•  Oñgeni ove ulitala?

•  Otyipuka otyo tyesukisa mokonda yatyi?

•  Etyi una okulinga

•  Lilongesa vali

•  Etyi Ovakwendye Vamwe Vapopia

•   Tyikola omwenyo

   “Ame ndyihambukwa umwe vala, anehesuku. Oityi nahahambukilwa umwe vala tyina namati ñgaa kwatya?” — Valerie.

•   Okulunga

   “Otyipuka tyo tete tyiya momutwe wange tyina namamono otyipuka otyiwa okutyilungila — ndyiti vala tyalinga unene otyiwa tyafwa hatyiliko.” — Rebecca.

•   Okutavela etyi tyeya

   “Omunthu wokuti tyikola omwenyo, kasoyo, okulungila vala ovipuka aviho omwenyo kaukupepukila. Okutavela vala etyi tyeya tyinkhwatesako ovipuka andyivitavelela vala omu mwene viakalela.” — Anna.

 Ombimbiliya yati: “Womutima wahambukwa, apeho una otyipito.” (Omihe 15:15) Otyo otyili, ovanthu vokwahati apa veli vasoka vala omapita, mahi mwene vasoka koviwa vena, vena vali ehambu ku vakwavo. Tupu vetyivila vali okukala nomapanga. Mahi okuti pena umwe omunthu utyivila okukala apeho novanthu vakalela vala okuliyava?

 Pena umwe ovipuka vialema viti novanthu umwe vetyivila okuhambukwa vivelemena. Tala vala:

•   Ono Jornalista vetuhatulila vala ovivi, ovilwa, omakongombanda, novanthu okulipaa.

•   Tupu pamwe ukondya novitateka vitumbuka mombunga yove.

•   Ove mwene una-le ovipuka uhevili novitateka ulwa navio.

•   Pamwe epanga liove likulinga otyipuka tyikunumanesa.

 Mokonda katyitavela okulipata momaiho wahamone ovipuka ovio — tupu atyehetavela okuvipaka vala komutima otyo uliyava — hahe upungepo vala etyi matyikupepukila. Okutavela vala etyi tyameya matyikukwatesako wahatutumbe nokulipola omalusoke apenga tyina ameiya momutwe.

•   Tyikevela umwe okuti noove mopengesa.

   Ombimbiliya yati: “Mouye mutupu omunthu nawike ulinga vala apeho etyi tyaviuka, nii wahaponyoka.” (Omupopi 7:20, Bíblia na Linguagem de Hoje) Okuponyoka nokulinga etyi tyapenga o tyovanthu aveho, hakuti ngootyo ove vala mupengesi.

   Oñgeni motavela vala etyi tyameya: Tutumba oviponyo ulinga wehevipalaike, mahi hakuti ngootyo kumapengaisa vali. Umwe utiwa o Caleb wati: “Ame hitale vala koviponyo viange mokonda tyisoyesa. Mahi ndyililongesila koviponyo nalinga-linga opo pahe ndyilinge nawa ovipuka.”

•   Wehelieleke na vakwenyi.

   Ombimbiliya yati: “Twahalingei vokulipaka-ko, atuhohiya okalolela pokati ketu na vakwetu, atulilingi onkhi na vakwetu.” (Ova Ngalasiya 5:26) Okutala onofoto vakwenyi vapaka ponostatu (redes sociais) ngwe hamwe apa vembupolela ove kwakongelwe-po, matyikwihama. Ovanthu ankho omapanga ove pahe movetale ngatyina onondyale mbove ononene.

   Oñgeni motavela vala etyi tyameya: Tyokwahakongelwe tyehekwihame, kumakongwale apeho. Kumanoñgonoka-le ovipuka aviho epanga liove alinga mokwatala vala o foto postatu. Omona umwe womanima 16 utiwa o Alexis wati: “Ovanthu vokupaka ofoto postatu haunene vapakapo onongwa mbatyo. Kamavapakepo ono foto mbovipuka visoyesa vakala-kala navio.”

•   Linga wombembwa — haunene mombunga yove.

   Ombimbiliya yati: “Ine tyetavela, kalei vombembwa novanthu aveho.” (Ova Loma 12:18) Ove kumetyivili-ale okuyunga evi vakwenyi valinga, mahi utyivila okuliyunga viehekulinge omapita. Ove utyivila okulinga omunthu wombembwa.

   Oñgeni motavela vala etyi tyameya: Suka umwe nokweeta ombembwa meumbo, wahanumanese vakwenyi, ngeetyi ñgeno ulinga omapanga ove. Omona umwe una omanima 15 utiwa o Melinda wati: “Nawike wahapengesa, atuho vala nthiki imwe matuliate mukwetu komphai. Onthwe vala tutala etyi haa matulingi tyina tyameyapo — tuhula kombembwa ine tuhula komalwei?”

•   Lilongesa okupandula.

   Ombimbiliya yati: “Onwe lingei vokupandula.” (Ova Kolosu 3:15) Okulinga vokupandula tyipaka momutima wetu okulinga vala etyi tyaviuka, atuhesuku neetyi tyahaendele nawa.

   Oñgeni motavela vala etyi tyameya: Kala tyityii okuti mokala novitateka, mahi havio vala unavio, una ovipuka oviwa. Umwe utiwa o Rebecca wati: “Ame ononthiki ambuho ndyihoneka ovipuka oviwa ndyimona, nahanda vinthyinangelese okuti ndyina oviwa ndyimona ndyina okusoka.”

•   Tala nawa omapanga ove.

   Ombimbiliya yati: “Omapanga omavi anyona ovituwa oviwa.” (1 Ova Kolindu 15:33) Okukala novanthu vati vala apa veli apeho valondovola vala, vapopia omapita, vahasete okunumana, noove otyo umwe vala moyambula.

   Oñgeni motavela vala etyi tyameya: Tyina una omapanga, pahe aakala novitateka, matyivesoyesa pahe avalungila vala ovipuka aviho. Vepameka, mahi weheliyumbemo unene nove ovitateka viavo avikusoyesa. Omuhikwena umwe utiwa o Michelle wati: “Hatyiwako okukala vala novanthu vokulungila vala ovipuka aviho, mokonda upondola okukala ngavo.”

 Ononthiki mbuno Ombimbiliya yembuti: “Ononthiki mbalema, ononthiki mbepwiya okukala.” (2 Timotiu 3:1) Okuti tyikupwiya okuhasoko omapita, mokonda ovanyingi vayemba vala kokusoka omapita? Tanga onthele yati: “Omokonda Yatyi Kuakalela Ononkhumbi Ononyingi?”