Okuti Ombimbiliya Itavela Ovanthu Vehelihonekesile Kombonge Vakale Kumwe?
Ekumbululo lyo Mbimbiliya
Ombimbiliya ipopia okuti Huku wahanda tulityilike ovipengi. (1 Ova Tesalonika 4:3) Ombimbiliya tyina ipopia ondaka oyo ovipengi, pamwe ipopia omunthu una ombalehi, pamwe ovanthu valala poyavo, omulume ulala na mulume vakuavo, oo hamwe omukai ulala na mukai mukuavo, tupu pamwe ipopia omulume nomukai valala kumwe mahi otyo vehelinepele.
Okuti ñgaa Huku usuka umwe natyo ine omulume nomukai vakala kumwe tyehelinepele?
Wauka otyinepo o Huku. Huku oe wanepesa ovanthu vo tete ovo Andau na Eva. (Gênesis 2:22-24) Etyi auka otyinepo ankho kahande omulume nomukai vakale kumwe, mahi avahapumphamene tete, velipakele-mo okuti mavelinepe vakale kumwe apeho.
Huku wii etyi tyituetela ouwa. Etyi Huku auka otyinepo, ankho wahanda ovanthu vokuelinepa vakala kumwe apeho. Ankho utyii okuti tyina ovanthu velinepa umwe nawa, aveho meumbo vakala nawa. Opo utyinoñgonoke tala ñgoo: Ove tyina ulanda otyipuka otyipe, movikasa viatyo muya okamukanda kapopia oñgeni ovivela vina okupakwa, ine hatyo? Ulinga umwe etyi tyapopia okamukanda oko mokonda utyii okuti kahonekwa nomunthu wokuapangiya etyi walanda. Na Huku ongotyo alinga. Tete wauka otyinepo, pahe apopi etyi tyina okulingwa opo eumbo litunge. Omunthu tyina alinga etyi Huku apopia ukala vala nawa. — Isaías 48:17, 18.
Okamukanda kokuya nevi tualanda kapopia oñgeni ovivela vina okupakwa. Mo Mbimbiliya Huku wapopia-mo etyi vokuelinepa vena okulinga eumbo litunge
Okulala nomunthu muehelinepele nae tyeeta vala ovitateka. Otyipuka otyo, otyo tyihole okueta onombela, novahikuena ovanyingi vapewa vala omaimo, novitateka ovikwavo tuhole okumona hono.
Tyokukala novana ovanthu vetyipewa na Huku. Vokuelinepa tyina valinga otyinepo tyopoula vetyivila okukala novana. Ombimbiliya yapopia okuti ku Huku omwenyo ukola. Mokonda ovanthu olutyito velupewa na Huku, Huku wahanda tutavele atyiho apopia tyayemba kotyinepo. — Ova Hebeleu 13:4.
Iya vana vokukala vala kumwe vatale ine haa matyitavela velihonekese? Huku utyitala ñgeni?
Opo omulume nomukai vakale nombembwa meumbo, kavesukisile-ale okukala kumwe vahetekele ine haa mavelivili umwe. Tyipameka umwe oupanga wo vokuelinepa, okulinepa umwe ngetyi Huku apopia, avelikuatehila vatetulule ovitateka viavo. a Okulinepa nawa kukaputu, tyipa omunthu ondundo yokulinga etyi apopia, ahayekepo mukuavo. — Mateusi 19:6.
Oityi vokuelinepa vapondola okulinga opo eumbo litunge?
Petupu-ale otyinepo tyehena ovitateka. Mahi ine vokuelinepa valinga etyi Ombimbiliya yapopia tyayemba kotyinepo, eumbo malitungu avakala nawa. Apa pena ovipuka vimwe viapopiwa mo Mbimbiliya vokuelinepa vapondola okulinga:
Sukei vali nou muelinepa nae, amuehesuku vala no onwe muene. — 1 Ova Kolindu 7:3-5; Ova Filipu 2:3, 4.
Lihumbei pokati, amulilingi onthilo. — Ova Efesu 5:25, 33.
Lilongesei okuyunga elaka. — Provérbios 12:18.
Lingei ovanthu vapwa-elundo. Tyina mukwenyi amekulingi tyimwe wahahandele, mupolelapo. — Ova Kolosu 3:13, 14.
a Tanga onthele yati: “Família feliz – Compromisso”.