Wo Tete Wahonekelwa Ova Kolindu 4:1-21
4 Onthwe twahanda ovanthu vetumone okuti tuli nokulingisako* Kilisitu, onthwe vaundapi valulika ovipuka vikola viaholekwa vya Huku.+
2 Ngwe mahi, omuundapi ululika tyahanda alinge omunthu uyumbwa onthumbi.
3 Ame okutalwa noonwe hatyoko mwene-mwene nesuka natyo, nii etyi tyokutalwa nombonge yovanthu. Mokonda mwene naame hame-ko ndyilitala.
4 Ame hityii ine ndyina etyi nalinga tyapenga. Mahi otyo hatyo ndyitilwa ndyiviukisa; ame unthala o Siovaa.*+
5 Naina, mwahavelei onombei+ natyike, onthiki yanakwa ayehenehike-po, tyikevele Tatekulu atee eya. Ngwe apa eya, ovipuka vyo pokamphengi menthiki mevipolo-mo evieeta potyitei, ahololola evi vili mononthulo, pahe munthu na munthu apewa omunkhima wae utunda ku Huku.+
6 Vanthu vetu, ovipuka ovio napopia, neviviukisa* umwe mwaame mwene, no mu Apolu,+ onwe nalingila, mutalele kwoonthwe amunoñgonoka otyitumino etyi: “Mwahalambei mweevi viahonekwa,” opo mwehepwila momalityindailo,+ atyiti ou mumuhole ou mumuyele.
7 Ove wekupa-tyo otyo tyokwelikalela na vakwenyi, olie? Ñgaa ove una etyi una-tyo, wahapelwe?+ Naina, ine etyi una-tyo wetyipewa, oityi ulimphandela ngoti kwetyipelwe?
8 Onwe mwakululuka-le? Mwalinga-le ovahona? Vakwetu mwahimbika-le okutumina lwonohamba,+ otyo onthwe twehepo? Ame tyili nahandele ñgeno mwahimbika-le okutumina lwonohamba,+ noonthwe tutumine noonwe.
9 Tyina ndyitala ñgaa, ngoti Huku onthwe ovatumwa,* onthwe ahulilila okunyingiya motyila, tulinge lwa ava vapakulilwa kononkhia,+ mokonda twalinga otyitalukilo tyouye,+ tyitie nonoandyu, novanthu vatalukilwe kwoonthwe.
10 Onthwe twalinga onondamba+ mu Kilisitu mahi onwe mwalinga vokwatonkhoka mu Kilisitu; onthwe twayengenga, mahi onwe mwapama; onwe mwahumbwa, mahi onthwe twatombuwa.
11 No ñgaa onthwe tuna vala ondyala,+ tuna ohunga,+ tuna epene,* tuvetwa*+ vala, nomaumbo tutupu,
12 twakondya novilinga, okuundapa mwene nomavoko etu.+ Tyina twalewa, wetuleva tumupeleyila oviwa,+ tyina tuhukaiswa, tukoleleya umwe tyapwa elundo;+
13 tyina twatendeleywa, tupopia tyapoleya;*+ onthwe twalinga olisu youye,* twalinga onkhako yovipuka aviho, na hono vala.
14 Ovipuka evi ndyili nokuhoneka, hatile opo ndyimukundise, nati vala ndyimulondole lwovana vange ndyihole.
15 Namphila hamwe muna ovalongesi* 10.000 mu Kilisitu, mahi ovoho mutupu ovanyingi; mokonda mu Kilisitu Sesusi ame ame nalinga tate yenyi moviwa ovipe.+
16 Ame ndyimutolela okuti, lingei ngaame.+
17 Otyo ndyimutumina Timotiu eye oko, oe omona wange ndyihole, omona uyumbwa onthumbi mu Tatekulu. Ngwe memuhinangelesa omu ndyilingila ovipuka* movilinga viayemba ku Kilisitu Sesusi,+ omu ndyili nokulongesila aveho vomawaneno aeho.
18 Pwoonwe pena vamwe vepwila melungavi, vati hamwe himeya-le oko.
19 Mahi ine Siovaa* wetyihanda, apa katutu ndyili oko, pahe mwene ndyilitaleleko, ha ku etyi-ko tyipopia ovo vokwepwila melungavi, mahi mandyitale apa vapola ononkhono.
20 Mokonda Ouhamba wa Huku ha wo otyo vala tyokupopia, mahi o wononkhono.
21 Onwe mukoya-po-tyi? Ndyiye oko nolukava+ ine ndyiye nolwembia, ndyiye nomutima wapoleya?
Outoi
^ Ine, “tululikwa na.”
^ Tala Ovipuka Viapotoyolwa A5.
^ Ine, “nevitahela.”
^ Ine, “ono apositolu.”
^ Ine, “tutonthwa.”
^ Melaka Liokonthuko: “Tweenda muhoyo.”
^ Melaka Liokonthuko: “Tulivondela, tulifefa.”
^ Ine, “omakoko ouye.”
^ Ine, “ovayungi.”
^ Melaka Liokonthuko: “Onondyila mbange.”
^ Tala Ovipuka Viapotoyolwa A5.
