KALA NOMBILI MOVILINGA VIOKUIVISA
Okuyawisa Ounongo Wetu Wokuivisa—Fuiika Etyi Ove Muene Mokapopia
TYAKOLELA MOKONDA YATYI: Namphila omalekeso ehepuiya ekahi momukanda wovilinga etuavela onondaka tupondola okupopia, mahi omalekeso oo o pala vala etukuateseko. Ove wesukisa okuovola onondaka mbove muene. Holovona onkhalelo mopopi nomunthu ine hamwe upondola okupopia onthele onkhuavo ikahi momukanda oo, ovanthu vapondola okutehelela vali nawa. Inkha tyitavela, tyina wamatange Omutala Womulavi ine o Despertai! tala omalekeso ehepuiya, otale o vidiu yomalekeso ehepuiya, tupu upondola okuundapesa ononthele ombu mbukahi pombuelo, opo utyivile okuovola onondaka ove mokapopia.
TYILINGWA ÑGENI?
Lipula okuti: ‘Okuti nahanda okupopia ngetyi tyikahi pomalekeso ehepuiya?’
EENGA
-
Fuiika onondaka mbove mbokuhimbika. Tyina muamelikukunya, popia etyi tyekutuala peumbo liae. (Mongeleka: “Ame neya . . . “)
-
Soka onkhalelo mokapopia opo epulo molingi lilikuate notestu motange, nomukanda moave. (Mongeleka: Tyina motange o testu, upondola okuti: “Ekumbululo liepulo eli livasiwa mo testu ei.”)
AU
-
Fuiika epulo mokakumbulula tyina wamakondoka-ko vali
-
Honeka opo tyikukuateseko okuhinangela etyi moya okupopia
-
Holovona onthele wete okuti ovanthu vo potyilongo tyenyi mavesuku nayo
-
Holovona epulo molingi, malikuatesako omunthu okusoka, mahi wahalinge epulo lipondola okumunumanesa. (Ongeleka: Epulo likahi pefo 2 Liomutala Womulavi ine hamwe o Despertai!)
MU KESE NKHALELO
-
Holovona o testu motange. (Ankho wemuavela o Despertai!, umutangela vala o testu putyina o Despertai! yatyo wemuavela yalingilwa vala vana vena enoñgonoko Liombimbiliya liehehi, ine hamwe kavayumbu onthumbi monongeleya.)
-
Popila omunthu wavasa etyi tyilekesa okuti kumbi atanga omukanda wemuavela mapolopo ouwa
