Sesusi wayovola ovanthu etyi aava omwenyo wae. (Mateusi 20:28) Otyo Ombimbiliya ipopila okuti Sesusi “Omuyovoli wouye.” (1 Suau 4: 14) Tupu Ombimbiliya ipopia okuti: “Kutupu vali omunthu omukuavo weeta eyovo, mokonda pokati kovanthu mombuelo yeulu petupu nawike wapewa enyina omu tupondola okuhupila.” — Ovilinga 4:12.

 Sesusi wankhila ovanthu aveho vemuyumba onthumbi. (Ova Hebeleu 2:9; Suau 3:16) Huku “emupindula-po pokati ko vokuankhia,” Sesusi akondoka keulu, akala vali oandyu. (Ovilinga 3:15) Pahe Sesusi ‘utyivila umwe okuyovola ava vafwena ku Huku menyina liae, mokonda apeho una omuenyo pala eveitile-ko ku Huku.’ — Ova Hebeleu 7:25.

Omokonda yatyi tyesukisila Sesusi etuitile-ko?

 Omokonda atuho tuvakwankhali. (Ova Loma 3:23) Onkhali ikahi ngotyipuka tyitukelela okuhika ku Huku, oyo yaeta ononkhia. (Ova Loma 6:23) Mahi Sesusi uyakulila vana vemuyumba onthumbi. (1 Suau 2:1) Uveitila-ko ku Huku. Wiita Huku atehelele omalikuambelo avo, tupu wiita eveevele ononkhali mbavo mokonda wankhila ononkhali mbovanthu. (Mateusi 1:21; Ova Loma 8:34) Huku ulinga etyi Sesusi emwiita mokonda otyo umwe ahanda. Watumine Sesusi pano pohi opo ‘ayovole ovanthu.’ — Suau 3:17.

Okuti okuyumba onthumbi mu Sesusi tyituuka opo tuyovolwe?

 Au. Tyili opo omunthu ayovolwe una okuyumba onthumbi mu Sesusi, mahi tuna vali etyi tuna okulinga. (Ovilinga 16:30, 31) Ombimbiliya yati: “Ngetyi olutu luhena omuenyo luankhia, tupu nonthumbi yehena ovilinga yankhia.” (Tiaku 2:26) Opo tuyovolwe tuna:

•   Okunoñgonoka Sesusi na Tate yae Siovaa. — Suau 17:3.

•   Okuveyumba onthumbi. — Suau 12:44; 14:1.

•   Okulekesa okuti tweveyumba onthumbi tyina tuvetavela. (Luka 6: 46; 1 Suau 2: 17) Sesusi wapopia okuti ha aveho vemuti “Tatekulu” mavayovolwa, mahi ovo vana vala valinga etyi ‘tate yae uli keulu ahanda.’ — Mateusi 7:21.

•   Okuveyumba umwe onthumbi na apa tuli movitateka. Otyipuka otyo Sesusi wetyipopia umwe nawa etyi ati: “Una ukoleleya alo konthyulilo, makayovolwa.” — Mateusi 24:13.