Wo Tete Wahonekelwa Ova Kolindu 11:1-34
11 Lingei vokuhetekela ame, ngeetyi ame ndyihetekela Kilisitu.+
2 Ame ndyimupandula unene, movipuka aviho onwe munthyinangela, mukakatela umwe moviso, muvilinga umwe ngoomu nemupopila.
3 Mahi ame nahanda onwe munoñgonoke okuti, omutwe womulume o Kilisitu;+ omutwe womukai omulume;+ omutwe wa Kilisitu o Huku.+
4 Omulume uti tyina elikwambela, hamwe uula otyo ena etyi elikuta komutwe, oo ukundisa omutwe wae;
5 mahi omukai uti tyina elikwambela, hamwe uula,+ komutwe utupu etyi ahika-ko, ukundisa omutwe wae, otyo alinga otyipuka tyike vala nomukai wakululwa.
6 Mokonda ine omukai kelihiki komutwe, opo ñgeno ukululwa onohuki mbatyo; mahi ine okukululwa, okukeywa umwe onohuki ambupu-ko tyikundisa, opo una okulikuta komutwe.
7 Ou omulume kapondola okulikuta komutwe, mokonda otyifwika tya Huku,+ omunkhima wa Huku, mahi omukai omunkhima womulume.
8 Omulume katundile momukai, omukai oe watunda momulume.+
9 Ngwe hatyo vala otyo, omulume katungililwe omukai, omukai oe watungilwa omulume.+
10 Otyo omukai esukisila okupaka komutwe otyilekesa tyokutavela, mokonda yonoandyu.+
11 Naina mu Tatekulu, tyati vala omukai utei komulume, ou omulume utei komukai.
12 Mokonda ngeetyi omukai atunda momulume,+ nomulume watunda momukai; mahi ovipuka aviho vitunda ku Huku.+
13 Noonwe nkhele sokei vala: Tyaviuka umwe omukai okulikwambela ku Huku ehena etyi ahika komutwe?
14 Mwene kamutyimono umwe apa omulume okukala nonohuki ononde katyimupenyesa,
15 mahi omukai okukala nonohuki ononde katyimupe omunkhima? Onohuki ombo umwe apewa, kapelwe vali otyikwavo ahike komutwe.
16 Mahi ine umwe wahanda okupopia vali tyimwe tyilikalela, onthwe tutupu vali, novewaneno lya Huku vetupu.
17 Ame pokumupa ovitumino ovio himupandula, mokonda onwe tyokuliongiya katyimupe-ale oviwa, tyimunyona vala.
18 Soka neiva okuti pokuliongiya, pokati kenyi pena omaliyapauko, naame ndyityii umwe mupondola okutyilinga otyo.
19 Omu mwakalela, no pokati kenyi vamwe mavahindi tyavo,+ natyo opo tyimoneka ovalie pwoonwe vetavelwa.
20 Onwe soka tyina muliongiya, kamuliongiyila-le tyokulia Okulia kwa Tatekulu kwo Kongulohi.+
21 Onwe soka tyina mulia kokulia oko, amuho tyiti ou walia-le okulia kwae, ou walia-le kwae, pahe atyiti vala ou wankhia ondyala, ou wakolwa-le.
22 Onwe mutupu omaumbo, hamo mukalila, ngamo munwina? Ine mwatomba ewaneno lya Huku, mwahanda vokwehena-tyo tyivekundise? Pahe mandyimutiwi? Okuti ndyimupandula? Au, mu otyo, ame himupandula.
23 Ame etyi natambula ku Tatekulu, otyo nemutolela, tyokuti monthiki Tatekulu Sesusi mapakulwa, kongulohi+ watyo wakwatele ombolo,
24 apandula, pahe eivembaula, ati: “Etyi tyilekesa olutu lwange,+ lwalingilwa onwe otyilikutila. Tyilingei-lingei munthyinangele.”+
25 Ngatyo alinga vali okopo+ etyi vamana okulia, ati: “Okopo ei ilekesa omphango omphe,+ omphango yohonde yange.+ Tyilingei-lingei, nga mweinwa munthyinangele.”+
26 Mokonda apeho tyina mulia ombolo ei, na tyina munwa okopo ei, mukalavandya ononkhia mba Tatekulu, tyilingei atee eya.
27 Naina ou ulia kombolo, hamwe anu kokopo ya Tatekulu, ngwe ankho ñgeno ha tyae, makavelelwa umwe onombei olutu lwa Tatekulu nohonde yae.
28 Nkhele omunthu tyahanda okulitala nawa,+ olinoñgonoka umwe, pahe haa okalia nawa kombolo, okanwa kokopo.
29 Mokonda ou uti okulia ulia, okunwa unwa ahakungunyikile olutu, etyi eli nokulia, etyi eli nokunwa matyimweetela.
30 Otyo ovanyingi pwoonwe vatila umwe ovo vayengenga, ovo vavela, ava vamwe ovanyingi umwe, vakalangala-le.*+
31 Mahi ine twelikungunyikile nawa atulimono, ñgeno katwavelelwe onombei.
32 Mahi ngwe tyina tuvelwa onombei, tuli nokuviyulwa na Siovaa,*+ opo twahavelelwa kumwe nouye.+
33 Naina, vanthu vange, nga mweliongiya mulie, likevelei.
34 Ou waliwa nondyala, alie keumbo liae, opo tyina mwameliongiya mwehelietele.+ Mahi evi ovikwavo nahapopile, nga neya oko haa ndyivilulaika nawa.
