Amosi 7:1-17
7 Etyi, otyo Tatekulu Ohamba Onene Siovaa andekesa: Waongiya ovimphunia-mphunia ovinyingi pononthiki* ovikuna viokuyela konyima vihimbika okukula, ovikuna viokuteywa tyina eholi liohamba liamakewa.
2 Etyi ovimphunia-mphunia viamana okulia omiti aviho viotyilongo, ame andyiti: “Tatekulu Hamba Onene Siovaa, vepolela-po-vo vali ononkhali mbavo mbaa!+ Sakoo kamahupu,* utupu ononkhono!”+
3 Siovaa ngatyo umwe elikondolela otyo.*+ Siovaa ati: “Otyo kamatyimoneka.”
4 Etyi, otyo Tatekulu Ohamba Onene Siovaa amphopila: Tala! Tatekulu Ohamba Onene Siovaa, wapopia okuti otyilongo etyi metyihanye-po notupia. Otupia oto, twanyina-po omaande omanyingi, twahanya-po ohika imwe yotyilongo.
5 Ame andyiti: “Tatekulu Hamba Onene Siovaa, wahalinge ngootyo mbaa!+ Sakoo kamahupu,* utupu ononkhono!”+
6 Siovaa ngatyo umwe elikondolela otyo.+ Tatekulu Ohamba Onene Siovaa ati: “No otyo kamatyimoneka.”
7 Etyi otyo andekesa: Namona Siovaa utai potyimato tyaelekwa nopulumu* pokutungwa, wakwata ongoi yopulumu peke.
8 Siovaa amphulu, ati: “Amosi, oityi weete?” Ame andyiti: “Ndyiete ongoi yopulumu.” Siovaa ati: “Ndyikahi nokupaka ongoi ei yopulumu pokati kova Isilayeli. Himevepolela-po vali oviponyo valinga.+
9 Onomphangu mbokufendela mba Isake mambukahanywa-po,+ onondywo mbokufendela mba Isilayeli mambukahanywa-po.+ Mandyikalwisa eumbo lya Selombowau nomutunga.”+
10 Amasiya omunakwa wo Mbetele,+ atumu ondaka ku Selombowau,+ ati: “Amosi ukahi nokukupopia omapita tatekulu. Uli nokukupopila pokati kova Isilayeli.+ Ovanthu aveho motyilongo kavapondola okwiiva evi apopia.+
11 Amosi wati: ‘Selombowau maipawa nomutunga. Ava ova Isilayeli mavapolwa motyilongo tyavo avakakala ovikonde.’”+
12 Amasiya apopila Amosi, ati: “Ove wokumona omamonekelo pita na kuna! Enda kotyilongo tyo Sundaa. Oko ukalia ombolo,* ngako ukapopila ovipuka ovio.+
13 Wahapopile vali mo Mbetele, mo Mbetele+ omo ohamba ifendela, o Mbetele oyo ondywo yokufendela youtumini.”+
14 Amosi apopila Amasiya okuti: “Ame ankho himuuli-ko, tupu himona womuuli. Ame ankho ndyimunthita, ankho ndyiyunga omikuyu.*+
15 Mahi Siovaa wamphola kotyilinga tyange tyokulisa. Siovaa amphopila okuti: ‘Enda kaulile ovanthu vange ova Isilayeli.’+
16 Pahe tehelela ondaka ya Siovaa: ‘Ove ukahi nokupopia okuti: “Wahaule onondaka mbomphela ya Isilayeli,+ wahaivise onondaka mbomphela yeumbo lya Isake.”+
17 Siovaa wati: “Omukai wove makala ekunga mepunda-umbo, ovana vove ovakwendye novahikwena mavaipawa nomutunga. Otyilongo tyove matyilitepaulilwa nongoi yokweeleka. Ove mokankhila motyilongo tyokwasila. Ova Isilayeli mavapolwa motyilongo tyavo avakakala ovapika.”’”+
Outoi
^ Ononthiki ombo, omohanyi ya Janeiro na Fevereiro.
^ Melaka liokonthuko: “Kamakatuka.”
^ Ine, “ati himetyilingi vali.”
^ Melaka liokonthuko: “Kamakatuka.”
^ Opulumu, otyipuka tyimwe vokutunga ovimato vaeleka natyo. Okangoi kukutilwa emanya ine otyivela ine otyipuka otyikwavo vali.
^ Melaka liokonthuko: “Lia ombolo.”
^ Ine, “ndyilenga omakuyu.”
