“Atyiho ulinga tyiyumba ku Siovaa, etyi upanga matyikweende nawa.” — Omihe 16:3, Ombimbiliya Ikola.

 “Atyiho ulinga tyiyumba ku TATEKULU, ngwe mapumphika onomphango mbove.” — Omihe 16:3, Almeida Revista e Atualizada.

 Omuhe ou upameka ovanthu vafenda Huku yotyotyili okuti, evi vapanga maviveende nawa ine vayumba onthumbi mwee, mokumwovola, nokulinga evi apopia.

 “Atyiho ulinga tyiyumba ku Siovaa.” Ovafendi va Siovaa  a pokupanga etyi mavalingi, velikondola koututu, avatale vala mu Huku evelulike. (Tiaku 1:5) Oityi valingila ngootyo? Vetyilingila vala otyipuka tyike, ovanthu kavetyivili okululika omwenyo wavo, etyi omwenyo wavo maweende kavetyi. (Omupopi 9:11; Tiaku 4:13-15) Tupu, pamwe vetupu ounongo wokulinga etyi vapanga. Mokonda yootyo, ovanyingi valinga ovanongo, vayumba onthumbi mu Huku mu atyiho valinga. Otyo vetyilinga tyina velikwambela okwiita Huku evehongolele, nokulinga ovipuka ngeetyi Huku ahanda tyili Mondaka yae Ombimbiliya. — Omihe 3:5, 6; 2 Timotiu 3:16, 17.

 Onondaka mbokwati “atyiho ulinga tyiyumba ku TATEKULU b” mwene mbuhanda okupopia okuti “yumbila TATEKULU ovilinga viove.” Omukanda umwe wapopia okuti, onondaka ombo mbupopia “omulume [ulitulula] omulemo komwongo wae mwene, eutulika komwongo wamukwavo wapama vali, watamo umwe mokuutyinda.” Vana velipaka koututu avayumbu onthumbi mu Huku, vapondola okuyumba-ko onthumbi okuti mevekwatesako evetekula. — Oviimbo 37:5; 55:22.

 Onondaka mbokwati “Atyiho ulinga” kambulekesa okuti ngootyo Huku metavela, okuti hatyo mayambe aviho ovanthu vapanga okulinga. Opo Siovaa etuyambe, evi tupanga okulinga vina okulikwata novitumino viae neetyi ahanda. (Oviimbo 127:1; 1 Swau 5:14) Huku kayambe vokwehemutavela. Ngwe tyili, “utyopola onomphango mbonondingavivi.” (Oviimbo 146:9) Mahi, ukwatesako vana vemutavela, valinga onthilo ovitumino viae vili m’Ombimbiliya. — Oviimbo 37:23.

 “Etyi upanga matyikweende nawa.” Mo n’Ombimbiliya mbumwe onondaka ombo mbapopiwa okuti: “Onomphango mbove mambupumphama.” M’Ovihonekwa vyo Hembeleu, tupu vitiwa Otestamendu Onkhulu, ondaka yapitiywa okuti “mambupumphama” mo ingelesi, ipa olusoko lwelisesu liaika, pamwe ondaka oyo ipopia ovipuka viaika Huku atunga. (Omihe 3:19; Selemiya 10:12) Naina Huku ongootyo umwe malingi ononphango mbaava valinga etyi tyaviuka komaiho ae, uvekwatesako vapameke, avakala tyaika, evepe omwenyo una ehambu. — Oviimbo 20:4; Omihe 12:3.

 Omuhe ou wahonekwa n’Ohamba Salomau, ya oe wapopia vali Omihe ominyingi. Wetyivilile tupu okupopia omihe ovityita-novityita o Huku wemupele ounongo. — 1 Onohamba 4:29, 32; 10:23, 24.

 Mokapitulu 16, Salomau wahimbikila kokuhilivika ounongo wa Huku, tupu alekesa okuti Huku uyele vana vokulipaka-ko. (Omihe 16:1-5) Okapitulu oko katwala omutangi kokunoñgonoka otyili tyesukisa tyivasiwa unene momukanda Omihe: Ovanthu tyili-tyili vakala vala ovanongo, neevi valinga aviveende umwe nawa, tyina velipaka koututu avayeke Huku evelulike movipuka aviho valinga. (Omihe 16:3, 6-8, 18-23) Otyo otyili, ya tyawanwa-wanwa unene m’Ombimbiliya. — Oviimbo 1:1-3; Isaiya 26:3; Selemiya 17:7, 8; 1 Swau 3:22.

 Tala okanthimbu kovindiu ei, kapopia etyi tyipopia omukanda Omihe.