Onombangi mba Siovaa onosimanu mbatyo ambuho veliongiya tuvali mosimanu monondyuo mbumwe mbutiwa Onondyuo mbo Maliongiyo. Mahi oityi tyilingwa-mo? Oñgeni okuenda-ko matyikukuatesako?

•  Oityi tyilingwa Mondyuo Yomaliongiyo?

•  Oityi tyahandela okuenda komaliongiyo?

•  Oityi vakwenyi vapopia?

 Otyipuka otyinene vali tyilingwa mondyuo yomaliongiyo okulilongesa Ombimbiliya. Ine wenda komaliongiyo:

•   monoñgonoka nawa Huku.

•   monoñgonoka oityi ovivi mouye viliyawisila.

•   mokala omunthu ukahi vali nawa.

•    movasi-mo ovanthu vekahi nawa vakale omapanga ove.

 Okuti ankho utyii-ale? Onondyuo omu Onombangi mba Siovaa veliongiyila, tupu pamwe vembuti Onondyuo Mbouhamba. Vembutumbula ngotyo mokonda otyipuka tyipopiwa vali unene momaliongiyo avo, otyipuka tyimwe Huku alulika keulu tyitiwa Ouhamba wa Huku. — Mateusi 6:9, 10; 24:14; Luka 4:43.

 Etyi tyipopiwa-mo matyikukuatesako. Onondunge mbo Mbimbiliya mbupopiwa momaliongiyo Onombangi mba Siovaa mambukukalesa omunthu “omunongo.” (Provérbios 4:5) Ñgeni ngotyo? Molingi omunthu wokupunga nawa ovipuka, uti umwe tyina alinga otyipuka, atyiviuku. Otyikwavo, motyivili okukumbulula omapulo amwe esukisa ñgaa:

•   Kouye tueya okupola-ko-tyi?

•   Okuti Huku oe utumonesa ononkhumbi?

•   Omunthu nga anyima, wenda napi?

 Apa pena ovipuka vimwe vihole okupopiwa momaliongiyo etu o konthyulilo yosimanu:

•   Oityi Wesukisila Okulinga Etyi Tyipopia Ombimbiliya?

•   Oityi Matyikukuatesako Povitateka?

•   Oityi Ouhamba wa Huku Ukahi Nokulinga Pala Onthwe Hono?

 “Nthiki imwe omukuendye umwe tulongeswa nae kosikola eya keliongiyo. Apumphama no onthwe, tyina tutanga momikanda vietu nae otyo alandula-mo. Etyi eliongiyo liapwa, apopi okuti otyipuka tyimwe apanda unene, ovievi ovanthu vakumbaulula. Wati kokapela kavo kutupu omikanda vikahi nawa ngo vietu.” — Brenda.

 Okuti ankho utyii-ale? Momaliongiyo Onombangi mba Siovaa munyingilwa vala otyali, kamuitwa onombongo.

 Ovanthu movasi-mo mavekupameka. Ombimbiliya yati ovanthu va Huku vena okuliongiya ‘velipameke pokati.’ (Ova Hebeleu 10:24, 25) Mouye muno, ovanthu kavesukile-ale na vakuavo. Mahi ovanthu movasi momaliongiyo, vati umwe ovo vehole Huku, ovo vehole vakuavo.

 “Pamwe mokonda yokuna ovilinga ovinyingi, tyina ndyenda keliongiyo naponwa, ndyenda umwe vala nokulikoka. Mahi tyina ndyihika-ko, ndyikala nawa, mahi hatyimwe-ko vali, ovanthu vatyo ndyivasa-mo vankhalesa nawa. Tyina pahe eliongiyo liamapu, kutiko-ale potete ankho naponwa.” — Elisa.

 Okuti ankho utyii-ale? Mouye auho Onombangi mba Siovaa vena omawaneno alamba 120.000. Onondyuo mbatyo omu veliongiyila mbulamba 60.000. Mokonda pahe ovanyingi vehole okuya komaliongiyo, omanima atyo aeho, kutungwa Onondyuo mbo Maliongiyo mbulamba 1.500. a