Ovanongo vekahi nokulinga ovipuka vivekuatesako okutanda ovanthu alo umwe na apa pepuiya okutanda. Vekahi nokutalela kovikalo vyo polvo tyinyama tyimwe tyikala melunga.

 Soka Kuetyi: O polvo tyina ovikalo etyinana vianeñgena vala nawa-nawa. Otyinyama otyo tyikuata ovipuka novikalo ovio, alo umwe tyipondola okuhika poumphangu oututu. Tyihe okuneñgenesa vala ovikalo ovio, okuti tyahanda, tupu tyipondola okutenesa ovikalo ovio ankho tyesukisa.

 Ovanongo vetavela okuti okulinga enkhanya lianeñgena lielifwa novikalo vyo tyinyama tyitiwa Polvo, tyipondola okuvekuatesako okutanda ovanthu ponomphangu pepuiya. Ankho vetyivila matyipepuka okutanda ovanthu, atyihesukisa valingwe vali ovipuka ovinyingi.

 Tala onkhalelo ovikalo vyo tyinyama tyitiwa polvo vianeñgena

 Enkhanya olio likuatesako ono ndotolo tyina vatanda ovanthu, lialingwa-le, iya vekahi nokulihetekela pokulinga omaheteko okutanda. Enkhanya olio lina ono milimetulu 135, iya lipondola okukuata ovipuka vili meimo alihevityopola, iya enkhuavo otyo litanda. Ondotolo itiwa Tommaso Ranzani, umwe pu ava valinga enkhanya likuatesako ono ndotolo tyina vatanda ovanthu, wati: “Tutavela okuti etyi tualinga matyitukuatesako unene pokutanda ovanthu, mahi monkhalelo yapepuka.”

 Oityi usoka? Okuti hamwe ovikalo vyo polvo vieyako vala? Ine pena ou wevitunga?