Omukanda wo Tete Onohamba 16:1-34
16 Seuu+ omona wa Hanani+ atambula ondaka ku Siovaa ipopia konthele ya Mbaasa, yati:
2 “Ame nekukatula mombuma andyikupake kounkhalamutwe uhongolele ovanthu vange ova Isilayeli,+ mahi ove watwalako nondyila ya Selombowau, olingisisa ovanthu vange ova Isilayeli onkhali, avanumanesa nononkhali mbavo.+
3 Ngootyo mandyihanye-ko* Mbaasa no veumbo liae, veumbo liae mandyivelingi ngeetyi nalinga veumbo lya Selombowau,+ omona wa Nembate.
4 Veumbo lya Mbaasa, vana mavankhila mepunda-umbo, ovimbwa mavikevelia-po; vana mavakankhila mohika mavakaliwa noviila.”
5 Ovipuka ovikwavo viehipululo lya Mbaasa, ovipuka alinga novilinga viae aviho ovinene, kaviahonekelwe momukanda womahipululo o pononthiki mbonohamba mbo Isilayeli?
6 Pahe Mbaasa akapululukwa-po novakwaukulu vae, akapakwa ko Tilisa,+ Elaa omona wae emupingi kouhamba.
7 Mahi Siovaa wateyelele-ale onkhano Mbaasa no veumbo liae, etyi atuma omuuli Seuu omona wa Hanani, mokonda yovivi aviho Mbaasa alingile komaiho a Siovaa, emunumanesa novilinga viomavoko ae, etyi alinga ngo veumbo lya Selombowau, neetyi Mbaasa aipaele+ Nandambe.*
8 Menima 26 Asa ohamba yo Sundaa eli kovipundi, Elaa omona wa Mbaasa akala ohamba yo Isilayeli ko Tilisa, atumina omanima evali.
9 Silii omuundapi wohamba uyunga omatemba amwe ovilwa, atyitukilapo ohamba pweetyi ohamba ikahi ko Tilisa ili nokunwa unene meumbo lya Alasa, onkhalamutwe yo veumbo* liohamba ko Tilisa.
10 Silii anyingila-mo, avange+ ohamba eiipaa, menima 27 Asa ohamba yo Sundaa atumina, ngae alinga ohamba.
11 Etyi Silii akala ohamba, apakwa kovipundi, himbikee vala okutumina, aipaa ovanthu aveho veumbo lya Mbaasa. Ahahupisa omulume* nawike, tyilinge ombunga yae* tyilinge omapanga ae.
12 Silii aipaa aveho veumbo lya Mbaasa, ngeetyi onkhano Siovaa ateyelele Mbaasa ilekesa, etyi atumine Seuu omuuli.+
13 Otyo atyiho tyamoneka-po mokonda yononkhali ambuho Mbaasa nomona wae Elaa valingile, avalingisisa ova Isilayeli onkhali, avanumanesa Siovaa Huku yova Isilayeli mokufenda kovilolo viavo vihasilivila.+
14 Ovipuka ovikwavo vihipulula Elaa, ovipuka aviho alingile, kaviahonekelwe momukanda womahipululo o pononthiki mbonohamba mbo Isilayeli?
15 Menima 27 Asa ohamba yo Sundaa eli kovipundi, Silii akala ohamba atumina ononthiki epandu-vali ko Tilisa, pononthiki omafwalali aonga onthanda opo alwise o Simbetone,+ otyilongo tyova Filisitiya.
16 Omafwalali eli monthanda aetyiivi okuti: “Silii watyitukilapo ohamba, eiipaa.” Onthiki yatyo oyo monthanda, ova Isilayeli aveho Onili+ omunene womafwalali avemulingi ohamba yova Isilayeli.
17 Onili nova Isilayeli aveho avatundu ko Simbetone avelisete no Tilisa.
18 Etyi Silii etyimona okuti epunda-umbo velipolwa, anyingila mondywo* yohamba yetala liomulavi yokwapama, eiyakesa apila-mo.+
19 Otyo tyamoneka-po mokonda yononkhali alingile etyi alinga ovivi komaiho a Siovaa, mokwaendela mondyila ya Selombowau, neetyi alingisisa ova Isilayeli onkhali.+
20 Ovipuka ovikwavo viehipululo lya Silii, neetyi atyitukilapo ohamba, kaviahonekelwe momukanda womahipululo o pononthiki mbonohamba mbo Isilayeli?
21 O pononthiki opo ovanthu vo Isilayeli velitepuka pokati. Vamwe vahula ku Timbini omona wa Sinate, vahanda okumulinga ohamba; ava ovakwavo vahula ku Onili.
22 Ovanthu vokwahula ku Onili avevili ovanthu vokwahula ku Timbini omona wa Sinate. Timbini etyi anyima, Onili akala ohamba.
23 Menima 31 Asa ohamba yo Sundaa eli kovipundi, Onili akala ohamba yova Isilayeli atumina omanima 12. Ko Tilisa watuminine-ko omanima epandu.
24 Walandele ku Semele omphunda yo ko Samaliya nonotalendu* onombali mbopalata, atungu-ko epunda-umbo. Aluku epunda-umbo olio okuti o Samaliya,*+ mokonda ya Semele hekulu* yomphunda.
25 Onili walingile unene etyi tyapenga komaiho a Siovaa, walingile vali ovivi tyipona aveho vatetekelele okutumina kwe.+
26 Waendelele monondyila ambuho mba Selombowau omona wa Nembate, no monkhali alingisisile ova Isilayeli, anumanesa Siovaa, Huku yova Isilayeli, mokufenda kovilolo viae vihasilivila.+
27 Ovipuka ovikwavo viehipululo lya Onili, etyi alinga, novilinga viae ovinene, kaviahonekelwe momukanda womahipululo o pononthiki mbonohamba mbo Isilayeli?
28 Pahe Onili akapululukwa-po novakwaukulu vae, akapakwa ko Samaliya; Akambe+ omona wae, emupingi kouhamba.
29 Akambe omona wa Onili akala ohamba yo Isilayeli menima 38 Asa ohamba yo Sundaa atumina. Akambe omona wa Onili atumina o Isilayeli ko Samaliya+ omanima 22.
30 Akambe omona wa Onili walingile vali ovivi unene komaiho a Siovaa tyipona aveho vokwatetekela okutumina kwe.+
31 Nkhele ayawisa-ko vali, etyi alinga ononkhali ngo mba Selombowau+ omona wa Nembate, tupu anepe Sesambele+ omona wa Etembaale ohamba yova Sindone,+ ahimbika okufenda ku Mbaale+ nokulipetamena-po kwe.
32 Tyihe-otyo vala, alingila Mbaale omutala wovilikutila, mondywo* ya Mbaale+ atungile ko Samaliya.
33 Akambe tupu atungu otyipandyi tyikola.*+ Walingile ovipuka ovinyingi opo anumanese Siovaa Huku yova Isilayeli, walingile vali ovivi tyipona onohamba ambuho mbo Isilayeli mbatetekela kwe.
34 Pononthiki mbae, Hiyeli omu Mbetele apindula-po epunda-umbo lyo Selikoo. Atungu ehina liayo apesekela-po omona wae otyiveli Ambilau elipake omapito, apesekela-po Sengumbe omona wae omututu watyo, ngeetyi tyapopile Siovaa etyi atuma Susuwee omona wa Nuu.+
Outoi
^ Ine, “mandyikomboko.”
^ Nandambe omona wa Selombowau.
^ Melaka Liokonthuko: “Una ankho ukahi kombanda yo veumbo.”
^ Melaka Liokonthuko: “Omunthu ufufwila motyimato.” Onondaka mbo Hembeleu mbokupenya ovalume.
^ Ine, “vana ankho vayavala ononkhia mbae.”
^ Ine, “mombala.”
^ Otalendu ike, ankho ilema onokilu 34.2. Tala Ovipuka Viapotoyolwa B14.
^ Tyihangununa okuti: “Oyomuhoko wa Semele.”
^ Ine, “tatekulu.”
^ Ine, “mondywo yokufendela.”
^ Tala Onondaka Mbahangununwa.
