Aseu 2:1-23
2 Monthiki 21 yohanyi ya pandu-vali, Siovaa apopila omuuli Aseu+ okuti:
2 “Mbambavo, pula omutumini wo Sundaa+ Solombambele+ omona wa Seletiyele, nomunene-nakwa Susuwee+ omona wa Seosandake,+ novanthu aveho okuti:
3 ‘Pwoonwe pena ou wahupa-po, wamwene omunkhima+ ondywo ei* yali nao kohale? Tyina mwitala pahe ikahi ñgeni? Kamutyiete okuti kaikahi vali nawa ngeetyi ankho yali kohale?’+
4 “‘Mahi pahe, pameka omutima Solombambele,’ o Siovaa wetyitola, ‘pameka omutima munene-nakwa Susuwee mona wa Seosandake.’
“‘Pamekei omutima, onwe vanthu votyilongo amuho,’+ o Siovaa wetyipopia, ‘undapei.’
“‘Mokonda ame ndyina onwe,’+ o Siovaa womambamba ovita wetyipopia.
5 ‘Hinangelei etyi nemutolelele etyi mwatunda ko Isitu,+ omphepo yange yakala umwe pokati kenyi.*+ Mwahatilei owoma.’”+
6 “Etyi otyo Siovaa womambamba ovita apopia, wati: ‘Mandyipaleka-po vali — apa katutu — mandyituñgunya eulu, nohi,+ nelunga, neheke liakukuta.’
7 “‘Mandyituñgunya movanthu vovilongo aviho, ovipuka oviwa* viovilongo aviho maviya,+ ame mandyiyulisa ondywo ei omunkhima,’+ o Siovaa womambamba ovita wetyitola.
8 “‘Opalata oyange, oolu oyange,’ o Siovaa womambamba ovita wetyitola.
9 “‘Omunkhima ondywo ei maikakala nao maukalinga omunene vali tyipona yo kohale,’+ o Siovaa womambamba ovita wetyipopia.
“‘Pomphangu apa mandyikapaka-po ombembwa,’+ o Siovaa womambamba ovita wetyipopia.”
10 Menima lya vali lioutumini Wohamba Ndaliu, monthiki 24 yohanyi ya tyive, Siovaa apopila omuuli Aseu+ ati:
11 “Siovaa womambamba ovita wati: ‘Pula ovanakwa konthele yovitumino+ okuti:
12 “Ine umwe utyinda ohitu ikola pevava liotyikutu tyae, otyikutu tyae atyiyame kombolo ine okotyikulia tyimwe tyatelekwa, ine omovinyu, ine omomulela, ine okovikulia ovikwavo, okuti navio mavikala ovipuka vikola?”’”
Ovanakwa avakumbulula okuti: “Au!”
13 Aseu apulu ati: “Ine omunthu umwe mokonda yokwakwata kotyivimbi,* ayame ku tyimwe povipuka ovio, okuti natyo matyisili?”+
Ovanakwa avakumbulula okuti: “Yoo, matyikala tyasila.”
14 Aseu ati: “Siovaa wati: ‘Ovanthu ava ongootyo vekahi, ongootyo vekahi komaiho ange. Ovilinga aviho viomavoko avo ongootyo vikahi. Ovilikutila viavo aviho viasila.’
15 “‘Mahi pahe, mbambavo, okuhimbikila hono okwenda no komutwe sokei nawa* kweetyi: Oñgeni ovipuka ankho vikahi pononthiki ondywo ya Siovaa+ yehenehimbikwe okupindulwa-po?*
16 Tyina omunthu umwe aya ponthumbo yovilia nolusoke lwokuvasa-po onombwe 20, ankho uvasa-po vala 10, tyina omunthu umwe akanyunga ovinyu nolusoke lwokupola-mo onolitulu 50 mbovinyu, ankho mutunda vala 20.+
17 Ovilinga vienyi aviho ankho ndyivityopola nomutenya utokota unene, nonkhume,+ nongandavila, mahi nawike pwoonwe wakondokele kwaame.’ O Siovaa wetyipopia.
18 “‘Mbambavo, okuhimbikila onthiki yo hono okwenda no komutwe, onthiki 24 yohanyi ya tyive, onthiki ondywo ya Siovaa yahimbika okupindulwa-po,+ sokei nawa* kweetyi:
19 Okuti motyimbundu* nkhele muna ovilia?+ Omuti wonouva, nomukuyu, nomulomaa,* nomundyambi kaviaimine ine hatyo? Okuhimbikila hono, mandyimupa-apa oviwa.’”+
20 Monthiki 24 yohanyi oyo,+ Siovaa apopila vali Aseu okuti:
21 “Popila Solombambele omutumini wo Sundaa okuti: ‘Mandyiteketesa eulu nohi.+
22 Mandyihanye-ko otyipundi tyonohamba, andyinyimi-ko ononkhono mbonohamba mbovilongo aviho.+ Tupu mandyihanye-ko omatemba ovilwa na vana vaendela-ko, ononkhambe na vana vaendela-ko mavekeliipaa poyavo nomutunga.’”+
23 “Siovaa womambamba ovita wati: ‘Ove muumbili wange Solombambele,+ mona wa Seletiyele,+ onthiki oyo mandyikukalesa ngonela ongwa unene, mokonda ove naholovona,’ o Siovaa wetyipopia. Ombo onondaka mbapopiwa na Siovaa womambamba ovita.”
Outoi
^ Ine, “ondywo ya Huku.”
^ Ine hamwe, “hinangelei etyi omphepo yange yali pokati kenyi.”
^ Ine, “viapandwa.”
^ Ine, “kohande yankhia.” Tala Onondaka Mbahangununwa.
^ Ine, “talei nawa.”
^ Melaka liokonthuko: “Yehenepakwe emanya nemanya.”
^ Ine, “talei nawa.”
^ Ine, “omuti womapungu ovindele.”
^ Ine, “motyingwandi.”
