OMAPULO OVAKUENDYE NOVAHIKUENA VELILINGA
Oñgeni Ombimbiliya Mainkhuatesako? — Onthele 1: Noñgonoka Nawa Ombimbiliya Yove
“Nahetekele-ale okutanga Ombimbiliya, mahi tyina ndyitala umwe ñgaa otyipuka onene, ndyiponwa umwe!” — Briana, una omanima 15.
Okuti tyina ove usoka okutanga Ombimbiliya otyo ukala ngotyo? Onthele ei maikukuatesako!
Omokonda yatyi otyiwa okutanga Ombimbiliya?
Ine tyina usoka okutanga Ombimbiliya uponwa, ongotyo umwe. Ombimbiliya omukanda umwe omunene, mutupu-ale ofoto naike, otyo ngwe onoletela mbatyo ononthutu vala. Okuti nokutanga Ombimbiliya nokutala o televisau, tyapepuka-po vali okutala o televisau no novidiu.
Nkhele soka: Ine uvasa ekasa limwe enene, atyitiwa mekasa omo muna ovipuka viokohale, kumahande okuliikula utale etyi tyili mokati?
Ombimbiliya ikahi ngotyikasa otyo, muna onondunge mbapopiwa kohale mambukukuatesako:
Olingi ovipuka nonondunge
Mulivile no tate yove
Ukoye omapanga ena onondunge
Usoke nawa etyi molingi tyina waponwa, na tyina una ovitateka
Mahi tyina Ombimbiliya omukanda wokohale-hale, oñgeni ipondola okutukuatesako hono? Omokonda “Ovihonekwa aviho viahonekwa kononkhono mba Huku.” (2 Timotiu 3:16) Onondaka mbo mbahanda okuti atyiho tyapopiwa mo Mbimbiliya tyatunda komunanene wouye auho.
Ombimbiliya ikahi ngotyikasa tyatyinda onondunge
Pahe mandyihimbikilapi okuitanga?
Tyimwe upondola okulinga, okutanga Ombimbiliya okupolelela umwe konthyimbi atee konthyulilo. Ine otyo utanga ngotyo monoñgonoka umwe etyi Ombimbiliya aiho ipopia. Apa pena vimwe upondola okulinga:
Upondola okuitanga okuhimbikila ku Gênesis atee Eholololo.
Upondola okuitangela omu ovipuka vielilandulila.
Linga ngetyi: Omukanda Ukuatesako Okulilongesa Ondaka ya Huku, una onthele yokuati: “Ovipuka Viakolela Vali Unene Momuenyo wa Jesus Pano Pohi.” Onthele oyo ipopia evi Sesusi alingaile, nomu vielilandulila.
Otyikuavo upondola okulinga, okukoya ononthele mbuna mbupopia tyimwe uli nokulwa natyo, nga mbo utanga.
Okuti wahanda ñgeno ukala nepanga likahi nawa, liyumbwa onthumbi, lina onondunge? Opo tanga etyi tyalingile ovo Daviti na Sonantaa vakale omapanga omanene. — 1 Samuel, okapitulu 18-20. Nyingila apa utale “Ongeni Momono Epanga Liotyotyili” movasimo onondunge onongwa.
Okuti wahanda ñgeno tyina uhongilinyua otyipuka otyivi na vakwenyi, ñgeno kutavela? Opo tanga etyi tyalingile Susee ehetavele okuhongiliyua. — Gênesis, okapitulu 39. Pahe onyingila pominthinda evi utale, “Oñgeni moanye tyina vekuhindila . . . Susee —Onthele 1” no “Neetyi atendeleyilwe ! Susse — Onthele 2” molilongesila ku-e onondunge.
Okuti wahanda okutala oñgeni okulikuambela tyipondola okukukuatesako? Tanga oñgeni tyakuatesileko Neemiya. — Neemias, okapitulu 2. Pahe onyingila pominthinda evi utale “Oñgeni Huku Ekukumbulula Tyina Ulikwambela”, molongokelapo ovipuka ovinyingi.
Linga ngetyi: Tyina utanga Ombimbiliya, tangela umwe apa pahaviele opo wahatalukwe.
Nkhele otyipuka tyimwe upondola okulinga, okutanga ovikapitulu vimwe osoko oñgeni upondola okulinga etyi watanga. Nga watanga lilinga omapulo aa:
Otyipuka etyi, oityi Siovaa etyipakela mo Mbimbiliya?
Tyandongesa okuti Siovaa ukahi ñgeni? Tyandongesa okuti ulinga ñgeni ovipuka?
Oñgeni ndyipondola okulinga etyi natanga?
Linga ngetyi: Mo Mbimbiliya yokulilongesa muna onovidiu, nonomapa. Okuti otyo utanga, otyo utala ovipuka ovio, utyivila okunoñgonoka nawa etyi uli nokutanga.