Etyi Tyahonekwa na Maluku 15:1-47
15 Kwati vala tyee, ononkhalamutwe mbovanakwa novakulu novahoneki vovitumino, Vombonge* Onene aveho, aveliongiya velipakele-mo, pahe avemukutu avemutwala ku Pilatu.+
2 Ou Pilatu emupulu ati: “Ove ove Hamba yova Sundaa?”+ Emukumbulula ati: “Otyo, ove mwene wetyipopia.”+
3 Mahi ononkhalamutwe mbovanakwa ankho veli nokumutendeleya ovipuka ovinyingi.
4 Pilatu emupulu ati: “Mukwe ya ove kupopi?+ Tala ovipuka ovio aviho veli nokukutendeleya.”+
5 Mahi Sesusi ahakumbulula, otyo Pilatu atyimuhuvisa.+
6 Mwene tyina tyamati povipito, uyelula-mo onkhwatwa ike, ei ovanthu vamaiti.+
7 Pononthiki mbatyo opo, omulume umwe ankho utiwa Mbalambasi uli mokaleya, ankho vena-mo omakongombanda makwavo, tyevetwaisa mokaleya ankho valeka omunthu.
8 Ovaunyingi etyi veya avaiti Pilatu alinge etyi ehole-ale okuvelinga.
9 Etavela eveti: “Mwahanda ndyimuyelulile-mo Ohamba yova Sundaa?”+
10 Pilatu utyii okuti ononkhalamutwe mbovanakwa vemukwatesa vala tyonkhi.+
11 Mahi ononkhalamutwe mbovanakwa avahindila ovaunyingi vaite Mbalambasi ayovoke.+
12 Pilatu evepulu vali ati: “Ya ou muti Ohamba yova Sundaa ndyimulinga ñgeni?”+
13 Aveho avakaluluka avati: “Ende momuti!”*+
14 Pilatu evepulu ati: “Omokonda yatyi? Otyivi patyi alinga?” Avakaluluka vali avati: “Ende momuti!”*+
15 Pahe Pilatu pokwahanda vala okuhula ko yovaunyingi, eveyelulila-mo Mbalambasi, atumu Sesusi avetwe,+ evepakulila-e vekemwipaele momuti.+
16 Omafwalali pahe aemutwala no mepata, meumbo liomutumini, aeliihana aakongoloka aeho aeya.+
17 Avemuvaleka otyinyanga tyikuhuka, avawingi ohala yomakete avemupake-yo komutwe,
18 avahimbika okukaluluka otyo vati: “Weewee,* Hamba yova Sundaa!”+
19 Avemuveta-veta nolumbungu momutwe, otyo vemunthila omate, avaikila konongolo, avelipetamena* kotyipala tyae.
20 Pahe etyi vemulinga-linga opo omukwele, avemupolo otyinyanga vemuvalekele, avemuvaleka ovikutu viae, avemupolo-po vekemupapele momuti.+
21 Avakuluminya omulume umwe omu Silene utiwa o Simau, ankho ulamba ondyila utunda komaumbo ngo oko, Simau he yoo Alesandele na Lufu avemukuluminya emutyindile-po omuti wae wemone.*+
22 Pahe avemutwala pohika pamwe patiwa Ngolongota, otyo okuti, “Otyikola Tyomutwe.”+
23 Opo pahe opo vahetekelela okumwavela ovinyu yankhinga omila,+ ngwe eheinu eyaanye.
24 Pahe avemupapela momuti, avelitepaulila ovikutu viae vyo kombanda, avatalesa vatale otyipi munthu na munthu matyindi-po.+
25 Koola ya tatu* avemupapela momuti.
26 Ngwe peulu liomutwe wae vahoneka-po onondaka ombu mbokwemuhunga: “Ohamba yova Sundaa.”+
27 Mahi pali ovimphulu vivali navio vapapela momiti, tyati etyi tyemuhula kokulio, etyi o kokumbili.+
28 * ——
29 Ava vakwata-po vemukwela, vapuka komutwe,+ otyo vati: “Aa! Ove wokuteya-po ondywo ya Huku oitungu vala mononthiki ononthatu,+
30 pahe liyovola tuluka momuti omu wemone.”*
31 Ononkhalamutwe mbovanakwa, novahoneki vovitumino novakulu votyilongo, navo avai mokumukwela, avati: “Wayovolele vakwavo; ngwe mwene okuliyovola ketyivili!+
32 Hae o Kilisitu Ohamba yova Isilayeli, atuluke momuti wemone* otyo tutala, tumutavele.”+ Soka naava umwe ankho vapapelwa momiti, avemupenye.+
33 Etyi pahe tyati koola ya pandu* potyilongo opo apakala enthiki atee koola ya tyive*+
34 Tyina pahe tyiti poola ya tyive, Sesusi eliyavela, ati: “Eli, Eli, lama sambakitani?” otyo okuti: “Huku yange, Huku yange, oityi wandyekela-po?”+
35 Ovanthu vamwe ankho vetai ngo opo etyi vetyiiva, avati: “Tala! Elo uli nokwihana Iliya.”
36 Umwe ahateka, akayava esipondya movinyu elipake kolumbungu emwavela anwe,+ ati: “Muyekei! Tutalei etyi Iliya yatyo meya okumupola-mo.”
37 Sesusi eliyavela, ayeke omwenyo.+
38 Otyinyanga tyo momphangu ikola,+ atyitanduka pokati, okuhimbikila umwe keulu atee pohi.+
39 Omutumini womakakunye utai-po, etyi amona ovipuka ovinene viamoneka-po Sesusi pokumana omwenyo, ati: “Ou naina ankho Omona wa Huku umwe.”+
40 Pali ovakai vamwe tupu veli vala nokutalela kokule, pati na Maliya Mandalena na Maliya ina yoo Tiaku Omututu na Susesi, na Salomee wali-po,+
41 ankho vemulandula otyo vemuundapela+ etyi eli ko Ngalileya, novakai vamwe atunda navo ko Selusalei.
42 Tyina pahe liketaka umwe, ngwe onthiki Yokulifwiika, oyo onthiki kulandula Otyasapalo,
43 akuya Susee omu Alimateya omulume umwe womunkhima, Omukwa-mbonge, nae ukevela Ouhamba wa Huku. Alingi umwe ononkhono, aende ku Pilatu, aiti-ko olutu lwa Sesusi.+
44 Ou Pilatu nkhele ketyii nawa ine Sesusi wamana-le omwenyo, aihana omutumini wovita emupulu.
45 Etyi pahe omutumini wovita etyikola umwe nawa, apakula otyivimbi ku Susee.
46 Susee alande otyinyanga tyomulinya otyiwa, ngatyo emuwinga, ekemupaka melangalo,+ elangalo atembele monkhanda; akulungutisila emanya pelangalo liatyo.+
47 Ava ovo Maliya Mandalena na Maliya ina ya Susesi, avesala-po vala otyo vatala apa apakwa.+
Outoi
^ Melaka Liokonthuko: “Osinedriu.”
^ Ine, “aipaelwe momuti.”
^ Ine, “aipaelwe momuti.”
^ Ine, “liepei.”
^ Ine, “avelinyongamena.”
^ Tala Onondaka Mbahangununwa.
^ Komuhuka tyina ekumbi lili meulu.
^ Tala Ovipuka Viapotoyolwa A3.
^ Tala Onondaka Mbahangununwa.
^ Tala Onondaka Mbahangununwa.
^ Tyina ekumbi liti pokati keulu komutenya.
^ Tyina liti komapeto.
