Okuti Ouhamba wa Huku Otyipuka Tyili Vala Momutima Wetu?
Ekumbululo lyo Mbimbiliya
Au, Ouhamba wa Huku hatyipuka tyili vala momutima Wovakilisitau, mwene una umwe apa ukala. a Ombimbiliya ipopia okuti ‘Ouhamba oo ukala keulu.’ (Mateusi 4:17) Tala oñgeni Ombimbiliya ipopia umwe nawa okuti Ouhamba wa Huku uli keulu.
Ouhamba wa Huku una umwe Ohamba yatyo yakoyua na Huku. Ohamba oyo ina ava maikatumina, ina umwe ovitumino yapaka-ko ovanthu vena okutavela. Otyilinga tyayo okukaviukisa ohi aikala ngetyi Huku eihandelele ponthyimbi. — Mateusi 6:10; Eholololo 5:10.
Ohamba oyo maikatumina ‘ovanthu aveho, novilongo aviho, nomalaka aeho.’ (Daniel 7:13, 14) Ohamba yatyo oyo o Sesusi. Sesusi otyilinga otyo ketyipelwe novanthu, wetyipewa umwe na Huku. — Salmo 2:4-6; Isaías 9:7.
Sesusi wapopililile ono apositolu mbae okuti makakala navo keulu avatumina aveho. — Luka 22:28, 30.
Huku na ava akoya vatumine vena onondyale, mahi mavekembuhanya-ko ambuho. — Salmo 2:1, 2, 8, 9; 110:1, 2; 1 Ova Kolindu 15:25, 26.
Ombimbiliya kailongesa okuti Ouhamba wa Huku otyipuka tyitumina omutima wetu. Ipopia okuti “onondaka Mbouhamba”, “onondaka onongwa Mbouhamba” ombo mbuna okukala momutima wetu. — Mateusi 13:19; 24:14.
Onondaka mbokuati “Ouhamba wa Huku Uli Pokati Kenyi” Mbupopia-tyi?
Otyipuka tyimwe tyihole okungwangwanesa ovanthu avahanoñgonoka nawa apa Ouhamba wa Huku ukala, otyetyi ono Mbimbiliya mbumwe mbapitiya omukanda wa Luka 17:21. Ombimbiliya imwe itiwa Versão Rei Jaime yapitiya onondaka ombo okuti: “Ouhamba wa Huku uli mokati kenyi.” Opo tunoñgonoke nawa onondaka ombo tete tuna okunoñgonoka etyi Sesusi ankho eli nokupopia.
Ouhamba wa Huku ankho kauli-ko momitima viovanthu vana vehetavela, vatena omutwe, ankho vasoka vala okuiipaa Sesusi
Sesusi ankho ukahi nokupopia novanthu ankho vemuyele unene, vahanda okumuipaa, vatiwa ova Faliseu. (Mateusi 12:14; Luka 17:20) Ova Faliseu ankho ovanthu vamwe vena elungavi. Okuti ovanthu ngovo tyitavela momutima wavo mukale Ouhamba wa Huku? Sesusi wevepopilile okuti: “Mokati [kenyi] mueyula emphinia nokuhetavela ovitumino.” — Mateusi 23:27, 28.
Ono Mbimbiliya mbumwe mbapitiya umwe nawa onondaka mba Sesusi mbuli mu Luka 17:21. Ombimbiliya Contemporary English Version yati: “Ouhamba wa Huku una onwe.” Ombimbiliya Tradução do Novo Mundo yati: “Ouhamba wa Huku uli pokati kenyi.” Sesusi wapopila ova Faliseu okuti Ouhamba wa Huku “una onwe,” uli “pokati kenyi,” mokonda Sesusi yatyo wokwakoyua akale Ohamba ankho nkhele uli pokati kavo. — Luka 1:32, 33.
a Ovanthu monongeleya valongesa okuti Ouhamba wa Huku otyipuka tyili vala momutima wovanthu. Ko Estados Unidos kuna ongeleya imwe itiwa Convenção Batista do Sul yapopia okuti Ouhamba wa Huku, “otyipuka tyili vala momutima womunthu.” O Papa Bento XVI momukanda wae utiwa Jesus de Nazaré, wahoneka-mo okuti “Ouhamba wa Huku uli vala momutima womunthu utavela ku Huku”.
Hamwe Noove Uhanda
ESSENTIAL BIBLE TEACHINGS
Ouhamba wa Huku Oityi?
Etyi Sesusi ali pano pohi walongesile vali unene konthele Youhamba wa Huku tyipona ovipuka ovikuavo. Momanima omanyingi ovanthu velikuambela opo Ouhamba wae uye.
OMUTALA WOMULAVI
Olie Ohamba Youhamba wa Huku?
Ovahoneki vo Mbimbiliya vapopia ovipuka vipondola okutukuatesako okuimbuka olie Ohamba Youhamba wa Huku. Ovipuka ovio aviho viafuisuapo vala momunthu wike.
ETYI OMBIMBILIYA ILONGESA
Hetekela Okulilongesa Ombimbiliya Nonthwe
Ovola ou mamulilongesa nae Ombimbiliya mekulongesa vala otyali.