Omukanda wo Tete wa Samuwele 4:1-22
4 Ondaka ya Samuwele ailiyandyana mo Isilayeli aiho.
Konyima ova Isilayeli avaende vakalwe nova Filisitiya; avaongo onthanda popepi no Embenesele, ava ova Filisitiya veli ko Afeke.
2 Ova Filisitiya avelionganeka opo valwise ova Isilayeli, mahi ovilwa ovio aviende omapita, ova Isilayeli avatili kova Filisitiya, puvo apaipawa ovalume 4.000 motyipembe tyovilwa.
3 Etyi omaswalali ova Isilayeli akondoka monthanda yao,* ovakulu vatyo avati: “Omokonda yatyi Siovaa hono, ayekela tutile* kova Filisitiya?+ Tukapolei otyikasa tyomphango tya Siovaa ko Silo,+ opo tyikale nonthwe, atyitwaamena komavoko onondyale mbetu.”
4 Avatumu ovanthu ko Silo, avakaeta-ko otyikasa tyomphango tya Siovaa womambamba ovita, upumphi kotyipundi tyae keulu lyo* noandyu onokelumbii.+ Ovana vevali va Elii, Hofini na Fineya+ veli apa pena otyikasa tya Huku yotyotyili tyomphango.
5 Etyi otyikasa tyomphango tya Siovaa tyehika monthanda, ova Isilayeli aveho avahimbika okukwilila peulu, ohi aiteketa.
6 Etyi ova Filisitiya veiva omuvielo avati: “Ovanthu vavielela-tyi unene ngootyo monthanda yova Hembeleu?” Avanoñgonoka okuti, Otyikasa tya Siovaa, vetyeta monthanda yavo.
7 Ova Filisitiya avatili unene owoma avati: “Huku wehika monthanda!”+ Tupu avati: “Taatiei! Etyi katunetyimone!
8 Taatiei, hono twenda napi! Olie metuyovola pomavoko a Huku omunene? Oo, o Huku wahanyeneko o Isitu nomahingano omanyingi etyi vekahi moluhandya.+
9 Kolei omutima, amukala ngovalume, onwe va Filisitiya, opo muhakale ovapika vova Hembeleu ngeetyi ngwe vakalele ovapika venyi.+ Kalei ovalume, lwei!”
10 Ngootyo, ova Filisitiya avalu nova Isilayeli avevetilisa,+ ova Isilayeli avakahateka munthu na munthu aende no mekaka liae. Ovanthu ovanyingi vaipaelwe; omaswalali 30.000 ova Isilayeli aankhi.
11 Tyihe-otyo vala, Otyikasa tya Huku avetyityindi-po, Hofini na Fineya, ovana vevali va Elii, avankhi.+
12 Omulume umwe womuhoko wa Mbesamii aende nokuhateka okutunda kovilwa, ehiki ko Silo monthiki yatyo oyo, novikutu viae viatandauka neheke momutwe.+
13 Etyi omulume ehika, Elii umpumphi potyipundi ponthele petapalo uyunga, mokonda omutima wae wateketa mokonda Yotyikasa tya Huku yotyotyili.+ Omulume anyingila mepunda-umbo opo apopie etyi tyaenda-po, epunda-umbo aliho alihimbika okuliyava.
14 Etyi Elii eiva ovanthu vekahi nokuliyava, apulu okuti: “Omuvielo oo, owa-tyi?” Omulume oo, ahateka noku Elii opo emupopile etyi tyaenda-po.
15 (Elii opo una omanima 98, omaiho pahe kaapikita vali, kamonopo.)+
16 Omulume oo apopila Elii ati: “Ame ndyitundilila kovilwa. O hono umwe ñgaa nahenako.” Elii apulu okuti: “Oityi tyaenda-ko mona wange?”
17 Omulume waeta ondaka ati: “Ova Isilayeli vatila kova Filisitiya avakahateka,+ omaswalali omanyingi aipawa;* novana vove vevali vankhia,+ Hofini na Fineya, Otyikasa tya Huku yotyotyili, vaya natyo.”+
18 Etyi atumbula Otyikasa tya Huku yotyotyili, Elii atoko ongali kotyipundi, ponthele pombundi ateke omunyino ankhi, mokonda wakulupa walema. Wakoyesile ova Isilayeli momanima 40.
19 Omukwekai wae,* tembwaa Fineya, omulemi ononthiki mbae mbuli popepi. Etyi etyiiva okuti Otyikasa tya Huku yotyotyili vaya natyo, heivi nomulume wae vankhia, anyongama liwa-liwa ahimbika okwihama meimo, akutula.
20 Pweetyi ehungi kokunkhia, ovakai veli ponthele yae avemupopila okuti: “Wahatile owoma, wakutula omona omukwendye.” Ngwe ahakumbulula, neetyi vapopia ehetyiivi.*
21 Mahi aluku omona okuti o Ikambonde*+ ati: “Omunkhima mo Isilayeli watunda-mo.”+ Wapopia ngootyo mokonda Otyikasa tya Huku yotyotyili vaya natyo, ou heivi wanyima omulume wae haityo ñgoo.+
22 Ngwe ati: “Omunkhima mo Isilayeli watunda-mo, mokonda Otyikasa tya Huku yotyotyili vaya natyo.”+
Outoi
^ Ine, “etyi ovanthu vakondoka monthanda yavo.”
^ Melaka Liokonthuko: “Omokonda yatyi Siovaa etutilisila.”
^ Ine hamwe, “pokati ko.”
^ Ine, “ovanthu ovanyingi avaipawa.”
^ Ine, “inaivi.”
^ Ine, “atyihanyingila momutima wae.”
^ Tyihangununa okuti: “Omunkhima Waya Napi?”
