Omukanda wo Tete wa Samuwele 9:1-27
-
Samuwele velivasa na Saulu (1-27)
9 Kwali omulume umwe omu Mbesamii, utiwa o Kisi,+ omona wa Ambiyeli, Ambiyeli omona wa Selole, Selole omona wa Mbekolate, Mbekolate omona wa Afiya. Wali womuhoko wa Mbesamii+ ngwe wali omuhona.
2 Wali nomona umwe utiwa o Saulu,+ omukwendye omuwa, pova Isilayeli kapali omulume omuwa wapona-e, omule vali ku aveho; vakwavo vemuti vala momapepe.
3 Etyi ovimbulu* vya Kisi, he ya Saulu viavomba, Kisi apopila omona wae Saulu okuti: “Enda na umwe povakwatesiko, kaovolei ovimbulu mbambavo.”
4 Avakakwata konomphunda mbotyilongo tyo Efalaii no kotyilongo tyo Salisa, avehevivasi-ko. Avaende avakatala ko Saalii, mahi ovimbulu oko kaviko. Avakwata momaheke ova Mbesamii, avehevivasi-ko.
5 Avaende motyilongo tyo Sufe Saulu apopila omukwatesiko vena-e ati: “Tukondoke; Tate kamakala vali notyiho novimbulu,+ makala notyiho noonthwe.”
6 Mahi omukwatesiko emupopila okuti: “Mepunda-umbo muno muna omunthu umwe wa Huku, ulingwa onthilo. Ovipuka aviho apopia vifwiswapo.+ Twende-ko pehepano. Hamwe utupopila ondyila matweende nayo.”
7 Ngootyo, Saulu apopila omukwatesiko wae okuti: “Ine twenda oityi matutyindila omulume oo? Tutupu onombolo movipapo vietu, nii otyipuka otyikwavo tupondola okwavela omunthu wa Huku yotyotyili. Oityi onthwe tuna?”
8 Omukwatesiko apopila vali Saulu okuti: “Tala, ame ndyina apa okambongo* kopalata. Mandyikeavela omunthu wa Huku yotyotyili, etupopila ondyila tuna okwenda nayo.”
9 (Kohale mo Isilayeli omunthu woovola okululikwa na Huku, uti: “Endywei, twende komutali.”+ Ou hono tuti omuuli, kohale watilwe-tilwe omutali.)
10 Konyima Saulu apopila omukwatesiko wae ati: “Etyi wapopia tyaviuka. Twende-ko.” Ngootyo avaende mepunda-umbo omu omunthu wa Huku yotyotyili eli.
11 Etyi veli opo venda no mepunda-umbo, avahonyo novahikwena vakatapa omaande avevepulu avati: “Omutali+ uli muno?”
12 Ovahikwena avati: “Yoo uli muno. Uli vala popepi uli komutwe oko. Endei liwa, wehika hono mepunda-umbo, mokonda ovanthu mavalingi otyilikutila+ komphangu ikola yokwaya peulu.+
13 Mamuti vala nyingilee mepunda-umbo, mamuvasi nkhele kenelonde komphangu ikola yokwaya peulu akalie. Ovanthu kamavali tyina nkhele ehenehike, mokonda oe uyamba otyilikutila. Otyo vala vokwakongwa vapondola pahe okulia. Endei vala pahetyino mamumuvasi.”
14 Avaende no kepunda-umbo. Vati vala pokunyingila-mo, avamono Samuwele uya no kuvo, wenda no komphangu ikola yokwaya peulu.
15 Onthiki yokwalamba etyi Saulu eheneye, Siovaa wapopilile-ale* Samuwele okuti:
16 “Muhuka ovola nga ino, ame mandyikutumu omulume umwe wotyilongo tyo Mbesamii.+ Ove una okumulembula akale onkhalamutwe yovanthu vange, ova Isilayeli,+ makayovola ovanthu vange pomavoko ova Filisitiya. Mokonda namona ononkhumbi mbovanthu vange okuliyava kwavo kwehika kwaame.”+
17 Etyi Samuwele amona Saulu, Siovaa emupopila okuti: “Ou oe omulume nekupopila okuti: ‘Makatumina ovanthu vange.’”*+
18 Saulu afwene pu Samuwele kombundi yepunda-umbo ati: “Mbambavo, mphopile-vo: Keumbo liomutali kulipei?”
19 Samuwele apopila Saulu okuti: “Ame mutali. Pita komutwe wange twende komphangu ikola yokwaya peulu, hono matukalia atuho.+ Muhuka ame mandyikuyeke wende, mandyikupopila atyiho wahanda okunoñgonoka.*
20 Ovimbulu viokwakala ononthiki ononthatu tyavomba,+ wehesuke navio, mokonda viavasiwa-le. Olie watokala ovipuka aviho oviwa mo Isilayeli? Have, no veumbo lya ho?”+
21 Saulu akumbulula okuti: “Ame hi-womuhoko wa Mbesamii, omuhoko omututu watyo momaanda ova Isilayeli?+ Ombunga yange ha yokwatombwa vali monombunga ambuho mbomuhoko wa Mbesamii? Omokonda yatyi umphopilila otyipuka otyo?”
22 Samuwele atwala Saulu nomukwatesiko wae mondywo yokulila evepake pomphangu yomunkhima po vokwakongwa; pena ovalume 30.
23 Samuwele apopila omuteleki ati: “Eta ohitu nekwavela, ina nekutuma wiiyapule-ko.”
24 Ngootyo omuteleki apolo otyikalo tyohitu, etyipake pu Saulu. Samuwele ati: “Okulia okoku wapakelwa. Lia, mokonda ove wekupakelwa opo ukulie monthiki yanakwa. Ame nevepopilile okuti: ‘Mandyikala novaenda.’” Monthiki oyo, Saulu avali na Samuwele.
25 Samuwele na Saulu avatundu momphangu oyo ikola+ avaende no kepunda-umbo, otyo vatomphola keulu liondywo.
26 Avapinduka-po kombimba tyina kutya, Samuwele aihana Saulu ukahi keulu liondywo, ati: “Maneka tulilekele.” Pahe Saulu amaneka avatundu-ko na Samuwele.
27 Pweetyi vekahi nokutunda mepunda-umbo, Samuwele apopila Saulu okuti: “Popila omukwatesiko+ apite komutwe” (omukwatesiko apiti komutwe) “mahi ove sala apa opo ndyikupopile ondaka ya Huku.”
Outoi
^ Melaka Liokonthuko: “Ovimbulu oviina.”
^ Melaka Liokonthuko: “Osikulu ituuka onongalama 11,4.” Tala Ovipuka Viapotoyolwa B14.
^ Melaka Liokonthuko: “Apatula okutwi kwa.”
^ Ine, “makapaka ovanthu vange mondyila.”
^ Melaka Liokonthuko: “Mandyikupopila atyiho tyili momutima wove.”
