi otyipito otyo tyalukilwa okuti Opasikwa?

 Ondaka “Opasikwa”, melaka lyo Hebeleu ihangununa okuyauluka. Ondaka oyo ipopia onthiki Huku atauuluka ova Isilayeli, akaipaa oviveli viova Isitu. (Êxodo 12:27; 13:15) Etyi Huku ati pokulinga otyipuka otyo, wapopilile ova Isilayeli valombe povikulilo vionombundi mbavo ohonde yo ongi onthuei ine yotyinkhombo. (Êxodo 12:21, 22, okatoi) Tyina Huku ameya ankho mamono onombundi mbalombwa ohonde atauluka, omaumbo ova Isilayeli. — Êxodo 12:7, 13.

Opasikwa ankho ilingwa ñgeni?

 Huku wapopilile ova Isilayeli oñgeni ankho vena okulinga Opasikwa yo tete. a Ovipuka vimwe evepopilile ovievi:

•   Otyipako: Monthiki 10 ya Abibe, omaumbo aeho ankho vena okupola motyinyongo tyavo ongi ine otyinkhombo avetyipakela ponthele. Tyina tyiti monthiki 14, ankho vena okutyiipa, avetyiyoko atyiho, avetyilipo. Mo Pasikwa yo tete, ohonde yatyo, Huku wevepopilile veilombe povikulilo vionombundi mbavo. — Êxodo 12:11.

•   Okulia: Ova Isilayeli ankho vena okulia ohitu yongi ine yotyinkhombo, nonombolo mbahapakelwe onkhiso, nonombi mbulula. — Êxodo 12:8..

•   Otyipito: Tyina onthiki yo Pasikwa yamapu, ova Isilayeli ankho vena okulinga otyipito tyimwe ankho tyitiwa Otyipito Tyonombolo Mbahapakelwe Onkhiso. Otyipito otyo ankho tyina okulingwa ononthiki epandu-vali. Mokueenda kuononthiki ombo, ova Isilayeli ankho kavapondola okulia onombolo mbapakwa onkhiso. — Êxodo 12:17-20; 2 Crônicas 30:21.

•   Okulongesa: Mo Pasikwa, ovohe ankho valongesa ovana vavo konthele ya Siovaa Huku. — Êxodo 12:25-27.

•   Okulinga Oungendi: Konyima, ova Isilayeli ankho valinga oungendi okuenda ko Selusalei opo vakalingileko Opasikwa. — Deuteronômio 16:5-7; Luka 2:41.

•   Ovipuka Ovikuavo: Mononthiki mba Sesusi, ovanthu ankho vanwa ovinyu mo Pasikwa, tupu ankho vaimba. — Mateusi 26:19, 30; Luka 22:15-18.

Omalusoke apenga ovanthu vena konthele yo Pasikwa

 Omatutu: Ovakilisitau vena okulinga Opasikwa.

 Otyili: Monthiki 14 ya Nisan yenima 33, Sesusi walile Opasikwa novalongwa vae. Monthiki yatyo omo, etyi vamana okulia Opasikwa, Sesusi ahindi otyipito otyikuavo tyitiwa Ondalelo ya Tatekulu. (Luka 22:19, 20; 1 Ova Kolindu 11:20) Ondalelo ya Tatekulu, oyo yapinga Opasikwa. (1 Ova Kolindu 5:7) Ononkhia mba Sesusi mbavilapo vali tyipona ovipako ankho viipawa mo Pasikwa. Omokonda yatyi? Mokonda mbayovola ovanthu konkhali no kononkhia. — Mateusi 20:28; Ova Hebeleu 9:15.