•   Okwiiva onondaka mbomatuka tyikukalesa ñgeni?

  •  Nii vala ame hisuku-ale natyo.

  •  Pamwe tyinkhala vala otyipuka ñgaa, mahi anehesuku-ale natyo.

  •  Tyinkhalesa omapita hityihande.

•   Monthiki tuñgapi upopia onondaka mbomatuka?

  •  Nii vala himbupopi

  •  Pamwe-pamwe vala

  •  Otyo vala ndyikalela

•   Kwoove tyokutukana otyiwa?

  •  Nii vala

  •  Otyiwa unene umwe

 Okuti okutukana tyapenga umwe unene? Hamwe upondola okuti katyapengele unene, mokonda kuna ovipuka ovinyingi ovivi, ovinene vali tyipona okutukana. Tupu hatyiviko-ale mokonda ovanthu ovanyingi, vapopia onondaka mbomatuka! Okuti hatyivi-ko umwe?

 Ove utavela okuti kuna ovanthu velityilika onondaka mbomatuka? Ovanthu vamwe velityilika okutukana mokonda:

•  Okupopia onondaka mbomatuka vapondola okuti utyova. Etyi omunthu ekahi tyitalelwa kweetyi apopia. Okuti apa uli upopia onondaka mbomatuka, ovanthu vekutala vapondola okusoka okuti kwesukile novanthu utupu onthilo navo. Okuti noove otyo ukahi ngootyo?

   Ombimbiliya yati: “Ovipuka vitunda momulungu vitunda komutima.” — Mateusi 15:18.

•  Omunthu wokupopia onondaka mbomatuka vemupola-po omapita. Omukanda umwe utiwa Cuss Control wati: “Etyi tupopia otyo matyikoyo omapanga etu; opo omapanga etu, nombunga yetu, navana tulongeswa navo oo vana tuundapa navo, vetulinge onthilo vatalela kweevi tupopia. Opo tuvase ovilinga tyitalelwa kweevi tupopia.” Momukanda watyo omo muna epulo liati: “okuti ine uyekapo onondaka mbomatuka mokala nomapanga ekahi vali nawa?”

   Ombimbiliya yati: ‘yekei-po onondaka mbuleva.’ — Ova Efesu 4:31.

•  Okupopia onondaka mbomatuka hatyiwa-ko ngeetyi ovanthu vamwe vasoka. Omukulu umwe utiwa o Dr. Alex Packer wati: “Tyikahi omapita okutehela omunthu wokuti apa eli upopia vala onondaka mbomatuka. Omunthu wokuti apa eli utukana vala, ketyivili okulekesa etyi ahanda, kamoneka ine wahambukwa oo wanumana, kamoneka ine walunguka umwe, tupu kamoneka ine uhole umwe ovanthu.” Ine upopia vala viahatiwa ovievi, nokusoka kumasoko vali nawa, mosoko vala evi viahatiwa ovievi.”

   Ombimbiliya yati: “Momulungu wenyi muhatunde ondaka naike yasila.” — Ova Efesu 4:29.

•  Panga etyi una okulinga. Upondola okuhoneka pokamukanda okuti: ‘Mandyiikala ohanyi, oo ononthiki mbumwe tyahatukana,’ pahe otale ine ukahi umwe nokutyivila okukala onthiki wapanga tyahatukana. Upondola okulinga ñgaa:

•  Lityilika okukala pana papondola okukulingisa okutukana. Ombimbiliya yati: “Omapanga omavi anyona ovituwa oviwa” (1 Ova Kolindu 15:33) “Omapanga omavi”, haa vala ovanthu, mahi no novindiu tutala novitalukiso noviimbo tutehela, novipuka ovikwavo vali. Kenneth una omanima 17, wati: “Pamwe omunthu wiimba umwe otyiimbo tyimwe mokonda otyiwa, ehetyimono okuti motyiimbo omo muna onondaka mbutukana.”

•  Kala omunthu una onondunge. Ovanthu vamwe vapopia okuti tyina omunthu apopia onondaka mbomatuka ngootyo wekula. Mahi otyo hatyili-ko mokonda Ombimbiliya yati, ovanthu vokwekula “vaundapesa apeho ounongo wavo wokusoka, vetyii-ale oñgeni vaimbuka otyiwa notyivi.” (Ova Hebeleu 5:14) Kavapopi onondaka mbomatuka opo velitalese ku vakwavo.

 Okupopia onondaka mbomatuka tyisilisa vala owongo wetu, atusoko vala kovipuka ovivi. Ouye una wasila-le! Omukanda umwe utiwa, Cuss Control wati: “Ove wahayawise vali kesilo, linga tyimwe pala okusukula ouye ou wasila. Ine otyo ulinga otyo kumelitombo, novanthu mavekulingi onthilo.”