“Humba ho na nyoko, opo ukale nomuenyo omule meheke Siovaa a Huku yove mekwavela.” — Êxodo 20:12, Tradução do Novo Mundo.

 “Humba ho na nyoko, opo ukale ononthiki ononyingi meheke TATEKULU, Huku yove mekwavela.” — Êxodo 20:12, Almeida, revista e corrigida.

 Huku watumine ova Isilayeli okuti vena okuhumba ovo he novo ina. Kumwe notyitumino otyo, Huku alingi omulao, opo akwateseko ova Isilayeli okutyitavela. Hono ovalanduli va Kilisitu kavesukisa okulandula Ovitumino Huku avelele ova Isilayeli, vina vitiwa otyitumino tya Muisesi. Mahi ovitumino vya Huku kavipiluluka, iya otyitumino otyo Huku avelele ova Isilayeli na hono nkhele tyisilivila, nkhele tyakolela unene kovalanduli va Kilisitu. — Ova Kolosu 3:20.

 Ovana valekesa okuti vahumba ovo he tyina vevelinga onthilo nokuvetavela. (Levítico 19:3; Provérbios 1:8) Alo umwe tyina pahe vekula vena onombunga mbavo, ovana vena okutwalako okuhumba nokukwatesako ovohe. Mongeleka, valinga atyiho opo ovo tate yavo vakulupa vevetekule nawa, nokuveavela onombongo tyina tyesukisa. — Mateusi 15:4-6; 1 Timotiu 5:4, 8.

 Ova Isilayeli ankho vena okuhumba ovo he tupu novo ina. Otyo tyilekesa okuti ovo me vakolela unene mombunga. (Provérbios 6:20; 19:26) Hono tupu ovana vena okuhumba ovo he novo ina.

 Otyitumino otyo tyokuhumba ovo tate novo me tyina apa tyioyela. Ovana kavapondola okutavela kovo he, ine okomunthu omukwavo inkha otyo tyiveyapuka kokutavela Huku. (Deuteronômio 13:6-8) Hono otyo katyapilulukile. Ova kilisitau vena “okutavela Huku ngatyina oe uvetumina tyipona omunthu”. — Ovilinga 5:29.

 Motyitumino Huku avelele ova Isilayeli, ovana ankho mavetavela kovo he novo ina ‘mavakala omuwo omunyingi nokukala nomuenyo omuwa’ kombanda yohi Huku ankho meveavela. (Deuteronômio 5:16) Ngotyo ankho kamahitiswa ngetyi ankho tyilingwa ovana vana vokuhetavela otyitumino tya Huku nokuhetavela kovo he. (Deuteronômio 21:18-21) Ondongeso yotyitumino otyo na hono kayapilulukile. (Ova Efesu 6:1-3) Katyesukisile ankho tuvana ine tuvakulu, atuho tuna okutavela Komutungi wetu una meketukoyesa. Iya ngetyi Huku alaa, ovana vemutavela nokutavela kovo he mavakalako omuwo omunyingi kombanda yohi. Tyotyili, makakalako apeho-apeho. — 1 Timotiu 4:8; 6:18, 19.

 Otyitumino tyikahi mu Êxodo 20:12 Povitumino Ekwi tyakolela unene. (Êxodo 20:1-17) Ovitumino viatetekela vipopia etyi ankho Huku akevelela kova Isilayeli, mongeleka, ngetyi okufenda vala kwe. Ovitumino ovikwavo vikahi komutwe vipopia etyi ankho Huku akevelela ko Isilayeli tyina ankho velitekula na vakwavo, mongeleka, ngetyi ovakai okuhalavisa ovalume vavo ine ovalume okuhalavisa ovakai vavo, nokuhavake. Ngotyo, otyitumino tyati “humba ho na nyoko” tyilekesa okuti pena ovipuka vivali omunthu ankho ena okutavela. Tyina ankho omu Isilayeli etavela otyitumino otyo, ukahi nokutavela etyi Huku aita tupu ukahi nokutavela etyi aitwa konthele yoketekula ovanthu.