O Alumagedom ovilwa Huku meya okuhanyako navio ovatumini novanthu aveho vehetavela ovitumino viae. (Salmo 2:2) Ovilwa ovio mavikahanyako umwe ovatumini aveho. — Daniel 2:44.

 Mo Mbimbiliya ondaka “Alumagedom” ivasiwa vala momukanda Eholololo 16:16. Omukanda oo wapopia okuti: “Pomphangu itiwa Alumagedom”, opo mapakaongiyilwa ‘Onohamba mbo kombanda yohi aiho, pala ovilwa vionthiki onene ya Huku Wepondolo Aliho.’ — Eholololo 16:14.

 Ovalie mavalu movilwa ovio? Sesusi nonoandyu ovo maveya okuhanyako onondyale mba Huku. (Eholololo 19:11-​16, 19-​21) Ponondyale opo pati umwe no vokwehetavela ovitumino vya Huku no vo kwemutomba. — Ezequiel 39:7.

 Okuti o Alumagedom mailwilwa vala kotyilongo tyike? Au, maiyooyo umwe ouye auho. — Jeremias 25:32-34; Ezequiel 39:17-20.

 Ondaka oyo Alumagedom, ondaka yelaka lyo Hembeleu ipopia okuti “omphunda yo Mesindo.” O Mesindo ankho epunda-umbo lyo mo Isilayeli. Kotyilongo otyo tyo Mesindo ankho oko ovanthu vahonyenena valwe. No Mbimbiliya ityipopia umwe. (Juízes 5:19, 20; 2 Reis 9:27; 23:29) Mahi ondaka o Alumagedom kaipopi otyilongo otyo. Tupopia ngotyo mokonda omphunda oyo onthutu vala, ovanthu aveho mavalwisa Huku kavafuko. Naina ondaka oyo Alumagedom, ipopia onthiki ovatumini aveho mavekelikuata-po na valwise Huku.

 Oñgeni Huku makahanyako onondyale mbae mo Alumagedom? Onthue katutyii. Etyi twii okuti Huku upondola okuhanyako onondyale mbae novipuka ahanyeneko-ale navio onondyale mbae kohale. Vimwe ovievi: ongandavila, novinimawe, nombila, notupia, nomitetanena, nomauvela. (Jó 38:22, 23; Ezequiel 38:19, 22; Habacuque 3:10, 11; Zacarias 14:12) Vamwe mavahangayala unene aveliipaa umwe vala poyavo. Mahi aveho maveketyimona okuti o Huku ukahi nokuvelwisa. — Ezequiel 38:21, 23; Zacarias 14:13.

 Okuti ouye maupwila po Alumagedom? Au. Ouye kamauhanyuako, Huku weutungila ovanthu. (Salmo 37:29; 96:10; Eclesiastes 1:4) O Alumagedom kamaiya okuhanyako ovanthu, maiya okuveyovola. Tupopia ngotyo mokonda Ombimbiliya yati, “ovanthu ovanyingi-nyingi” vafenda Huku maveya okuhupa. — Eholololo 7:9, 14; Salmo 37:34.

 Pamwe tyina Ombimbiliya ipopia ondaka ouye kailiko nokupopia eheke, ili nokupopia ovanthu vehesukile na Huku. (1 Suau 2:15-17) Otyo Ombimbiliya yatila ouye maupwila po Alumagedom. — Mateusi 24:3.

 Onalupi o Alumagedom maiya? Nthiki imwe etyi Sesusi ankho eli nokupopia “ononkhumbi ononene” mambuya tyina o Alumagedom yeheneye, ati: “Onthiki oyo, noola yatyo nawike wii, tyilinge onoandyu keulu, tyilinge Omona, o Tate vala wii.” (Mateusi 24:21, 36) Mahi tupu Ombimbiliya ipopia umwe nawa okuti Alumagedom maiya mononthiki mba Sesusi. Ononthiki ombo, mbehimbika menima lyo 1914. — Mateusi 24:37-39.