Isaiya 22:1-25
22 Onondaka mbokukoyesa Evota Liomamonekelo:*+
Walinga-tyi? Ovanthu vove aveho valonda kombanda yonondywo.
2 Ove ankho uli monondyaya ononene,Ankho upunda-umbo limwe liahangayala, liahambukwa unene.
Ovanthu vove vokwankhia, kavankhile komutunga,Nii kavankhilile movilwa.+
3 Ovatumini vove aveho vokuna onya, vatila.+
Vakwatwa, atyihesukisa onkhondyi.
Aveho vokwavasiwa, vakwatwa,+Namphila ankho vatilila kokule.
4 Otyo napopila okuti: “Mwahanthalei vali,Ame ndyihanda okulila unene.+
Mwahankhengelelei vali,Ndyilile vala omona omukainthu* wovanthu vange wahanywa-ko.+
5 Mokonda, ei onthiki yonondyaya, yokutiliswa, onthiki yowoma omunene,+Onthiki ya Tatekulu Ohamba Onene, Siovaa womambamba ovita,Mevota Liomamonekelo.
Kukahi nokuhanywa ovimato,+Komphunda kwivala okuulula.
6 Elau,+ kwata otyipapo tyonohevo,Endyu no vokweendela komatemba, no kononkhambe,*Ove Kile,+ hikulula* ondyakulilo.
7 Omavota* ove okukahi vali nawa,Maekeyula omatemba ovilwa,Ononkhambe mambukaongana* kombundi.
8 O Sundaa maikapolwa* ondyakulilo yayo.
“Monthiki omo, ove mokatala apa paholekwa omauta Omondywo yo Motyiteta,+
9 amukamona omamphana omanyingi eli Mepunda-umbo lya Ndaviti.+ Mamukaongiya omaande omeiva etutu.+
10 Onwe, mamukavalula onondywo mbomo Selusalei, amukahanya onondywo opo mupameke ovimato.
11 Omeva omeiva ekulu, mamukeetungila etala pokati kovimato vivali. Mahi onwe kamamukahinangela Omutungi walio Omunene, nii kamamukatala ku Una welitunga-le kohale.
12 Monthiki omo, Tatekulu Ohamba Onene, Siovaa womambamba ovita,Makaihana ovanthu opo valile, nokuliyava.+Mekeveihana opo vakululwe momitwe, avavale onosaku.
13 Mahi soka-ko, vahambukwa, valinga ovipito,Vaipaa onongombe, nonongi,Valia ohitu, vanwa ovinyu, otyo vati:+
‘Tuliei, tunwei, muhuka matunkhi-ale.’”+
14 Siovaa womambamba ovita, welihololola, anthotovekela okuti: “‘Kamamwevelwa onkhali oyo, atee munkhia,’+ wetyipopia o Tatekulu Ohamba Onene, Siovaa womambamba ovita.”
15 Etyi, otyo tyapopia Tatekulu Ohamba Onene, Siovaa womambamba ovita, wati: “Enda komutumini oo Sembina,+ onkhalamutwe yeumbo,* omupopila okuti:
16 ‘Pano ove una po-tyi? Olie wesuka noove pano, etyi uliheyela eendo pano?’ Ukahi nokuliheyela eendo pomphangu imwe yaya peulu, ukahi nokutemba oula wae* monkhanda.
17 ‘Tala! Siovaa mekukwate, ekuyumbu mombwelo nononkhono.
18 Tyotyili, mekwonya-onya, ekekuyumba moluhandya ngombola. Moluhandya omo, omo mokankhila, tupu omo mamukakala omatuku-tuku ove omawa. Otyo, matyikakundisa eumbo lya tatekulu yove.
19 Mandyikupolo apa uundapa, andyikupolo otyilinga tyove.
20 “‘Monthiki omo, mandyikaihana omuundapi wange Eliyakii,+ omona wa Hilikiya.
21 Ame mandyikemuvaleka otyikutu tyove otyile,+ nekwamo liove, andyilitoneka nawa, andyikapakula outumini wove pomavoko ae. Makakala he yo vokukala mo Selusalei no veumbo lyo Sundaa.
22 Osapi yondywo ya Ndaviti+ mandyikeipaka komapepe ae. Tyina amaikula-po, nawike maiki-po. Tyina amaiki-po, nawike maikula-po.
23 Mandyikemupapela ngopeleko pomphangu imwe yakola, akakala otyipundi tyankhimana tyoutumini tyeumbo lya tate yae.
24 Mavakatulika kwe omunkhima* auho weumbo lya tate yae, ovana, na vana vatuka mwe, onombiya ambuho ononthutu, novilindo, nomalufo aeho omanene.
25 “Siovaa womambamba ovita, wati: ‘Monthiki omo, opeleko yokwapapelwa apa pakola, maikapolwa-po,+ aitetwa-po, aitoko. Ovipuka aviho ankho viatulikwa-ko, mavikatoka-ko, avihanyauka, mokonda o Siovaa mwene wetyipopia.’”
Outoi
^ Mokutala, o Selusalei ikahi nokupopiwa.
^ Omukainthu wapopiwa apa, okwapopia vala otyipuka nokankhenda ngatyina omunthu.
^ Ine, “vokuvelama kononkhambe.”
^ Ine, “fwiika.”
^ Ine, “vokuvelama kononkhambe mavakaongana.”
^ Ine, “mononthanthalahi.”
^ Ine, “otyinyanga ko Sundaa matyikapolwa-ko.”
^ Ine, “yombala.”
^ Melaka Liokonthuko: “Eumbo liae.”
^ Melaka Liokonthuko: “Omulemo.”
