Wa Vali wa Petulu 2:1-22
2 Mahi kwali-ale ovauli vounkhembi vali movanthu, no pwoonwe mapakakatuka ovalongesi vounkhembi.+ Ovo yatyo mavakayombeleka pokati kenyi ondongeso inyona ovanthu, no ou umwe wevelanda, hekulu yavo kamavekemutavela,+ mavekelietela ehanyauno liahamasete.
2 Hatyo vala otyo, ovanyingi mavahapelela ovituhiwa vyo vokwahakundu,*+ ondyila yotyili aikapopiwa omapita kombanda yavo.+
3 Tupu elungavi malikevetyinda, avekemuyondya nonondaka mbounkhembi. Mahi omphela yavo, yatetwa-le kohale yapwa-le,+ kaili nokulihindaika, ehanyauno liavo kalilele.+
4 Ngwe mwene tyili Huku kaevelele onoandyu mbokwalingile onkhali embuyeke vala,+ mahi wembuyumba mo Talatalu,*+ embupake momalienge* epuputu mbukevele omphela.+
5 Kaevelele ouye oo wo kohale,+ mahi wahupisile Nowee, wapopile movanthu etyi tyaviuka,+ wemuhupihile na vakwavo epandu-vali+ etyi aeta ombila onene mouye wovanthu onondingavivi.+
6 Wahanyene-po epunda-umbo lyo Sondoma no lyo Ngomola, aalingi etwe, ankho weeyala umwe,+ ovanthu onondingavivi ngatyo evepa otyo, vatalele-ko vetyimone tyovipuka maviya.+
7 Wahupisile ondingaviwa Lote,+ ankho watokota-le omutima novituhiwa vyo vokwahakundu,* ovanthu valiatela kovitumino —
8 nthiki na nthiki omulume oo ondingaviwa, ohande* yae ondingaviwa ankho ihuka-huka okutala ovivi vilingwa, okwiiva ovivi pweetyi ali pokati kovanthu ovo.
9 Naina, mwene Siovaa* utyii oñgeni mayovola movitateka ovanthu vemulinga onthilo,+ mahi onondingavivi wevepakela ehanyauno* monthiki yomphela,+
10 vilevile umwe ava vokusuka nokusilisa ohitu ya vakwavo,+ vokwatomba ava veli kokutumina.*+
Velipa ovipuka, vena omakamo, vetupu owoma, vapopia umwe omapita ava vokwahivilikwa,
11 ngwe onoandyu mbokuna ononkhono ononene vali, mbapama vali, kambuvepopi omapita, mokonda mbuna onthilo na* Siovaa.*+
12 Mahi ovalume ovo, vafwa ovinyama vina viehena-le onondunge, vityitilwa vala okuyewa, avihanywa-ko, vapopia omapita novipuka vehei.+ Mavekelumona mehanyauno kombanda yondyila inyona,
13 mavekelumona, ondyambi yondyila yavo yovivi.
Ngwe mwene vahambukilwa umwe vala okwayumbwamo,+ no komutenya umwe watokota. Ovo pahe onkhako, ovinthembia, o vokuhambukilwa* ondongeso yavo younkhembi tyina muna-vo movipito.+
14 Omaiho avo eyula oumbalehi,+ kavetyivili okutunda monkhali, vahohiya umwe ava vatenga-tenga-le.* Vena omutima walongoka umwe nawa kelungavi. Ovana vateyelwa onkhano.
15 Vapambuka mondyila yaviuka, avai nohika. Vapola-po ondyila ya Mbalaau+ omona wa Mbeole, wahumbile okumonena ondyambi movivi,+
16 mahi waviyulilwe kombanda yokwapikiya etyi tyaviuka.+ Motyinyama tyokutyinda vala ovitele tyahapopi, amutundu ondaka yomunthu, omuuli aanguluke-ko kondyila youlai.+
17 Ovo onondyivi-ndyivi mbahatundu omeva, ombundu itahwa-tahwa vala nomphepo onene, ovo vapakelwa epuputu.+
18 Vapopia nomahuku, atyehena-le oku tyipilukila. Mokonda yokuhapelela ovipepe viohitu,+ novituhiwa vyo vokwahakundu,* vahohiya vali ava vayovoka vala pahe kwaava vakala vala mweevi viapenga.+
19 Soka veveti mavekevepa eyovo, ngwe mwene ovapika vo tyokuvola;+ ngwe omunthu okuvilwa vala na mukwavo, ulinga omupika* wae.+
20 Tyotyili, ine ovanthu ankho vayovolwa-le monkhako youye+ nenoñgonoko liotyotyili lya Tatekulu Omuyovoli Sesusi Kilisitu, vekelipaka vali movipuka ngo ovio, vievevila umwe, opo pahe omukalelo wavo mauvilipo umwe aulambe po wo tete.+
21 Ine kavanoñgonokele-ale nawa ondyila youndingaviwa ñgeno hahe vali, tyipona okuti okwiinoñgonoka veinoñgonoka, pahe avayapuka movitumino vikola vatambula.+
22 Vakala umwe etyi tyapopia omuhe wotyotyili, wokwati: “Otyimbwa tyakondoka monohandyo mbatyo, otyingulu tyakohwa tyakaalangata vali monthata.”+
Outoi
^ Ine, “vokwehena ohonyi.” Mo Ngeleku, aselgeia. Tala Onondaka Mbahangununwa.
^ Tala Onondaka Mbahangununwa.
^ Ine hamwe, “momatoto.”
^ Ine, “vokwehena ohonyi.” Mo Ngeleku, aselgeia. Tala Onondaka Mbahangununwa.
^ Tala Onondaka Mbahangununwa.
^ Tala Ovipuka Viapotoyolwa A5.
^ Melaka Liokonthuko: “Wevepaka vatetwe-ko.”
^ Ine, “vatomba ava vevetumina.”
^ Ine, “komaiho a.”
^ Tala Ovipuka Viapotoyolwa A5.
^ Ine, “velipakula umwe, velimphandela.”
^ Ine, “onohande mbutenga-tenga-le.”
^ Ine, “vokwehena ohonyi.” Mo Ngeleku, aselgeia. Tala Onondaka Mbahangununwa.
^ Ine, “uvilwa notyipuka tyimwe, ulinga omupika watyo.”
