Ovipuka viasila vitunda meulu, aviimi konombaluku otyitateka otyinene kuvana vataha onombaluku. Tyina omiti novinyama viomelunga viamakakanyena ko nombaluku, onombaluku kambuhateka vali nawa, tupu mbupesela vali unene omulela. Tyihe-otyo vala tyisukisa okupola onombaluku like menima opo mbusukulwe. Ovanongo vekahi nokuovola okutetulula ovitateka ovio kovipuka Huku atunga.

 Tala: Omaovololo alekesa otyikova tyombisi itiwa Globicephala melas ipondola okulisukula. Otyikova otyo oupuka umwe oututu, iya mokonda yotyo ovipuka viasila kavipondola okukakanyena kotyikovala otyo. Pokati kovikova ovio pena ovipuka vimwe vityika omiti novinyama okukakanyena kuvio. Ombisi oyo inia okamulela otyo otyikova tyatyo tyisukukila.

 Ovanongo vekahi nokusoka okupangiya otyipuka tyelifwa no tyombisi oyo opo tyisukule onombaluku. Kohale ankho kuundapeswa otinda opo vasukule onowato. Mahi onotinda ombo pahe kambuundapeswa vali mokonda mbuipaa ovinyama vivasiwa melunga. Vana vokuenda nonombaluku vasoka okupaka mombuelo yombaluku otyivela. Motyivela otyo muna oumbundi umwe mutunda ovipuka vimwe viahaipaa ovinyama viomelunga. Tyina otyivela otyo tyili momaande, tyilikuata, atyikala omulela welikuata. Mokueenda kuomuvo, omulela oo ausenguluka iya ovipuka aviho viasila avitundu-ko. Ha motyivela otyo amutundu vali omulela opo uyakulile ombaluku.

 Omaovololo alekesa okuti otyipuka otyo tyipondola okukuatesako opo onombaluku mbuhapanguyuke liwa-liwa. Otyo ñgeno tyakuatesako unene vana vena onombaluku, mokonda okuipola melunga opo iye okusukulwa onombongo ononyingi.

 Oityi Ove Usoka? Okuti onkhalelo ombisi ei ilisukula tyeya vala atyike? Ine pena ou weitunga ngotyo?