Isaiya 9:1-21
9 Mahi, epuputu kamalikala ngo liokohale, pweetyi otyilongo tyali novitateka, etyi tyali otyilongo tya Sembulau no tya Nafitalii viapenyenyekwa.+ Mahi, haa makankhimaneka ondyila yokuli konthele yelunga, mohika yo Solondau, o Ngalileya yovanthu vovilongo.
2 Ovanthu vaendelele menthiki,Vamona otyitei tyimwe otyinene.
Ava vakala motyilongo tyenthiki enene,Vavetwa notyitei.+
3 Ovanthu votyilongo wevekalesa ovanyingi.Wevekalesa nehambu enene,
Vahambukilwa ponthele yove,Ngeetyi ovanthu vahambukwa pomuvo wokuteya,Ngeetyi ovanthu vahambukwa tyina velitepulila etyi vapunda.
4 Mokonda, ove watipaula okanga ankho vatyinda,Nomphangoti yali komapepe avo, oluhonge lwa una wevekalela komutwe,Ngo monthiki yo Mindiyaa.+
5 Ononkhaku ambuho mbuteketesa ohi pokweenda,Novikutu aviho viokweyula ohonde,Mavikakala ononkhwii mbokunthiakana otupia.
6 Mokonda twatyitilwa omona omukwendye,+Twapewa omona omukwendye,Outumini* maukakala komapepe ae.+
Makalukwa okuti: Omuviyuli Uhuvisa,+ o Huku Wevililo,+ o Tate ya Apeho, Omutumini Wombembwa.
7 Outumini wae* maukakala omunene,Ombembwa kamaikapwa+Kotyipundi tyoutumini tya Ndaviti,+ no mouhamba wae,Opo eupumphike, eukolesa+Eupameka nouviuki,+ noukwatyili,+Okuhimbikila pehepano, atee-tee.
Ombili ya Siovaa womambamba ovita maiketyilinga.
8 Siovaa watuma ondaka ku Sakoo,Ondaka oyo, yawila ku Isilayeli.+
9 Ovanthu aveho maveketyinoñgonoka,Efalaii, no vokukala mo Samaliya,Vokupopia nomalityindailo, nomutima womutomba okuti:
10 “Omatisolu atoka-po,Mahi onthwe matutungu nomamanya ahongwa nawa.+
Omikuyu viatyokwa-po,Mahi onthwe matupingiya-po omisendulu.”
11 Siovaa mekemukatulila onondyale mba Lesii,Akahongiliya onondyale mbae,
12 O Silia okuhimbikila koutundilo, no Filisitiya okuhimbikila koutakelo,*+Mavakaikula omilungu viavo, avahunyauna o Isilayeli.+
Movipuka ovio aviho valinga, otyo onyengo yae yahakondokelele,Okuvoko kwae, kwatandavela vala kuvange vovivi.+
13 Mokonda, ovanthu kavakondokele ku Una uvevanga,Kavaovolele Siovaa womambamba ovita.+
14 Monthiki ike vala, Siovaa makahanya mo Isilayeli,Omutwe, nomutyila, ondyovo, nonole.*+
15 Omulume wokwakulupa, ulingwa onthilo, oe omutwe,Omuuli wokulongesa ounkhembi, oe omutyila.+
16 Vana vahongolela ovanthu ava, vevengwangwanesa,Vokukahi nokuhongolelwa, vakuva-kuva.
17 Otyo Siovaa ahamahambukilwa ovakwendye veli pokati kavo,Kamakala nokankhenda nonosona mbavo,* novahepe vavo,Mokonda aveho vanthyitukila-po, valinga vala ovivi,+Aveho vapopia tyehena onondunge.
Mokonda yotyo, onyengo yae kayatulile,Mahi okuvoko kwae nkhele kwatandavela opo kuvange.+
18 Mokonda ovivi viyoka ngotupia,Viyoka omikete neholi.
Mavikayoka ovinkhondo moviteta,Avikakala omakaka omwihi.
19 Mokonda yonyengo ya Siovaa womambamba ovita,Otyilongo tyayakeswa otupia,Ovanthu mavakakala ononkhwii.
Petupu ou makahupisa mukwavo, atee umwe una elikwai nae.
20 Umwe makateta-ko okulio,Mahi no ngootyo nkhele akala nondyala.Omukwavo makateta-ko okumbili,Mahi kamekekuta.
Munthu na munthu makalia ohitu yokuvoko kwae mwene.
21 Manasesi makalia Efalaii,Efalaii akalia Manasesi.
Aveho vevali, mavakalwisa o Sundaa.+
Movipuka ovio aviho valinga, otyo onyengo yae yahakondokelele,Okuvoko kwae, kwatandavela vala kuvange vovivi.+
Outoi
^ Ine, “ouhamba, outumini womona wohamba.”
^ Ine, “ouhamba, outumini womona wohamba.”
^ Melaka Liokonthuko: “Konyima.”
^ Ine hamwe, “ompha yomundende, nolumbungu.”
^ Melaka Liokonthuko: “Novana vokuhena ovohe.”
